Read DIEM PROTESTANTA Nomerỳ 29 Bible Online

Nomerỳ 29 - DIEM PROTESTANTA bible

Nomerỳ 29

¹«Amin’ny andro voalohan’ny volana fahafito[116] dia hisy fivoriana masina ho anareo, ka tsy hanao ny asa fanaonareo andavanandro ianareo fa andro fitsofana trompetra izany.

²Ny hatolotrareo ho sorona dorana manontolo, ka hanetona ho hanitra hankasitrahin’ny TOMPO, dia izao: ombilahy iray sy ondrilahy iray avy ary zanak’ondry fito izay samy herintaona avy sady tsy misy kilema.

³Ny biby tsirairay dia hampiarahina amin’ny lafarinina nofetaina tamin’ny menaka, ka lafarinina sivy kilao isan’ombilahy, enina kilao isan’ondrilahy

⁴ary telo kilao isan-janak’ondry.

⁵Hanatitra osilahy iray koa ianareo ho sorona fanalana ny ota, hanaovana ny fombam-pivavahana famelan-keloka ho anareo.

⁶Hataonareo izany ho fanampin’ny sorona dorana manontolo isan’andro sy ny sorona dorana manontolo isaky ny andro voalohan’ny volana miaraka amin’ny fanatitra lafarinina sy divay momba azy; ho sakafo dorana ho an’ny TOMPO izany ka hanetona ho hanitra hankasitrahiny.

⁷«Amin’ny andro fahafolon’ny volana fahafito, dia hisy fivoriana masina ho anareo. Hifady hanina ianareo ka tsy hanao ny asa fanaonareo andavanandro.

⁸Ny hatolotrareo ho sorona dorana manontolo ho an’ny TOMPO, ka hanetona ho hanitra hankasitrahiny, dia izao: ombilahy iray sy ondrilahy iray ary zanak’ondry fito izay samy herintaona avy sady tsy misy kilema.

⁹Ny biby tsirairay dia hampiarahina amin’ny lafarinina nofetaina tamin’ny menaka, ka lafarinina sivy kilao isan’ombilahy, enina kilao isan’ondrilahy

¹⁰ary telo kilao isan-janak’ondry.

¹¹Hanatitra osilahy iray koa ianareo ho sorona fanalana ny ota. Hataonareo izany rehetra izany ho fanampin’ny sorona noho ny andro lehibe famelan-keloka sy ny sorona dorana manontolo tsy tapaka isan’andro ary ny fanatitra divay momba azy[117].

¹²«Ny andro faha-15 amin’ny volana fahafito, dia hisy fivoriana masina ho anareo, ka tsy hanao ny asa fanao andavanandro ianareo. Hanao fetim-piravoravoana ho voninahitry ny TOMPO mandritra ny herinandro ianareo[118].

¹³Amin’ny andro voalohany, ny hatolotrareo ho sorona dorana manontolo ka hanetona ho hanitra hankasitrahin’ny TOMPO, dia izao: ombilahy 13 sy ondrilahy roa ary zanak’ondry 14 izay samy herintaona avy sady tsy misy kilema.

¹⁴Ny biby tsirairay dia hampiarahina amin’ny lafarinina nofetaina tamin’ny menaka, ka lafarinina sivy kilao isan’ombilahy, enina kilao isan’ondrilahy

¹⁵ary telo kilao isan-janak’ondry.

¹⁶Hanatitra osilahy iray koa ianareo ho sorona fanalana ny ota. Hataonareo izany ho fanampin’ny sorona dorana manontolo tsy tapaka isan’andro ary ny fanatitra lafarinina sy divay momba azy.

¹⁷«Amin’ny andro faharoa ka hatramin’ny andro fahafito dia biby tsy misy kilema no hatolotrareo ho sorona dorana miaraka amin’ireo fanatitra mahazatra ho fanampin’ny sorona dorana isa-maraina. Ireto avy izany: amin’ny andro faharoa, dia ombilahy 12 sy ondrilahy roa sy zanak’ondry 14 izay samy herintaona avy, ary koa osilahy iray; amin’ny andro fahatelo, dia ombilahy 11 sy ondrilahy roa sy zanak’ondry 14 izay samy herintaona avy, ary koa osilahy iray; amin’ny andro fahefatra, dia ombilahy folo sy ondrilahy roa sy zanak’ondry 14 izay samy herintaona avy, ary koa osilahy iray; amin’ny andro fahadimy, dia ombilahy sivy sy ondrilahy roa sy zanak’ondry 14 izay samy herintaona avy, ary koa osilahy iray; amin’ny andro fahenina, dia ombilahy valo sy ondrilahy roa, sy zanak’ondry 14 izay samy herintaona avy, ary koa osilahy iray; amin’ny andro fahafito, dia ombilahy fito sy ondrilahy roa sy zanak’ondry 14 izay samy herintaona avy, ary koa osilahy iray.

³⁵«Ary amin’ny andro fahavalo, dia hisy fivoriana famaranana ny fetinareo, ka tsy hanao ny asa fanao andavanandro ianareo.

³⁶Ny hatolotrareo ho sorona dorana manontolo, ka hanetona ho hanitra hankasitrahin’ny TOMPO, dia izao: ombilahy iray sy ondrilahy iray ary zanak’ondry fito izay samy herintaona avy sady tsy misy kilema.

³⁷Ny biby tsirairay dia hampiarahina amin’ny fanatitra lafarinina sy divay momba azy araka ny mahazatra.

³⁸Hanolotra osilahy iray koa ianareo ho sorona fanalana ny ota. Hataonareo izany ho fanampin’ny sorona dorana manontolo isan’andro miaraka amin’ny fanatitra lafarinina sy divay momba azy.

³⁹«Ireo no sorona hatolotrareo ho an’ny TOMPO amin’ny andro fetinareo, afa-tsy izay hataonareo ho fanalàm-boady sy fanati-tsitrapo na sorona dorana izany na fanatitra lafarinina sy divay na koa sorom-pihavanana.»