Read DIEM PROTESTANTA Nomerỳ 30 Bible Online

Nomerỳ 30 - DIEM PROTESTANTA bible

Nomerỳ 30

¹Dia nolazain’i Mosesy tamin’ny Israelita izay rehetra nandidian’ny TOMPO azy[119].

²Niteny tamin’ireo filohan’ny foko israelita i Mosesy ka nampita izao baikon’ny TOMPO izao:

³«Raha misy lehilahy mivoady amin’ny TOMPO na mianiana hifady zavatra, dia tsy hitsoaka amin’ny teniny fa tsy maintsy hanatanteraka izay fampanantenana naloaky ny vavany izy[120].

⁴«Ataovy hoe misy tovovavy mbola miara-mipetraka amin-drainy ka maningo-tena mivoady na mianiana amin’ny TOMPO.

⁵Raha ren-drainy izany voady na fianianana izany, nefa tsy notoheriny, dia manan-kery ny voady amam-pianianana rehetra nataon’ilay tovovavy.

⁶Fa raha mandà kosa ny rainy amin’ny andro andrenesany izany, dia tsy manan-kery ny voady amam-pianianana rehetra nataony. Hamela an’ilay tovovavy ny TOMPO, satria efa nandà izany ny rainy.

⁷«Ataovy indray hoe kosa misy tovovavy maningo-tena mivoady na mianiana foana tsy amim-piheverana, kanefa manambady atỳ aoriana.

⁸Raha rem-badiny izany nefa tsy notoheriny, dia manan-kery ny voady amam-pianianana rehetra nataony.

⁹Fa raha mandà kosa ny lahy amin’ny andro andrenesany izany, dia foana avokoa ny voady sy ny fianianam-poana nataon’ny vavy; ary hamela azy ny TOMPO.

¹⁰«Fa ny voadin’ny vehivavy maty vady na nisara-panambadiana kosa dia mitoetra ara-dalàna.

¹¹«Kanefa ataovy hoe misy vehivavy mbola ao an-tranom-badiny no maningo-tena mivoady na mianiana.

¹²Raha ren’ny lahy izany nefa tsy notoheriny na norarany, dia mitoetra ara-dalàna ny voady amam-pianianana rehetra nataon-dravehivavy.

¹³Fa raha manafoana kosa ny lahy amin’ny andro andrenesany izany, dia tsy manan-kery ny voady amam-pianianana nataon-dravehivavy. Hamela azy ny TOMPO satria nofoanan’ny vadiny ny voady nataony.

¹⁴Ny voady na fianianana rehetra nataon’ny vavy mba hifady hanina dia ny vadiny irery ihany no mampanan-kery na mahafoana izany.

¹⁵Fa raha tsy manohitra an-dravehivavy kosa ny lahy hatramin’ny ampitson’ny andro nandrenesany ny voady amam-pianianany, dia mampanan-kery izany. Ny tsy nanoherany an-dravehivavy tamin’ny andro nandrenesany no mampanan-kery izany.

¹⁶Fa raha aorian’ny andro nandrenesany izany kosa ny lahy no hanapa-kevitra hanafoana izany, dia izy no hovesaran’ny heloky ny vadiny.

¹⁷«Ireo no lalàna izay nandidian’ny TOMPO an’i Mosesy momba ny voady ataon’ny vehivavy manambady na koa ataon’ny tovovavy mbola mipetraka ao an-tranon-drainy.»