Read DIEM PROTESTANTA Nomerỳ 31 Bible Online

Nomerỳ 31 - DIEM PROTESTANTA bible

Nomerỳ 31

¹Niteny tamin’i Mosesy ny TOMPO ka nanao hoe:

²— Faizo ny Midianita noho ny ratsy izay nataony tamin’ny Israelita[121]; aorian’izany, dia ho faty tahaka ireo razanao ianao.

³Ka hoy i Mosesy tamin’ny vahoaka: — Aoka hivonon-kiatrika ady ny sasany aminareo ary hanafika ny Midianita hahatanteraka ny famaizan’ny TOMPO azy.

⁴Mpiady arivo lahy isam-poko no halefanareo hiantafika.

⁵Nisy arivo lahy isam-poko notsongaina tamin’ny foloalindahin’i Israely, dia roa arivo sy iray alina izay vonon-kiatrika ady.

⁶Dia nalefan’i Mosesy hiantafika izy rehetra ireo niaraka tamin’i Pinehasa mpisorona sady zanakalahin’i Elehazara; i Pinehasa no nitondra ny fitaovana masina ary koa ny trompetra mpanainga hiady[122].

⁷Dia nanafika ny Midianita araka izay efa nandidian’ny TOMPO an’i Mosesy ireo, ka namono nahafaty ny lehilahy rehetra.

⁸Matin’ny Israelita koa ny mpanjaka midianita dimy lahy, dia i Evỳ sy i Rekema, i Tsoro sy i Hora ary i Reba. Novonoiny ho faty tamin’ny sabatra ihany koa i Balahama zanakalahin’i Behôra.

⁹Nataony sambo-belona ny vehivavy sy ny zaza midianita; nobaboiny avokoa ny biby fiompy rehetra mbamin’ny omby aman’ondriny rehetra ary ny fananany rehetra.

¹⁰Nodorany avokoa ny tanàna rehetra nonenany sy nitobiany.

¹¹Dia nalainy avokoa izay rehetra nobaboiny na olona na biby,

¹²ka nentiny tany amin’i Mosesy sy i Elehazara mpisorona ary ny fiangonana israelita teo an-toby tao amin’ny lemak’i Môaba, amoron’i Jôrdàna tandrifin’i Jerikao.

¹³Nivoaka nitsena azy teo ivelan’ny toby i Mosesy sy i Elehazara mpisorona ary ny filohan’ny fiangonana rehetra.

¹⁴Tezitra tamin’ireo filohan’antokon-tafika sy filohan’andian-tafika izay avy nanafika i Mosesy,

¹⁵ka niteny taminy hoe: — Nahoana no navelanareo ho velona ny vehivavy rehetra?

¹⁶Ireo ihany, noho ny torohevitr’i Balahama, no nahatonga ny Israelita hanao fahadisoana lehibe tamin’ny TOMPO, tamin’ilay raharahan’i Pehôra[123], ka niavian’ny areti-mandringana teo amin’ny fiangonan’ny TOMPO.

¹⁷Koa ankehitriny vonoy ho faty avokoa ny zaza lahy rehetra ary koa ny vehivavy rehetra efa nanambady.

¹⁸Fa ny zazavavy rehetra mbola virijiny kosa dia velomy ka tano ho anareo.

¹⁹Mitobia any ivelan’ny toby mandritra ny fito andro ianareo, dia ianareo izay nahafaty olona na nikasi-paty, ka samia midio amin’ny andro fahatelo sy fahafito, na ny tenanareo na ny zazavavy sambo-belonareo.

²⁰Diovy koa ny fitafianareo rehetra mbamin’ny fanaka rehetra vita hoditra na vita volon’osy na vita hazo.

²¹Dia hoy i Elehazara mpisorona tamin’ny miaramila nandray anjara tamin’ny fanafihana: — Izao no fepetran-dalàna izay nandidian’ny TOMPO an’i Mosesy:

²²Ny volamena, ny volafotsy, ny varahina, ny vy, ny vy fotsy ary ny firaka,

²³izany hoe ny zavatra rehetra mahatanty afo, dia sedrao amin’ny afo ho afa-doto, vao atsobohy ao amin’ny rano fanadiovana. Ary izay tsy mahatanty afo kosa dia atsobohy fotsiny ao anaty rano fanadiovana[124].

²⁴Sasao ny fitafianareo amin’ny andro fahafito, dia hadio ianareo ka hahazo miditra ao an-toby amin’izay.

²⁵Niteny tamin’i Mosesy ny TOMPO ka nanao hoe:

²⁶— Mandehana ianao sy i Elehazara mpisorona ary ny filoham-pianakaviana amin’ny fiangonana maka ny isan’ny voababo rehetra na olona izany na biby.

²⁷Zarao izany ka ny antsasany ho an’izay nandray anjara tamin’ny fanafihana ary ny antsasany ho an’ny fiangonana manontolo.

²⁸Hakanao hetra ho AHY anefa ny anjaran’ireo mpiantafika, dia olona iray isaky ny olona dimanjato ary biby iray isaky ny biby dimanjato raha omby na boriky na ondry na osy izany.

²⁹Halanao amin’ny anjaran’ny mpiantafika izany fanatitra ho AHY izany ka homenao an’i Elehazara mpisorona.

³⁰Ary ny anjaran’ny Israelita kosa dia hakanao olona iray isaky ny olona dimampolo ary biby iray isaky ny biby dimampolo raha omby na boriky na ondry na osy na koa biby hafa rehetra, ka homenao ny Levita izay miandraikitra ny fanompoana ao amin’ny Fonena-masina.

³¹Dia nataon’i Mosesy sy i Elehazara mpisorona araka izay nandidian’ny TOMPO an’i Mosesy izany.

³²Ny sisa tavela tamin’ireo babo azon’ny mpanafika dia ondry aman’osy 675 000,

³³omby 72 000,

³⁴boriky 61 000,

³⁵ary vehivavy mbola virijiny 32 000.

³⁶Ny antsasany anjaran’ny mpiantafika dia ondry aman’osy 337 500,

³⁷ka ny 675 no hetra nalana ho an’ny TOMPO;

³⁸omby 36 000 ka ny 72 ho an’ny TOMPO;

³⁹boriky 30 500, ka ny 61 ho an’ny TOMPO;

⁴⁰olona 16 000 ka ny 32 ho an’ny TOMPO.

⁴¹Nomen’i Mosesy an’i Elehazara mpisorona ny hetra natao ho fanatitra ho an’ny TOMPO, araka izay nandidian’ny TOMPO an’i Mosesy.

⁴²Ny anjara nomena ny fiangonan’i Israely sisa dia mitovy amin’ny an’ny mpiantafika, izany hoe ondry aman’osy 337 500,

⁴⁷Tamin’ny anjara nomena ny Israelita dia nangalan’i Mosesy olona iray isaky ny olona dimampolo, ary biby iray isaky ny biby dimampolo; koa araka izay nandidian’ny TOMPO an’i Mosesy dia nomeny ny Levita izay miandraikitra ny fanompoana momba ny Fonena-masin’ny TOMPO izany.

⁴⁸Nanatona an’i Mosesy ny filoha miaramila rehetra, dia ny komandin’ny antokon-tafika sy ny andian-tafika

⁴⁹ka nanao taminy hoe: — Efa nalainay ny isan’ny mpiantafika izay teo ambany fifehezanay, ka tsy nisy latsaka na dia iray aza.

⁵⁰Koa izany no itondranay fanatitra ho an’ny TOMPO mba hanaovana fombam-pivavahana famelan-keloka eo anatrehany ho an’ny tenanay, dia ny firavaka volamena hitan’ny tsirairay avy toy ny rojo, haba, peratra, kavina ary ny haingom-bozona.

⁵¹Noraisin’i Mosesy sy i Elehazara mpisorona tamin’ny filoha miaramila ny volamena rehetra izay firavaka voatefy avokoa.

⁵²Ny lanjan’ny volamena rehetra natolotr’ireo manamboninahitra ireo ho an’ny TOMPO dia nahatratra 170 kilao eo ho eo.

⁵³Fa ny miaramila tsotra kosa dia samy nitahiry ho an’ny tenany izay zavatra nobaboiny manokana.

⁵⁴Dia napetrak’i Mosesy sy i Elehazara mpisorona tao amin’ny Tranolay fihaonana ny volamena rehetra nomen’ny manamboninahitra miaramila, mba hahatsiarovan’ny TOMPO ireo Israelita.