Read DIEM PROTESTANTA Nomerỳ 34 Bible Online

Nomerỳ 34 - DIEM PROTESTANTA bible

Nomerỳ 34

¹Niteny tamin’i Mosesy koa ny TOMPO

²mba hamepetra ny Israelita hoe: — Rehefa tafiditra any amin’ny tany Kanahàna ianareo, dia izao no tany izay ho anjara lovanareo araka ireto sisin-tany ireto:

³«Any atsimo, ny taninareo dia voafaritry ny taniefitra Tsina sy ny tanin’i Edôma. Izany dia manomboka avy eo atsinanana ao amin’ny tendrony atsimon’ny Ranomasina Maty;

⁴avy eo dia miolaka eo atsimon’ny fiakaran’i Akrabima, dia mandalo an’i Tsina, dia mahazo ny atsimon’i Kadesy-Barnea sy mipaka any Hatsara, ary mitohy hatrany Hatsemôna;

⁵avy eo Hatsemôna, dia miolaka any amin’ny lohasahan-driakan’i Ejipta[133] ary miafara amin’ny Ranomasina Mediteranea.

⁶«Any andrefana dia ny Ranomasina Mediteranea no mamaritra ny taninareo.

⁷«Any avaratra dia hofaritanareo ny sisin-tany manomboka amin’ny Ranomasina Mediteranea ka hatrany amin’ny tendrombohitra Hôra[134].

⁸Avy eo an-tendrombohitra Hôra, dia ny lalana mankany Lebô-Hamata no hamaritanareo azy, ary hipaka any Tsedada.

⁹Dia hitohy hatrany Zifrôna izany ka hiafara any Hatsara-Heinàna. Izany no sisin-taninareo any avaratra.

¹⁰«Any atsinanana dia hofaritanareo ny sisin-tany manomboka eo Hatsara-Heinàna ka hatrany Sefama.

¹¹Avy eo dia mahazo an’i Riblà atsinanan’i Haîna, dia midina mipaka amin’ny sisiny atsinanan’ny farihin’i Kinereta,

¹²ka hitsontsorika hatrany Jôrdàna ary hiafara any amin’ny Ranomasina Maty. «Izany no taninareo araka ny sisin-tany manodidina azy.»

¹³Dia namepetra ny Israelita i Mosesy ka nanao hoe: — Izany no tany izay nandidian’ny TOMPO fa hozarainareo antsapaka ho an’ny foko sivy sy sasany[135].

¹⁴Fa ny foko robenita sy ny foko gadita ary koa ny antsasaky ny fokon’i Manase dia efa samy nahazo ny zara taniny,

¹⁵dia atỳ an-dafy atsinanan’i Jôrdàna tandrifin’i Jerikao manatrika ny fiposahan’ny masoandro[136].

¹⁶Dia niteny tamin’i Mosesy indray ny TOMPO ka nanao hoe:

¹⁷— I Elehazara mpisorona sy i Josoa zanakalahin’i Nona no hisahana ny fizaràna ny tany.

¹⁸Hisy tompon’andraikitra iray avy isam-poko hotendrenareo hanampy azy amin’izany.

¹⁹Izao avy ny anaran’izy ireo: ho an’ny fokon’i Joda dia i Kaleba zanakalahin’i Jefone;

²⁰ho an’ny fokon’i Simehôna, dia i Semoela zanakalahin’i Hamihoda;

²¹ho an’ny fokon’i Benjamîna, dia i Elidada zanakalahin’i Kislôna;

²²ho an’ny fokon’i Dana, dia i Bokỳ zanakalahin’i Jôglỳ;

²³ho an’ny fokon’i Manase zanak’i Jôsefa, dia i Haniela zanakalahin’i Efôda;

²⁴ho an’ny fokon’i Efraîma zanak’i Jôsefa, dia i Kemoela zanakalahin’i Siftana;

²⁵ho an’ny fokon’i Zebolòna, dia i Elitsafàna zanakalahin’i Parnàla;

²⁶ho an’ny fokon’i Jisakara, dia i Paltiela zanakalahin’i Hazàna;

²⁷ho an’ny fokon’i Asera, dia i Ahihoda zanakalahin’i Selômy;

²⁸ho an’ny fokon’i Naftalỳ, dia i Pedahela zanakalahin’i Hamihoda.

²⁹Ireo no olona nodidian’ny TOMPO hisahana ny fizaràna ny tany Kanahàna ho an’ny Israelita.