Read DIEM PROTESTANTA Nahoma 2 Bible Online

Nahoma 2 - DIEM PROTESTANTA bible

Nahoma 2

¹Ry vahoakan’i Joda, indro tamy eny an-tendrombohitra ny iraka mitondra vaovao mahafaly sy mitory fiadanana. Ankalazao ny fetinareo, efao ny voadinareo! Fa tsy handalo eo aminareo intsony ilay olom-poana[8], satria efa fongotra tanteraka izy.

²Miakatra hamely anao, ry Ninive, ireo mpandrava; koa ambeno ny manda, andraso ny lalana. Mivonòna hiady ary angony ny tafikao rehetra.

³Fa efa ampodin’ny TOMPO indray ny voninahitry ny taranak’i Jakôba efa ampodiny indray ny voninahitr’i Israely, ilay voaloboka rava sady simban’ny mpandroba.

⁴Ampinga miloko mena sy akanjo jaky midorehitra no entin’ny tafika fahavalonao, ry Ninive. Manjelatra toy ny afo ny kalesiny ary mirangaranga ny lefony, rehefa mivonon-kiady izy.

⁵Miriotra mamakivaky ny arabe ny kalesiny, ary mifanaretsaka eny an-kianja malalaka; toy ny harendrina no fijery azy fa mitsoriaka tahaka ny tselatra.

⁶Miantso ireo jeneraliny ny mpanjakan’i Asiria, kanjo tafintohina am-pandehanana ireny. Milomay manatona ny manda ny mpanani-bohitra ka maka toerana eo ambanin’ny fialofana[9].

⁷Vaky tampoka ny vavahady manolotra ny ony, ary mirodana ny lapa[10].

⁸Azo ka nentin-ko babo ny sarin’ny andriamani-baviny[11], ary ny mpanompovaviny mitoloko toy ny voromahailala sady mandòn-tratra noho ny alahelo.

⁹Fa hatrizay i Ninive dia tahaka ny siniben-drano, kanjo vaky izy ankehitriny. «Mijanòna! Mijanòna!» hoy ny hiaka nefa tsy nisy niherika na dia iray aza.

¹⁰Aoka hobaboina ny volafotsy sy ny volamena fa tsy mety ritra ny hareny, dia ireo zava-tsarobidy miavosa!

¹¹Tsy misy afa-tsy fandrobana sy fandravana ary fanimbana no hita! Kivy ny fon’ny rehetra; mangozohozo ny lohalika, mangovitra ny vatana ary mivaloarika ny tarehy.

¹²Fa aiza ankehitriny ilay tanàna izay toy ny zohy fieren’ny liona[12] sy fihinanan’ny zanany? Rehefa lasa miremby ny liona, dia tsy nisy sahy nanakotaba ny zanany.

¹³Novonoin’ny liona sy noviravirainy ny hazany ho an’ny liom-bavy sy ny zanany. Ny lavaka fonenany nofenoiny remby, dia ny haza rehetra voaviravirany.

¹⁴Koa izao no teny hentitra ataon’ny TOMPOn’izao rehetra izao: «Indro hamely anao Aho, ry Ninive, hodorako ho levona ny kalesinao ary hatolotro ho fatin-tsabatra ny tanoranao. Hofaranako hatreo ny fandrobanao teto an-tany, ka tsy ho re intsony ny fitakiana ataon’ny irakao.»