Read DIEM PROTESTANTA Zakarià 5 Bible Online

Zakarià 5 - DIEM PROTESTANTA bible

Zakarià 5

¹Nanopy maso indray aho, ka indro hitako nisy horonam-boky[16] manidina.

²Ary nanontanian’ilay anjely aho hoe: — Inona no hitanao? Dia hoy aho namaly: — Mahita horonam-boky manidina aho: folo metatra ny lavany ary dimy metatra ny sakany.

³Ka hoy izy tamiko: — Izany no ozona miainga hipaka amin’ny tany manontolo. Fa araka ny voasoratra eo amin’ny lafiny iray, ny mpangalatra rehetra dia horoahina hiala amin’ity tany ity; ary amin’ny lafiny hafa kosa, izay rehetra mianiana lainga dia hatao araka izany koa.

⁴Ny TOMPOn’izao rehetra izao dia manao teny hentitra hoe: Izaho no nampiainga izany ozona izany; hiditra ao an-tranon’ny mpangalatra sy ny mpianiana lainga amin’ny anarako izany, ary hitoetra ao ka handevona ny trano mbamin’ny hazony sy ny vatony.

⁵Niseho indray ilay anjely niresaka tamiko ka nanao hoe: — Atopazy ny masonao, ka jereo irỳ mipoitra irỳ?

⁶Ary nanontaniako izy hoe: — Inona io? Dia hoy ny navaliny: — Vata famarana mirakitra ny fahadisoana eto amin’ny tany manontolo io[17].

⁷Tamin’izay dia niainga ho azy ny vongam-piraka saron’ilay vata, ary indro hitako nisy vehivavy iray mipetraka ao anatiny.

⁸Dia hoy ilay anjely tamiko: — Io vehivavy io no Faharatsiam-panahy. Koa natosiny hiverina tao anaty vata izy ary nakatony ny sarona vongam-piraka.

⁹Raha nanopy maso aho, dia indreo hitako nisy vehivavy roa nanidina; ny rivotra no nanampy tosika ny elany, fa nanana elatra toy ny an’ny vano izy. Noraisin’izy roa vavy ilay vata ka nentiny nisidina teny amin’ny habakabaka.

¹⁰Dia nanontaniako ilay anjely niresaka tamiko hoe: — Hoentin’izy ireo aiza moa ity vata?

¹¹Ka hoy izy tamiko: Any Mezôpôtamia, fa any no hanaovana tempoly ho azy ka hametrahana azy eo ambonin’ny vodivato hitoerany.