Read DIEM PROTESTANTA Zakarià 7 Bible Online

Zakarià 7 - DIEM PROTESTANTA bible

Zakarià 7

¹Ary tamin’ny taona fahefatra nanjakan’i Dariôsa, fony andro fahefatry ny volana fahasivy na ny volana Kisleo[23], no nisy hafatry ny TOMPO tamiko.

²Ny mponin’i Betela dia efa naniraka an’i Saretsera sy i Regema Melèka mbamin’ny olony hifona amin’ny TOMPO.

³Ireo no voatendry hanontany ny mpisorona niasa tao amin’ny tranon’ny TOMPOn’izao rehetra izao ary hanontany ny mpaminany hoe: — Mbola hitomany sy hifady hanina amin’ny volana fahadimy[24] toy ny efa fanaonay hatramin’ny ela ihany va izahay?

⁴Koa nisy baikon’ny TOMPOn’izao rehetra izao

⁵nampitondra ahy ny valin-teniny ho an’ny mpisorona sy ho an’ny mponina rehetra teo amin’ny tany nanao hoe: «Hatramin’izay fitopolo taona izay, raha nifady hanina sy nitomany tamin’ny volana fahadimy sy fahafito[25] ianareo, moa ho Ahy va no nanaovanareo izany?

⁶Ary raha nihinana sy nisotro ianareo, moa tsy ho an’ny tenanareo va no nanaovanareo izany?»

⁷Fahiny efa niteny toy izany tamin’ny alalan’ireo mpaminany ny TOMPO, fony mbola nandry fahalemana ny mponin’i Jerosalema sy ny tanàna manodidina, ary mbola nonenana koa ny faritany atsimo sy ny lemak’i Sefelà.

⁸Ary nisy baikon’ny TOMPOn’izao rehetra izao mba hampahatsiahivako izay efa nambarany hoe: «Manaova fitsarana marina ianareo, samia mifankatia sy mifamindrafo.

¹⁰Ary aza mampahory ny mpitondratena na ny kamboty, na koa ny vahiny na ny mahantra. Aza mba mihevitra hanisy ratsy ny namany.»

¹¹Kanefa tsy nety nihaino izany ny olona; fa nanainga soroka ho fandavana izy sady nanentsin-tadiny mba tsy handre.

¹²Eny, nanao ny fony ho mafy toy ny diamondra izy ka tsy nety nihaino ny fampianaran’ilay TOMPOn’izao rehetra izao, dia ny teny izay nampilazan’ny Fanahiny tamin’alalan’ny mpaminany fahiny. Noho izany tezitra mafy ny Tompon’izao rehetra izao,

¹³ka nanao hoe: «Satria tsy nety nihaino izy rehefa mba nanao antso avo taminy Aho, dia tsy mba nihaino azy kosa Aho rehefa mba niantso vonjy tamiko izy.

¹⁴Fa naeliko ho any amin’ny firenena isan-tokony izay tsy fantany akory izy. Tany lao no sisa navelany taoriany, ka tsy nivezivezen’olona intsony. Ary ilay taniny nahafinaritra iny dia nataony tonga taniefitra.»