Read DIEM PROTESTANTA Zakarià 8 Bible Online

Zakarià 8 - DIEM PROTESTANTA bible

Zakarià 8

¹Ary nisy tenin’ny TOMPOn’izao rehetra izao tamiko nanao hoe:

²«Izao no lazain’ny TOMPOn’izao rehetra izao: Miredaredam-pitiavana an’i Tsiôna Aho; eny, miredaredam-pitiavana fatratra azy Aho.

³Koa Izaho TOMPO mihitsy no milaza fa efa tafaverina indray eto Tsiôna Aho ka monina eo afovoan’i Jerosalema. Ny hiantsoana an’i Jerosalema dia «Tanàna mahatoky.» ary ny hiantsoana an’i Tsiôna tendrombohitro dia «Tendrombohitra masina.»

⁴Eny, hoy Izaho TOMPOn’izao rehetra izao, mbola hisy lehilahy sy vehivavy antitra hipetrapetraka eny an-kianjan’i Jerosalema; ka isan’olona ireo, noho ny fahanterany, dia samy hitondra tehina an-tanana.

⁵Ary ny kianjan’io tanàna io koa dia ho feno zazalahy sy zazavavy milalao.

⁶Dia hoy ihany Izaho TOMPOn’izao rehetra izao: Raha sarotra atao ho amin’ireo andro ireo izany ho an’ny vahoaka israelita sisa velona, dia tsy ho sarotra atao kosa izany amiko. Izaho TOMPOn’izao rehetra izao no manao izany teny hentitra izany.

⁷Eny, Izaho TOMPOn’izao rehetra izao dia mampanantena fa ny vahoakako voaeliko dia hovonjeko avy any atsinanana sy avy any andrefana.

⁸Hitondra azy avy any Aho, ka hamponina azy ao Jerosalema; dia ho vahoakako izy, ary Izaho ho Andriamaniny amim-pahitsiana sy amim-pahamarinana.»

⁹Izao no lazain’ny TOMPOn’izao rehetra izao: «Mahereza, fa efa renareo ankehitriny ny fampanantenana izay nambaran’ny mpaminany tamin’ny andro nametrahana ny fototry ny tranoko mba hanorenana indray ny tempoliko.

¹⁰Talohan’izany andro izany dia tsy nisy valin-kasasarana na ho an’ny olona na ho an’ny biby. Ary tsy nisy olona afa-nivezivezy ka tsy notandindomim-pahavalo; fa navelako hifamely ny olon-drehetra.

¹¹Ankehitriny kosa dia tsy toy ny taloha intsony no ho fitondrako ny sisa amin’ny vahoakako. Izaho TOMPOn’izao rehetra izao no manao teny hentitra

¹²fa hamafy fiadanana etỳ amin’ny tany Aho ka hamoa be ny voaloboka ary hahavokatra ny saha; ny lanitra hampilatsaka ny orana sahaza, ary dia homeko ireo soa rehetra ireo izay sisa velona amin’ny vahoakako.

¹³Ry fanjakan’i Joda sy i Israely, toy ny nahatongavanareo ho oha-panozonana tany amin’ny hafa firenena, dia toy izany koa ankehitriny no anafahako anareo ka hahatonga anareo ho oha-pitahiana; koa aza matahotra intsony, fa mahereza.»

¹⁴Izao manko no lazain’ny TOMPOn’izao rehetra izao: «Tamin’ny nampahatezeran’ny razanareo Ahy, dia nihevitra hahatonga loza aminareo Izaho TOMPOn’izao rehetra izao ka tsy nisalasala nanatanteraka izany.

¹⁵Fa ankehitriny kosa dia mihevitra ny hanisy soa hanisy soa anareo Aho, mponin’i Jerosalema sy i Joda; koa aza matahotra intsony ianareo.

¹⁶Izao no tsy maintsy hataonareo: samia milaza ny marina amin’ny namany avy ianareo; aoka ho didim-pitsarana ara-drariny no havoaka eo amin’ny toeram-pitsaranareo mba hahatonga fiadanana eo aminareo.

¹⁷Aza mieritreritra hanisy ratsy ny namana ary aza mety hianiana lainga, fa halako ny zavatra rehetra toy ireny. Izaho TOMPO no manao izany teny hentitra izany.»

¹⁸Ary nisy tenin’ny TOMPOn’izao rehetra izao tamiko nanao hoe:

¹⁹— Izao no lazain’ny TOMPOn’izao rehetra izao: ny fifadian-kanina izay tandremanareo amin’ny volana fahefatra sy fahadimy ary fahafito sy fahafolo, dia ho tonga fetim-pifaliana sy firavoravoana mahafinaritra ho an’ny vahoakan’i Joda[26]. Kanefa tiava ny fahamarinana sy ny fiadanana.

²⁰Izao no lazain’ny TOMPOn’izao rehetra izao: «Mbola hisy firenena vahiny sy mponina avy amin’ny tanàna maro ho tonga indray eto Jerosalema.

²¹Ary ny mponina ao amin’ny tanàna iray dia hankany amin’ny mponin’ny tanàna iray hafa ka hitaona azy hanao hoe ‹Ndao tokoa isika handeha hivavaka amin’ny TOMPO, eny, hitady an’ilay TOMPOn’izao rehetra izao.› Dia hamaly ireo hoe: ‹Izahay koa mba handeha›.

²²Eny, olona maro sy firenena matanjaka no ho tonga eto Jerosalema hitady Ahy TOMPOn’izao rehetra izao ka hivavaka amiko.

²³Amin’izay andro izay, hoy Izaho TOMPOn’izao rehetra izao, dia hisy vahiny folo izay samy hafa fiteny hihazona Jiosy iray amin’ny sisin’akanjony, ka hitambezo aminy hoe: ‹Mba te handeha hiaraka aminareo izahay, satria efa renay fa momba anareo Andriamanitra›.»