Read DIEM PROTESTANTA Matio 26 Bible Online

Matio 26 - DIEM PROTESTANTA bible

Matio 26

¹Rehefa vitan’i Jesoa avokoa ireo fampianarana ireo, dia izao no teniny tamin’ny mpianany:

²— Fantatrareo fa indroa andro sisa tsy hahatongavan’ny fankalazana ny Paska[186]; ary ny Zanak’olona dia hatolotra hohomboana amin’ny hazofijaliana.

³Tamin’izay ireo lohandoha-mpisorona sy ireo loholon’ny vahoaka jiosy dia nivory tao amin’ny lapan’ny mpisorombe atao hoe Kaiafa.

⁴Ary niara-nioko izy rehetra hisambotra an’i Jesoa am-pitaka sy hamono Azy.

⁵Nefa hoy ry zareo hoe: — Aoka tsy ho amin’ny andro fankalazana, mba tsy hampitabataba ny vahoaka!

⁶Tany Betania i Jesoa tamin’izay ary tao an-tranon’i Simôna mpivaro-bakoly.

⁷Raha mbola teo am-pisakafoana i Jesoa, dia nisy vehivavy anankiray nitondra tavoahangy alabasitra feno ilomanitra sarobidy; ary naidin-dravehivavy tamin’ny lohan’i Jesoa ny ilomanitra.

⁸Tezitra ireo mpianatra nony nahita izany ka nanao hoe: — Nahoana re iny no dia lanîna foana tahaka izao?

⁹Azo namidy lafo be iny ilomanitra iny ka omena ny mahantra ny vidiny.

¹⁰Tsikaritr’i Jesoa izany ka hoy Izy tamin’ny mpianany: — Nahoana no anaovanareo izay mampalahelo an-dravehivavy? Eny, asa soa iny nataony tamiko iny.

¹¹Ny mahantra dia misy eto aminareo mandrakariva; fa Izaho kosa tsy mba eto aminareo mandrakariva[187].

¹²Naidin’ity vehivavy ity tamin’ny tenako iny ilomanitra iny, ary mba hamboarany Ahy halevina no nanaovany an’izany dieny mialoha[188].

¹³Lazaiko marina aminareo fa na aiza na aiza eran’izao tontolo izao hanambaràna ity Vaovao Mahafaly ity dia holazaina koa izao nataon’ity vehivavy ity izao mba ho fahatsiarovana azy.

¹⁴Tamin’izay ny anankiray tamin’ny mpianatra 12 lahy, ilay atao hoe Jodasy Iskariôta, dia nankany amin’ny lohandoha-mpisorona

¹⁵ka nanao taminy hoe: — Homenareo hoatrinona aho hanolorako anareo an’i Jesoa? Dia nanisa sekela volafotsy telopolo homena an’i Jodasy ry zareo[189].

¹⁶Ary nanomboka hatreo no nitadiavan’i Jodasy izay fotoana tsara hanolorany an’i Jesoa.

¹⁷Tamin’ny andro voalohany natao hihinanana ny azima, dia nanatona an’i Jesoa ny mpianany hanontany Azy hoe: — Aiza no tianao hanomananay ho anao ny sakafo Paska?

¹⁸Dia novalian’i Jesoa hoe: — Mandehana mankany an-tanàna ao amin-dranona ka lazao aminy hoe: «Izao no tenin’ny Mpampianatra: Efa tonga ny fotoanandroko; ka ato aminao no hanaovako ny sakafo Paska miaraka amin’ny mpianatro.»

¹⁹Dia nanao araka izany nasain’i Jesoa nataony izany ireo mpianatra, ka nanomana ny sakafo Paska.

²⁰Nony hariva ny andro, dia nipetraka hihinana i Jesoa mbamin’ny 12 lahy.

²¹Raha teo am-pisakafoana izy rehetra, dia hoy i Jesoa: — Lazaiko marina aminareo fa hanolotra Ahy ny anankiray aminareo!

²²Nalahelo mafy ireto mpianatra, ka samy niteny tamin’i Jesoa hoe: — Tsy izaho manko izany, Tompoko!

²³Fa hoy i Jesoa: — Ilay niara-nanatsoboka mofo tamiko tao anaty lovia[190], izy no hanolotra Ahy.

²⁴Ny Zanak’olona dia efa akaikin’ny ho faty, araka ny voalazan’ny Soratra Masina momba Azy[191], kanefa mampalahelo ilay olona hanolotra ny Zanak’olona! Tsara raha tsy ary izany olona izany!

²⁵Dia mba niteny koa i Jodasy, ilay efa hanolotra an’i Jesoa, ary nanao hoe: — Tsy izaho izany, ry Mpampianatra! Dia hoy i Jesoa taminy: — Anao izany teny izany!

²⁶Raha mbola teo am-pisakafoana ry i Jesoa sy ny mpianany, dia nandray mofo i Jesoa; ary nisaorany an’Andriamanitra izany, dia notapatapahiny sy nomeny ny mpianany ka nataony hoe: — Raiso ary hano fa ny tenako ity.

²⁷Avy eo nandray kalisy i Jesoa; ary nisaorany an’Andriamanitra izany, dia nomeny ny mpianany ka nataony hoe: — Isotroinareo rehetra

²⁸fa ny rako ity, dia ilay ra anorenan’Andriamanitra ny fanekempihavanany[192] sady alatsaka ho an’ny besinimaro ho famelan-keloka.

²⁹Lazaiko aminareo fa tsy hisotro divay intsony aho mandra-pahatongan’ilay andro hisotroako ny divay vaovao miaraka aminareo any amin’ny Fanjakan’ny Raiko.

³⁰Ary rehefa avy nihira ny salamo fiderana[193] i Jesoa mbamin’ny mpianany, dia lasa nankany amin’ny tendrombohitra Analanôliva.

³¹Tamin’izay dia hoy i Jesoa tamin’ny mpianany: — Anio alina dia handao Ahy avokoa ianareo, satria izao no voalazan’ny Soratra Masina: «Hasiako ny mpiandry, dia hiparitaka ny ondry andrasana[194].»

³²Fa rehefa tafatsangana velona Aho, dia hialoha anareo any Galilea.

³³Dia niteny i Petera ka nanao tamin’i Jesoa hoe: — Na dia handao Anao avokoa aza ny olona rehetra, izaho kosa tsy mba handao Anao na oviana na oviana.

³⁴Fa hoy i Jesoa tamin’i Petera: — Lazaiko marina aminao fa anio alina alohan’ny maneno akoho, dia handà Ahy intelo ianao.

³⁵Ary novalian’i Petera hoe: — Na dia hovonoina miaraka aminao aza aho, dia tsy handà Anao na oviana na oviana. Ary dia samy nilaza toy izany koa ny mpianatra rehetra.

³⁶Tamin’izay i Jesoa mbamin’ireo mpianany dia tonga tao amin’ny saha anankiray atao hoe Getsemane[195]; ka hoy i Jesoa tamin’ny mpianany: — Mipetraha eto ianareo, fa mbola hankeroa hivavaka Aho!

³⁷Nentin’i Jesoa niaraka taminy kosa i Petera mbamin’izy roa lahy zanak’i Zebedeo. Dia nanomboka nozoim-pahoriana sy feno tebiteby fatratra i Jesoa,

³⁸ary dia niteny tamin’izy telo lahy hoe: — Ory dia ory ny fanahiko, ka hila hahafaty Ahy. Mijanòna eto ianareo ary miaraha miari-tory amiko!

³⁹Dia nandroso kely i Jesoa, ary niankohoka tamin’ny tany ka nivavaka hoe: — Raiko ô, raha azo atao, esory lavitra Ahy izao fijaliana izao; kanefa tsy hoe araka izay sitrapoko, fa araka izay sitraponao!

⁴⁰Dia niverina nankeo amin’ny mpianany telo lahy i Jesoa ary nahita azy natory; ka hoy Izy tamin’i Petera: — Hay tsy nahari-tory miaraka amiko adiny iray akory ianareo?

⁴¹Miareta tory ary mivavaha mba tsy ho azon’ny fakampanahy. Marisika ihany ny fanahin’ny olona, fa ny nofo no malemy!

⁴²Dia nihataka fanindroany i Jesoa ary nivavaka hoe: — Raiko ô, raha tsy azo esorina izao fijaliana izao fa tsy maintsy hiaretako, dia aoka ny sitraponao no hatao!

⁴³Nony niverina nankeo amin’izy telo lahy indray i Jesoa, dia mbola nahita azy natory; fa efa navesatra ny masony.

⁴⁴Dia nandao azy telo lahy i Jesoa ary nihataka indray; dia nivavaka fanintelony ka ny teniny teo ihany no nataony.

⁴⁵Ary niverina Izy nankeo amin’ny mpianany telo lahy, ka nanao taminy hoe: — Mbola matory sy miala sasatra ihany ve ianareo? Indro efa akaiky ny fotoanandro, ary efa hatolotra eo am-pelatanan’ny mpanota ny Zanak’olona!

⁴⁶Mitsangàna, andao isika handeha! Indro efa akaiky ilay hanolotra Ahy!

⁴⁷Raha mbola niteny i Jesoa, dia indro tonga i Jodasy, anankiray amin’ny 12 lahy; ary olona maro nirongo sabatra sy kibay, irak’ireo lohandoha-mpisorona sy ireo loholon’ny vahoaka jiosy, no tafaraka taminy.

⁴⁸Ilay hanolotra an’i Jesoa dia efa nanome famantarana azy ireo toy izao: «Izay horohako no Izy, ka sambory.»

⁴⁹Ary nanatona an’i Jesoa avy hatrany i Jodasy, ka nanao taminy hoe: — Mpampianatra ô, ho ao aminao anie ny fiadanana! Dia nanoroka Azy i Jodasy.

⁵⁰Fa i Jesoa kosa niteny hoe: — Ry sakaiza, izany ve no alehanao eto[196]? Tamin’izay dia nohatonin’ireo iraka i Jesoa, ary nohazoniny sady nosamboriny.

⁵¹Indro kosa ny anankiray tamin’ireo nomba an’i Jesoa fa naninjitra tanana ka nanatsoaka sabatra, ary namely ny mpanompon’ny mpisorombe ka nahafaka ny sofiny[197].

⁵²Ary dia hoy i Jesoa tamin’io mpianany io: — Avereno amin’ny toerany ny sabatrao, fa izay rehetra mamely amin’ny sabatra dia ho fatin’ny sabatra.

⁵³Heverinao ve fa tsy azoko atao ny mangataka amin’ny Raiko, ary ankehitriny izao ihany Aho dia handefasany anjely marobe mihoatra noho ny andian-tafika 12?

⁵⁴Kanefa raha izany, ahoana no hahatanterahan’ny Soratra Masina izay milaza fa tsy maintsy ho tonga izao?

⁵⁵Tamin’izay fotoana izay i Jesoa dia niteny tamin’ny andian’olona nirahina hoe: — Toy ny hisambotra jiolahy izato fiavinareo mirongo sabatra sy kibay hisambotra Ahy! Isan’andro Aho dia nipetraka nampianatra teo an-kianjan’ny tempoly, kanefa tsy nosamborinareo.

⁵⁶Fa tonga kosa izany rehetra izany mba hahatanterahan’izay voalazan’ireo mpaminanin’Andriamanitra ao amin’ny Soratra Masina. Tamin’izay dia nandao an’i Jesoa ny mpianatra rehetra ka nandositra[198].

⁵⁷Ary izay efa nisambotra an’i Jesoa dia nitondra Azy ho any an-tranon’i Kaiafa mpisorombe, izay nivorian’ny mpahay lalàna sy ny loholona rahateo.

⁵⁸Fa i Petera kosa nanaraka an’i Jesoa teny lavidavitra teny mandra-pahatonga tao an-tokotanin’ny tranon’ny mpisorombe. Dia niditra tao an-tokotany i Petera ary niara-nipetraka tamin’ny mpiandry raharaha teo mba hahita izay fiafaran-javatra.

⁵⁹Nokarohin’ireo lohandoha-mpisorona sy ireo rehetra anisan’ny Fitsarana ambony teo amin’ny Jiosy izay mety hiampangana an’i Jesoa, na dia amin’ny lainga aza, mba hanamelohana Azy ho faty;

⁶⁰saingy tsy nahita ry zareo na dia tonga maro teo aza ny mpiampanga lainga an’i Jesoa[199]. Nony farany, dia nisy olona roa lahy tonga teo

⁶¹ka nanao hoe: — Izao no voalazan’ilay io; azoko ravana ity tempolin’Andriamanitra ity ary haoriko indray ao anatin’ny telo andro[200].

⁶²Dia nitsangana ny mpisorombe ary niteny tamin’i Jesoa hoe: — Tsy mamaly na inona na inona ve Ianao? Inona no iampangan’ireo Anao?

⁶³Fa nangina i Jesoa. Dia hoy ny mpisorombe taminy: — Mandidy Anao aho, amin’ny anaran’ilay Andriamanitra velona, mba hilaza aminay raha Ianao no ilay Mesia, ilay Zanak’Andriamanitra.

⁶⁴Dia novalian’i Jesoa hoe: — Anao izany teny izany! Kanefa ambarako aminareo fa tsy ho ela intsony dia ho hitanareo ny Zanak’olona mipetraka eo ankavanan’ilay Andriamanitra mahery ary koa tamy eo amin’ny rahon’ny habakabaka[201].

⁶⁵Tamin’izay ny mpisorombe dia nandriatra ny fitafiany sady niteny hoe: — Nanevateva an’Andriamanitra Izy; ka inona indray no ilàntsika vavolombelona hiampanga. Indro renareo teo ny fanevatevàny an’Andriamanitra;

⁶⁶ka ahoana no hevitrareo? Dia hoy ireo: — Mendrika Azy ny ho faty[202]!

⁶⁷Tamin’izay dia nandrora ny tavan’i Jesoa ry zareo ary namely totohondry Azy; ny sasany kosa namely tehamaina Azy[203]

⁶⁸sady nanao hoe: — Vinanio, ry Mesia, lazao izay namely Anao!

⁶⁹Nipetraka teo ivelany tao an-tokotany i Petera. Dia nisy vehivavy mpiasa anankiray nanatona an’i Petera ka niteny taminy hoe: — Ianao koa niaraka tamin’i Jesoa, Ilay avy any Galilea.

⁷⁰Fa nandà teo anatrehan’izy rehetra i Petera ka nanao hoe: — Tsy fantatro izay lazainao!

⁷¹Dia lasa nankeo am-bavahady i Petera; kanjo nisy vehivavy mpiasa anankiray hafa nahatazana azy ary niteny tamin’izay teo hoe: — Io rangahy io koa niaraka tamin’i Jesoa, Ilay avy any Nazareta.

⁷²Ary nandà indray i Petera ka nanao hoe: — Mianiana aho fa tsy fantatro izany Lehilahy izany.

⁷³Nony afaka kelikely, dia nanatona an’i Petera ny olona teo ka nanao taminy hoe: — Tena anisan’ireny tokoa ianao, sady ny fiteninao rahateo mampiharihary izany.

⁷⁴Ary sady niozona sy nianiana i Petera no nanao hoe: — Tsy fantatro izany Lehilahy izany. Niaraka tamin’izay dia nisy akoho naneno;

⁷⁵ary tsaroan’i Petera ny teny voalazan’i Jesoa hoe: «Alohan’ny maneno akoho, dia handà Ahy intelo ianao[204].» Dia lasa nankany ivelany i Petera ka nitomany fatratra.