Read DIEM PROTESTANTA Marka 14 Bible Online

Marka 14 - DIEM PROTESTANTA bible

Marka 14

¹Indroa andro sisa tsy hahatongavan’ny fankalazana ny Paska sy ny azima[103], dia nitady izay hisamborana an’i Jesoa am-pitaka ny lohandoha-mpisorona sy ny mpahay lalàna hamonoany Azy.

²Nefa hoy ry zareo: — Aoka tsy ho amin’ny andro fankalazana, fandrao hitabataba ny vahoaka.

³Tany Betania i Jesoa tamin’izay ary tao an-tranon’i Simôna mpivarotra bakoly. Raha mbola teo am-pisakafoana i Jesoa, dia tonga ity vehivavy anankiray nitondra tavoahangy alabasitra feno ilomanitra sarobidy atao hoe narda. Dia novakîn-dravehivavy ny tavoahangy ka naidiny tamin’ny lohan’i Jesoa ny ilomanitra.

⁴Ary nisy sasany tezitra ka nifampilaza hoe: — Nahoana no dia lanîna foana tahaka izao ity ilomanitra?

⁵Azo namidy denàry telonjato mahery iny ka omena ny mahantra ny vidiny! Dia nolevileven-dry zareo ravehivavy.

⁶Fa hoy i Jesoa: — Avelao izy! Nahoana no anaovanareo izay mampalahelo azy? Asa soa iny nataony tamiko iny.

⁷Ny mahantra moa misy eto aminareo mandrakariva[104], ka azonareo asiana soa amin’izay fotoana tianareo; fa Izaho kosa tsy mba eto aminareo mandrakariva.

⁸Nanao izay azony natao izy nanosotra ilomanitra ny tenako dieny mialoha mba hamboarany Ahy halevina[105].

⁹Lazaiko marina aminareo fa na aiza na aiza eran’izao tontolo izao hanambarana ny Vaovao Mahafaly, dia holazaina koa izao nataon’ity vehivavy ity izao mba ho fahatsiarovana azy.

¹⁰Fa i Jodasy Iskariôta, anankiray tamin’ny 12 lahy, dia nankany amin’ny lohandoha-mpisorona mba hanolotra an’i Jesoa hovonoina.

¹¹Faly ry zareo nandre izany, ka nanaiky hanome vola an’i Jodasy; ary dia notadiavin’i Jodasy izay fotoana mety hanolorany an’i Jesoa.

¹²Tamin’ny andro voalohany natao hihinanana ny azima, izay andro famonoana ny zanak’ondry ho an’ny sakafo Paska, dia hoy ny mpianany tamin’i Jesoa: — Aiza no tianao hanomananay ho Anao ny sakafo Paska?

¹³Dia naniraka roa lahy tamin’ny mpianany i Jesoa ka nanao taminy hoe: — Mandehana mankany an-tanàna, fa hisy lehilahy mitondra siny feno rano hifanena aminareo, dia iny arahina;

¹⁴ary ilazao ny tompon’izay trano hidirany hoe: «Izao no tenin’ny Mpampianatra: aiza, hono, izay efitrano hiarahako mihinana ny sakafo Paska amin’ny mpianatro?»

¹⁵Dia hotoroany efitrano ambony rihana ianareo, efitrano malalaka sy ary fomba sady voavoatra tsara; ka ao ny sakafontsika no omàny.

¹⁶Dia nandeha izy roa lahy ka tonga tany an-tanàna, ary nahita ny toe-javatra araka izay voalazan’i Jesoa taminy sy nanomana ny sakafo Paska.

¹⁷Nony hariva ny andro, dia tonga i Jesoa mbamin’ny 12 lahy.

¹⁸Dia nipetraka hihinana izy rehetra, ka iny teo am-pisakafoana iny dia hoy i Jesoa: — Lazaiko marina aminareo fa hanolotra Ahy ny anankiray aminareo; dia ilay miara-mihinana amiko[106].

¹⁹Nalahelo ny mpianatra ka nanomboka niteny tsirairay tamin’i Jesoa hoe: — Tsy izaho manko izany!

²⁰Fa hoy i Jesoa taminy: — Ny anankiray aminareo 12 lahy, ilay miara-manatsoboka mofo amiko ao anaty lovia, no izy[107]!

²¹Ny Zanak’olona dia efa akaikin’ny ho faty, araka ny voalazan’ny Soratra Masina momba Azy[108]; mampalahelo anefa ilay olona hanolotra ny Zanak’olona! Tsara raha tsy ary izany olona izany.

²²Raha mbola teo am-pisakafoana iny i Jesoa mbamin’ny mpianany, dia nandray mofo i Jesoa; ary nisaorany an’Andriamanitra izany, dia notapatapahiny sy nomeny ny mpianany ka nataony hoe: — Raiso fa ny tenako ity!

²³Avy eo nandray kalisy i Jesoa, ary nisaorany an’Andriamanitra izany ka nomeny ny mpianany sy nisotroan’izy rehetra;

²⁴dia hoy i Jesoa tamin’ny mpianany: — Ny rako ity, dia ilay ra anorenan’Andriamanitra ny fanekempihavanany[109] sady alatsaka ho an’ny besinimaro.

²⁵Lazaiko marina aminareo fa tsy hisotro divay intsony Aho mandra-pahatongan’ilay andro hisotroako ny divay vaovao any amin’ny Fanjakàn’Andriamanitra.

²⁶Ary rehefa avy nihira ny salamo fiderana[110] i Jesoa mbamin’ny mpianany, dia lasa nankany amin’ny tendrombohitra Analanôliva.

²⁷Ary hoy i Jesoa tamin’ny mpianany: — Handao Ahy avokoa ianareo rehetra, satria izao no voalazan’ny Soratra Masina; «Hasiako ny mpiandry, dia hiparitaka ny ondry[111].»

²⁸Kanefa rehefa tafatsangana velona Aho, dia hialoha anareo any Galilea.

²⁹Fa novalian’i Petera hoe: — Na dia handao Anao avokoa aza ny olona rehetra, izaho kosa tsy mba handao Anao.

³⁰Ary hoy i Jesoa taminy: — Lazaiko marina aminao fa anio dia anio ihany, raha mbola tsy maneno indroa akory ny akoho, dia handà Ahy intelo ianao.

³¹Fa vao mainka koa nanamafy ny teniny i Petera nanao hoe: — Na dia hovonoina miaraka aminao aza aho, dia tsy handà Anao. Ary dia samy nilaza toy izany avokoa ny mpianatra rehetra.

³²Dia tonga tany amin’ny saha atao hoe Getsemane[112] i Jesoa mbamin’ireo mpianany, ka hoy i Jesoa taminy: — Mipetraha eto ianareo mandra-pivavako!

³³Fa nentin’i Jesoa niaraka taminy kosa ry i Petera sy i Jôhany ary i Jakôba. Dia nanomboka nihoron-koditra sy feno tebiteby fatratra i Jesoa

³⁴ka niteny tamin’izy telo lahy hoe: — Ory dia ory ny fanahiko, ka hila hahafaty Ahy. Mijanòna eto ianareo ary miareta tory.

³⁵Dia nandroso kely i Jesoa ary niankohoka tamin’ny tany, ka nivavaka mba hialan’izany ora fijaliana izany aminy raha azo atao;

³⁶ary hoy Izy: — Raiko ô[113], vitanao ny zavatra rehetra; esory lavitra ahy izao fijaliana izao, kanefa tsy hoe izay sitrapoko, fa izay sitraponao!

³⁷Dia niverina nankeo amin’izy telo lahy i Jesoa ary nahita azy natory; ka hoy Izy tamin’i Petera: — Matory ve ianao, ry Simôna? Tsy nahari-tory adiny iray akory ve ianao?

³⁸Miareta tory ianareo ary mivavaha mba tsy ho azon’ny fakampanahy. Marisika ihany ny fanahin’ny olona fa ny nofo no malemy.

³⁹Dia nihataka indray i Jesoa ary namerina ny vavaka nataony teo.

⁴⁰Nony niverina nankeo amin’izy telo lahy Izy, dia mbola nahita azy natory, fa efa navesatra ny masony ka tsy hitany izay havaly an’i Jesoa.

⁴¹Ary niverina fanintelony teo amin’izy telo lahy Izy dia nanao taminy hoe: — Mbola matory sy miala sasatra ihany ve ianareo? Ampy izay! Tonga ny fotoanandro: indro efa hatolotra eo am-pelatanan’ny mpanota ny Zanak’olona!

⁴²Mitsangàna, andao isika handeha! Indro efa akaiky ilay hanolotra Ahy!

⁴³Ary niaraka tamin’izay, raha mbola miteny eo i Jesoa, dia tonga i Jodasy, anankiray amin’ny 12 lahy; ary andian’olona nirongo sabatra sy kibay, irak’ireo lohandoha-mpisorona sy mpahay lalàna ary loholona, no tafaraka taminy.

⁴⁴Ilay hanolotra an’i Jesoa dia efa nanome famantarana an-dry zareo hoe: «Izay horohako no Izy ka sambory, dia ento ka ambeno tsara.»

⁴⁵Vao tonga i Jodasy, dia nanatona an’i Jesoa avy hatrany ka nanao taminy hoe: — Mpampianatra ô! Dia nanoroka Azy i Jodasy.

⁴⁶Nohazonin’ireo iraka tamin’izay i Jesoa ary nosamboriny.

⁴⁷Nanatsoaka sabatra kosa ny anankiray tamin’ny olona teo anilan’i Jesoa, dia namely an’ilay mpanompon’ny mpisorombe, ka nahafaka ny sofiny[114].

⁴⁸Fa hoy i Jesoa tamin’ireo iraka: — Toy ny hisambotra jiolahy izato fiavinareo mirongo sabatra sy kibay hisambotra Ahy!

⁴⁹Teo aminareo isan’andro aho ary nampianatra tao an-kianjan’ny tempoly, kanefa tsy nosamborinareo. Eny àry, fa dia aoka ho tanteraka ny Soratra Masina!

⁵⁰Dia nandao an’i Jesoa ny mpianatra rehetra ka nandositra[115].

⁵¹Ary nisy zatovolahy iray nanaraka an’i Jesoa, tsy nanana afa-tsy akanjo manolo-koditra. Nosamborin’ny olona koa izy;

⁵²fa nafoin’ilay zatovo ny akanjony ka lasa izy nandositra niboridana.

⁵³Nentina tao an-tranon’ny mpisorombe i Jesoa. Tonga tao avokoa ireo lohandoha-mpisorona sy loholona ary mpahay lalàna.

⁵⁴Fa i Petera kosa nanaraka an’i Jesoa teny lavidavitra teny mandra-pahatonga tao an-tokotanin’ny tranon’ny mpisorombe, dia niara-nipetraka tamin’ireo mpiandry raharaha ka namindro teo anilan’ny afo.

⁵⁵Nokarohin’ireo lohandoha-mpisorona sy ireo rehetra anisan’ny Fitsarana ambony teo amin’ny Jiosy izay mety hiampangana an’i Jesoa hanamelohana Azy ho faty, saingy tsy nahita ry zareo.

⁵⁶Eny, maro ireo niampanga lainga an’i Jesoa[116], nefa tsy nifanaraka ny fiampangana nataony.

⁵⁷Dia nisy nitsangana niampanga lainga an’i Jesoa toy izao:

⁵⁸— Renay ilay io nanao hoe: «Horavako ity tempoly nataon-tanan’olombelona ity, ary ao anatin’ny telo andro, dia hanorina hafa tsy nataon-tanan’olombelona Aho[117].»

⁵⁹Fa tsy nifanaraka akory ny filàzan’ireo mpiampanga na dia tamin’izany aza.

⁶⁰Dia nitsangana nankeo afovoan’ny mpivory ny mpisorombe ary nanontany an’i Jesoa hoe: — Tsy mamaly akory ve Ianao? Inona no iampangan’ireo Anao?

⁶¹Fa nangina i Jesoa ary tsy namaly akory. Dia nanontany Azy indray ny mpisorombe nanao hoe: — Ianao ve no Kristy, Zanak’ilay Andriamanitra ankalazaintsika lalandava?

⁶²Ka novalian’i Jesoa hoe: — Izaho no Izy, ary «ho hitanareo ny Zanak’olona mipetraka eo ankavanan’ilay Andriamanitra mahery» ary koa «tamy eo amin’ny rahon’ny habakabaka[118].»

⁶³Tamin’izay ny mpisorombe dia nandriatra ny fitafiany sady niteny hoe: — Inona indray no ilàntsika vavolombelona hiampanga?

⁶⁴Renareo teo ny fanevatevàny an’Andriamanitra, ka ahoana ianareo amin’izany? Dia samy nanameloka an’i Jesoa izy rehetra ka nilaza fa mendrika Azy ny ho faty[119].

⁶⁵Tamin’ny olona teo dia nisy sasany nandrora an’i Jesoa, nanarona ny tavany, namely totohondry Azy sady nanao taminy hoe: — Vinanio hoe! Dia nalain’ny mpiandry raharaha i Jesoa ary nasian’ireo tahamaina[120].

⁶⁶Raha mbola tao ambany tao an-tokotany i Petera, dia avy ny anankiray tamin’ireo vehivavy mpiasan’ny mpisorombe.

⁶⁷Nahita an’i Petera namindro teo ravehivavy, dia nijery azy tsara ka nanao hoe: — Ianao koa niaraka tamin’ilay Jesoa avy any Nazareta iny?

⁶⁸Fa nandà i Petera ka nanao hoe: — Tsy fantatro sady tsy azoko izay lazainao. Dia nivoaka ny tokotany izy, ary nisy akoho naneno[121].

⁶⁹Fa nahatazana an’i Petera ilay vehivavy mpiasa, ka nilazany indray ny olona teo hoe: — Anisan’ireny koa io rangahy io!

⁷⁰Fa mbola nandà indray i Petera. Nony afaka kelikely, dia hoy indray ny olona teo amin’i Petera: — Tena anisan’ireny tokoa ianao sady Galileanina rahateo.

⁷¹Fa niozona sy nianiana i Petera ka nanao hoe: — Tsy fantatro izany Lehilahy lazainareo izany.

⁷²Ary niaraka tamin’izay dia nisy akoho naneno fanindroany; ka tsaroan’i Petera ilay tenin’i Jesoa fony Izy nilaza taminy hoe: «Raha mbola tsy maneno indroa akory ny akoho, dia handà Ahy intelo ianao.» Dia nigogogogo nitomany i Petera[122].