Read DIEM PROTESTANTA Lioka 20 Bible Online

Lioka 20 - DIEM PROTESTANTA bible

Lioka 20

¹Indray andro, dia nampianatra ny vahoaka teo an-kianjan’ny tempoly i Jesoa sady nanambara ny Vaovao Mahafaly taminy. Tonga kosa ny lohandoha-mpisorona sy ny mpahay lalàna mbamin’ny loholona

²ka nanao taminy hoe: — Mba lazao kely hoe: fahefana ahoana moa no anaovanao an’izao zavatra izao? Iza no nanome Anao izao fahefana izao?

³Dia novalian’i Jesoa hoe: — Izaho koa mba hanontany anareo zavatra anankiray, ka lazao kely hoe:

⁴iza no naniraka an’i Jôhany hanao batisa[149], Andriamanitra sa olombelona?

⁵Dia niara-niady hevitra ry zareo ka nifampiresaka hoe: — Raha lazaintsika hoe: «Andriamanitra no naniraka azy», dia hataony hoe: «Koa nahoana no tsy ninoanareo i Jôhany?»

⁶Raha lazaintsika hoe: «Olombelona no naniraka azy», dia indray hitora-bato hamono antsika ny vahoaka, satria nekeny ho mpaminanin’Andriamanitra i Jôhany.

⁷Ka hoy ny navaliny an’i Jesoa hoe: — Tsy hitanay izay holazaina ny amin’izany!

⁸Dia hoy i Jesoa taminy: — Izaho koa mba tsy hilaza aminareo izay fahefana anaovako an’izao zavatra izao.

⁹Dia nitodika tamin’ny vahoaka kosa i Jesoa nanao izao fanoharana izao: — Nisy lehilahy nanamboatra tanimboaloboka[150] ka nampanofa azy tamina mpamboly ary lasa niorim-ponenana any an-tany hafa.

¹⁰Nony tonga ny taom-piotazana dia nanirahany mpiasa ireo mpamboly, hiangavy azy ireo hanome ampahany amin’ny vokatry ny tanimboaloboka; kanjo nokapohin’ireo mpamboly ilay mpiasa ary nalefany nody maina.

¹¹Dia nanirahany mpiasa fanindroany, fa io koa nokapohin’ireo mpamboly sy notevatevainy ary nalefany nody maina.

¹²Dia mbola nanirahany mpiasa fanintelony; io indray koa nataon’ireo mpamboly naratra, izay vao noroahiny.

¹³Ary hoy ny tompon’ny tanimboaloboka: «Inona re no hataoko? Ndeha hirahiko ity zanako malalako, fa angamba izy hananan’ireo hena-maso!»

¹⁴Vao nahita azy kosa ireo mpamboly, dia niara-nidinika sady nifampiresaka hoe: «Ny mpandova ity; aoka hovonointsika mba hahazoantsika ny lova.»

¹⁵Dia natosiny tany ivelan’ny tanimboaloboka ilay io ka novonoiny. Dia nofaranan’i Jesoa hoe: — Inona àry no hataon’ny tompon’ny tanimboaloboka amin’ireo mpamboly?

¹⁶Ho avy izy ka haringany ireo mpamboly ireo ary homeny olon-kafa ny tanimboaloboka. Raha nandre izany ireo mpanohitra an’i Jesoa, dia niteny hoe: — Sanatria izany!

¹⁷Fa nojeren’i Jesoa ry zareo sady nataony hoe: — Inona àry no dikan’ity andinin’ny Soratra Masina ity: «Ny vato nolavin’ny mpanao trano no nanjary vato fehizoro[151]»?

¹⁸Izay rehetra mianjera amin’izany vato izany dia ho torotoro, ary izay ianjerany kosa ho montsamontsana.

¹⁹Nitady hisambotra an’i Jesoa tamin’izay ireo mpahay lalàna sy lohandoha-mpisorona, satria nahatsiaro tena ho niantefan’iny fanoharana nataony iny. Saingy natahotra ny vahoaka ry zareo.

²⁰Ary nataon’ireo mpanohitra Azy andrimaso i Jesoa. Olona mihatsaravelatsihy miseho ho olo-marina no nalefany hamandrika an’i Jesoa amin’ny teniny ka hanolorany Azy eo am-pelatanan’i Pilato governora, mba hotsaraina sy hohelohina.

²¹Dia nanontanian’ireo iraka i Jesoa nataony hoe: — Mpampianatra ô, fantatray fa mahitsy fiteny sy fampianatra Ianao sady tsy mizaha tavan’olona fa mampianatra tsotra ny lalana soritan’Andriamanitra.

²²Koa azonay atao ve ny mandoa hetra ho an’ny amperôra rômanina sa tsia?

²³Takatr’i Jesoa anefa ny hafetsen-dratsin’ireo ka hoy Izy taminy:

²⁴— Itondray vola denàry anankiray aho! Sarin’iza ary anaran’iza no mipetaka eo? Dia novalian’ireo hoe: — An’ny amperôra rômanina!

²⁵Ka hoy i Jesoa taminy: — Avereno amin’ny amperôra rômanina izay an’ny amperôra rômanina ary amin’Andriamanitra izay an’Andriamanitra.

²⁶Sady tsy afa-namandrika an’i Jesoa tamin’ny teny teo imason’ny vahoaka ireto iraka no gaga tamin’ny valin-teny nataony ka kepoka nangina.

²⁷Ireo Tsadoseanina, izay milaza fa tsy misy fitsanganan’ny maty[152] ho velona, dia mba nisy koa nanatona an’i Jesoa, ka nanontany Azy

²⁸hoe: — Mpampianatra ô, izao no didy voasoratra nomen’i Mosesy antsika: «Raha misy lehilahy maty mbola velom-bady nefa tsy nanan-taranaka, dia aoka ny rahalahiny hampakatra an-dravehivavy, ka hiteraka hamela solofo ho an’ny maty[153].»

²⁹Koa nisy àry olona fito mirahalahy. Nampaka-bady ny lahimatoa, kanjo maty tsy nanan-taranaka.

³⁰Nampakatra an-dravehivavy ny faharoa,

³¹ary koa ny fahatelo; torak’izany avokoa izy fito mirahalahy, samy maty tsy namela taranaka.

³²Farany maty koa ravehivavy.

³³Amin’ny fitsanganan’ny maty ho velona àry, mba ho vadin’iza ravehivavy fa efa samy nanambady azy avokoa izy fito mirahalahy?

³⁴Dia hoy i Jesoa tamin’ireo Tsadoseanina: — Ny olona amin’izao fiaina-mandalo izao no mampakatra sy ampakarina.

³⁵Fa ireo nataon’Andriamanitra mendrika hitsangana velona avy any amin’ny maty sy handray anjara amin’ny fiainan-ko avy dia tsy mba mampakatra na ampakarina:

³⁶tsy mety maty intsony manko fa tahaka ny anjely; sady zanak’Andriamanitra satria olona efa nataony mendrika hitsangana velona.

³⁷Ny amin’ny hoe hitsangana velona ny maty dia efa nambaran’i Mosesy ao amin’ny toko momba ny Roimemy izany, fony izy niantso ny Tompo hoe: «Andriamanitr’i Abrahama sy Andriamanitr’i Itsehàka ary Andriamanitr’i Jakôba[154].»

³⁸Ny Tompo dia tsy Andriamanitry ny maty fa Andriamanitry ny velona[155], satria ny Tompo no ahaveloman’izy rehetra.

³⁹Dia niteny ny sasany tamin’ny mpahay lalàna nanao hoe: — Mpampianatra ô, marina ny filàzanao!

⁴⁰Ary tsy nisy olona sahy nanontany an’i Jesoa intsony.

⁴¹Hoy kosa i Jesoa tamin’ireto mpahay lalàna: — Ahoana no ilazana fa hoe Zanak’i Davida ny Mesia?

⁴²Ny tenan’i Davida manko no milaza ao amin’ny bokin’ny Salamo hoe: «Ny Tompo Andriamanitra dia niteny hentitra tamin’ny Mpanjaka Tompoko hoe: Mipetraha amin’ny sezafiandrianana eto ankavanako;

⁴³Izaho kosa hanao ny fahavalonao ho fitoeran-tongotrao[156].»

⁴⁴Antsoin’i Davida hoe Tompoko ny Mesia araka izany, ka ahoana no maha Zanany Azy?

⁴⁵Raha mbola mihaino Azy eo ny vahoaka rehetra, dia hoy i Jesoa tamin’ny mpianany:

⁴⁶— Mitandrema amin’ireo mpahay lalàna. Ny tiany dia ny mandehandeha eny amin’ny lala-mitafon’ny tempoly, ny ankamamiany dia ny arahabaina eny an-kianja sy ny mipetraka eny aloha ao amin’ny sinagôga ary ny maka ny toeram-boninahitra any amin’ny fanasana.

⁴⁷Ataony tapitra ny fananan’ny mpitondratena ary vavaka lavareny no mody ataony hisehosehoana: ireny olona ireny dia hohelohina mafimafy kokoa.