Read DIEM PROTESTANTA Deoterônômy 30 Bible Online

Deoterônômy 30 - DIEM PROTESTANTA bible

Deoterônômy 30

¹Ho tonga aminareo izany zavatra rehetra izany, dia ny fampanantenàm-pitahiana sy fanambaràn-doza izay nataoko teo anoloanareo[205]. Ary any amin’ny firenena rehetra handroahan’ny TOMPO Andriamanitrareo anareo, dia hotsarovanareo ao am-ponareo izany,

²ka hiverina amin’ny TOMPO Andriamanitrareo ianareo; eny, hanaiky Azy ianareo sy ny taranakareo, hanaiky Azy amin’ny fonareo manontolo sy amin’ny fanahinareo manontolo araka ny didy rehetra izay ampitaiko aminareo anio.

³Dia haverin’ny TOMPO Andriamanitrareo amin’ny fiainanareo taloha ianareo[206] sady hamindrany fo, ka hangoniny indray avy any amin’ny firenena rehetra nampielezany anareo.

⁴Na misy voaroaka any am-paran’ny tany aza ianareo, dia avy any no hangalan’ny TOMPO Andriamanitrareo azy sy hanangonany azy

⁵mba hampidiriny ao amin’ny tany izay fananan’ny razambenareo ka ho fanananareo koa. Hanisy soa anareo ny TOMPO Andriamanitrareo ary hahamaro isa anareo, mihoatra noho ny nataony tamin’ny razambenareo;

⁶dia hodiovin’ny TOMPO Andriamanitrareo ny fonareo sy ny fon’ny taranakareo hitiavanareo AZY amin’ny fonareo manontolo sy amin’ny fanahinareo manontolo, mba ho velona ianareo.

⁷Ary hampiharin’ny TOMPO Andriamanitrareo amin’ny fahavalo mpankahala sy mpanenjika anareo ireny ozona rehetra ireny.

⁸Dia hanaiky ny TOMPO indray ianareo ka hanatanteraka ny didiny rehetra izay ampitaiko aminareo anio.

⁹Ary hataon’ny TOMPO Andriamanitrareo manana amby ampy ny soa hafafiny aminareo: hambininy avokoa ny asanareo; ho maro anaka ianareo; ho maro taranaka ny biby fiompinareo; ary hiavosa ny vokatry ny taninareo. Araka izay nifalian’ny TOMPO nanasoa ny razambenareo no hifaliany hanasoa anareo koa,

¹⁰satria manaiky ny TOMPO Andriamanitrareo ianareo ka mitandrina ny didy aman-dalàny, izay voasoratra amin’ity bokin’ny Lalàna ity, ary satria iverenanareo amin’ny fonareo manontolo sy amin’ny fanahinareo manontolo ny TOMPO Andriamanitrareo.

¹¹Fa izao didy ampitaiko aminareo izao dia tsy saro-pantarina aminareo na ivelan’ny takatrareo.

¹²Tsy any an-danitra[207] izany ka hanaovanareo hoe: «Iza no hiakatra any an-danitra haka azy ho antsika sy hampahafantatra azy antsika mba hotanterahintsika?»

¹³Tsy any ampitan’ny ranomasina izany ka hanaovanareo hoe: «Iza no hiampita ny ranomasina haka azy ho antsika sy hampahafantatra azy antsika mba harahintsika?»

¹⁴Fa eo akaikinareo tokoa ny teny, dia eo am-bavanareo sy ao am-ponareo, mba harahinareo.

¹⁵Ry Israelita, indro ataoko eo anoloanareo anio ny fiainana sy ny soa ankilany ary ny fahafatesana sy ny loza andaniny.

¹⁶Raha ankatoavinareo ny didin’ny TOMPO Andriamanitrareo, izay ampitaiko aminareo anio, ka hotiavinareo[208] Izy sy hizoranareo ny sori-dalany ary hotandremanareo ny didy aman-dalàny mbamin’ny fitsipiny, dia ho velona ianareo ka hihamaro, ary hotahîn’ny TOMPO Andriamanitrareo any amin’ny tany izay hidiranareo mba halainareo ho fananana.

¹⁷Fa raha mivily kosa ny fonareo, ka tsy mankatò ny TOMPO ianareo fa voataona hiankohoka eo anatrehan’ny andriamani-kafa sy hanompo azy,

¹⁸dia ambarako aminareo dieny izao fa ho ringana tokoa ianareo, ary tsy ho maro andro eo amin’ny tany izay hidiranareo mba halainareo ho fananana, rehefa tafita ny ony Jôrdàna ianareo.

¹⁹Miantso ny tany amana habakabaka aho anio ho vavolombelona aminareo fa ataoko eo anoloanareo ny fiainana sy ny fahafatesana ary ny fitahiana sy ny ozona: koa fidio ny fiainana, mba ho velona ianareo sy ny taranakareo.

²⁰Tiavo ny TOMPO Andriamanitrareo ka ekeo sy ifikiro, fa izany no hahavelona anareo sy hahamaro ny andro honenanareo any amin’ny tany izay nianianan’ny TOMPO tamin’i Abrahama sy i Itsehàka ary i Jakôba razambenareo fa homena azy[209].