Read DIEM PROTESTANTA Deoterônômy 31 Bible Online

Deoterônômy 31 - DIEM PROTESTANTA bible

Deoterônômy 31

¹Dia avy indray i Mosesy nampita ireto teny ireto tamin’ny Israelita ka nanao taminy hoe:

²— Feno 120 taona androany aho ka tsy afa-misahana ny andraikitra fitarihana anareo intsony; sady ny TOMPO efa nilaza tamiko hoe: «Tsy hita io Jôrdàna io ianao!»

³Ny TOMPO Andriamanitrareo mihitsy no hita eo alohanareo, Izy no handringana ireo firenena ireo tsy ho eo anoloanareo, mba hahazoanareo ny taniny; ary i Josoa mihitsy no hita eo alohanareo araka izay efa voalazan’ny TOMPO.

⁴Tahaka ny nataon’ny TOMPO tamin’i Sihôna sy i Hôga, mpanjaka amôrita, izay naringany mbamin’ny taniny, no hataony amin’ireo firenena ireo koa[210].

⁵Hatolotry ny TOMPO eo anoloanareo ireo ka araka ny didy nampitaiko manontolo taminareo no hataonareo aminy.

⁶Mahereza sy matanjaha! Aza matahotra na manahy an’ireo firenena ireo, satria ny TOMPO Andriamanitrareo no miara-mandeha aminareo ary tsy handao anareo na hahafoy anareo.

⁷Dia nantsoin’i Mosesy i Josoa ka nitenenany teo imason’ny Israelita rehetra hoe: — Mahereza sy matanjaha, satria ianao sy ity vahoaka ity dia hiara-miditra ao amin’ny tany izay nianianan’ny TOMPO fa homena ny razambenareo; ary ianao no hizara izany tany izany ho fananan’ity vahoaka ity.

⁸Ny TOMPO mihitsy no handeha eo alohanao, Izy no hiaraka aminao ary tsy handao anao na hahafoy anao[211]; koa aza matahotra na mivadi-po ianao.

⁹Dia nataon’i Mosesy an-tsoratra izany Lalànan’Andriamanitra izany, ka natolony tamin’ireo mpisorona, taranak’i Levỳ, dia ireo mpitondra ny Vatamasina mirakitra ny Fanekempihavanan’ny TOMPO, ary koa tamin’ireo rehetra loholon’i Israely.

¹⁰Dia nanome didy azy i Mosesy ka nanao hoe: — Isaky ny fito taona, amin’ny taona famotsoran-trosa, mandritra ny fankalazana ny Tranotomboka[212], no hamakianareo ny teny raketin’ity Lalàna ity. Amin’izay ny Israelita rehetra ho tonga hiseho eo anatrehan’ny TOMPO Andriamanitrareo any amin’ny toerana hofidiny, ka aoka ity Lalàna ity hovakînareo aminy mba hohenoiny.

¹²Vorio ny vahoaka rehetra, na lehilahy, na vehivavy, na ankizy madinika, ary na dia ny vahiny ao an-tanànanareo aza, mba hihainoany sy hianarany izany ka hanajany ny TOMPO Andriamanitrareo sy himasoany hanatanteraka ny teny rehetra raketin’ity Lalàna ity.

¹³Ny zaza izay tsy mbola mahalala ity Lalàna ity, dia mba handre izany ka hianatra hanaja ny TOMPO Andriamanitrareo amin’ny andro rehetra hiainanareo eo amin’ny tany izay efa hidiranareo mba halainareo ho fananana, rehefa tafita ny ony Jôrdàna ianareo.

¹⁴Dia hoy ny TOMPO tamin’i Mosesy: — Indro antomotra ny andro hahafatesanao; koa antsoy i Josoa, ary tongava eo anoloan’ny Tranolay fihaonana ianareo mba hameperako azy. Dia nandeha nankeo anoloan’ny Tranolay fihaonana ry i Mosesy sy i Josoa

¹⁵ka nisehoan’ny TOMPO tamin’ny andry rahona[213]; ary nijanona teo anoloan’ny varavaran’ny Tranolay izany andry rahona izany.

¹⁶Dia hoy ny TOMPO tamin’i Mosesy: — Indro hodimandry any amin’ny razanao ianao; ary ity vahoaka ity kosa hiainga hanompo sampy ka hanaraka andriamani-kafa tompoina any amin’ny tany izay efa hidirany honenana. Hilaozany Aho ary hivadihany ny fanekempihavanana izay nataoko taminy.

¹⁷Dia hirehetan’ny fahatezerako amin’izany andro izany ity vahoaka ity ka hilaozako ary hanafenako ny tavako; hataon’ny olona levona izy sady hianjadian’ny loza amam-pahoriana maro. Amin’izany andro izany no hitenenan’ny Israelita hoe: «Noho Andriamanitra tsy eto aminay no mahatonga anay hianjadian’izao fahoriana izao!»

¹⁸Eny, hafeniko aminy tokoa ny tavako amin’izany andro izany noho ny ratsy rehetra izay nataony tamin’ny niviliany hanaraka andriamani-kafa.

¹⁹Ary ankehitriny, aoka hisy hanoratra izao tononkira hampitaiko aminareo izao[214]; ka ianao, ry Mosesy, no mampianara azy amin’ny Israelita. Ary aoka tsy ho afaka am-bavan’ny Israelita izany tononkira izany mba ho vavolombelona hiampangako azy.

²⁰Any amin’ny tany izay nampanantenaiko ny razambeny manko, dia ilay tany tondra-dronono sy tantely[215], no hitondrako ity vahoaka ity; ary hanan-kohanina izy ka ho voky sy hihamatavy, dia hivily hanaraka andriamani-kafa sy hanompo azy, ary hotsiratsirainy Aho ka hivadihany ny fanekempihavanana.

²¹Rehefa hianjadian’ny zava-dratsy amam-pahoriana maro ity vahoaka ity, dia ho vavolombelona hiampanga azy izao tononkira izao, satria tsy ho afaka eo am-bavan’ny taranany. Fantatro manko ny fisainany, na dia izao ankehitriny alohan’ny hitondrako azy any amin’ny tany izay nianianako homena azy izao aza.

²²Dia nataon’i Mosesy an-tsoratra androtrizay ihany izany tononkira izany ka nampianariny ny Israelita.

²³Avy eo dia nofeperan’ny TOMPO i Josoa, zanakalahin’i Nona, ka nilazany hoe: — Mahereza sy matanjaha; fa ianao no hitondra ny Israelita hiditra ao amin’ny tany izay nianianako taminy homena azy, Izaho mihitsy no hiaraka aminao[216].

²⁴Rehefa voasoratr’i Mosesy tao anaty boky avokoa ny teny raketin’ity Lalàna ity,

²⁵dia nofeperany ny Levita, izay mpitondra ny Vatamasina mirakitra ny fanekempihavanan’ny TOMPO ka nataony hoe:

²⁶— Raiso ity bokin’ny Lalàna ity, ka apetraho ao anilan’ny Vatamasina mirakitra ny fanekempihavanan’ny TOMPO Andriamanitrareo; ka ho eo hatrany izany boky izany mba ho vavolombelona hiampanga ny Israelita.

²⁷Fantatro fa maditra sy mafy hatoka ireo; izao ankehitriny mbola velona eto aminy izao aza aho, dia efa nikomy tamin’ny TOMPO ireo, ka mainka rehefa maty aho.

²⁸Vorio eto amiko ny loholona sy mpifehy rehetra isam-poko, mba hilazako mivantana izao teny izao; ary hantsoiko ny tany aman-danitra mba ho vavolombelona aminy.

²⁹Fantatro fa rehefa maty aho, dia hihasimba tokoa ny Israelita ka hiala amin’ny sori-dalana izay nasaiko hizorany; dia ho tratry ny loza ireo, any am-parany any, satria hanao izay ratsy eo imason’ny TOMPO ireo ka hampahatezitra Azy amin’ny asany.

³⁰Avy eo dia nolazain’i Mosesy mivantana tamin’ny Israelita rehetra tafavondrona teo izao tononkira manontolo izao: