Read DIEM PROTESTANTA Deoterônômy 32 Bible Online

Deoterônômy 32 - DIEM PROTESTANTA bible

Deoterônômy 32

¹Mihainoa, ry lanitra fa hiteny aho; ny tany mandrenesa ny lazain’ny vavako.

²Ny anatro anie hitosaka toy ny orana, dia toy ny oram-batravatra amin’ny vilona; ny teniko anie hirotsaka toy ny ando, dia toy ny erikerika amin’ny ahi-maitso.

³Miantso ny anaran’ny Tompo aho; ry Israelita, ekeo fa lehibe ny Andriamanitsika!

⁴Ny TOMPO no Vatolampy: lavorary ny asany; ny sori-dàlany rehetra rariny avokoa. Andriamanitra mahatoky Izy, tsy misy ratsy eo aminy: marina sy mahitsy Izy.

⁵Nanjary simba ianareo, ka tsy zanany intsony fa feno tsiny; taranaka melo-tsaina sady mpivadibadika[217].

⁶Moa izany no tokony ho navalinareo ny TOMPO, ry vahoaka adala, tsy misy fahendrena? Moa tsy Izy no Rainareo, ka fananany ianareo? Tsy Izy ve no nanao sy nampiorina anareo?

⁷Tsarovy ny andro fahiny, saino ny taona fahagola. Anontanio ny rainareo sy loholonareo fa hanambara sy hitantara aminareo.

⁸Raha nanome zaratany an’ireo firenena ilay Avo ka nampiely ny taranak’olombelona, dia nozarazarainy am-paritany ireny araka ny isan’ireo anjely[218]:

⁹Anjaran’ny TOMPO kosa ilay vahoakany; ny taranak’i Jakôba no natokany ho fananany.

¹⁰Tany an-taniefitra no nanangonany azy, dia tany amin’ny tany foana misy bibidia mierona. Koa nokarakarainy izy, nokolokoloiny, notandremany tahaka ny anakandriamasony.

¹¹Mova Izy tsy ny voromahery mitaona ny zanany hisidina ka manaitaitra azy eo ambonin’ny akaniny. ary mamelatra ny elany handraisany ny reraka mba hitondrana azy eo ambonin’ny elany?

¹²Ny TOMPO irery no nitarika ny vahoakany; tsy nisy andriamani-kafa niaraka taminy.

¹³Nakariny teo an-tendron-kavoan’ilay tany izy, nampihinaniny ny vokatry ny saha, nampitsentsefiny tantely teny an-tsefatsefa-bato, sy nomeny menaka avy amin’ny faritra vatoana;

¹⁴novokisany mena-drononon’omby, sy rononon’ondry aman’osy izy, nofahanany henan-janakondry sy ondrilahy matavy aman’osilahy ary notolorany vary tsara indrindra sy ranom-boaloboka ho divay fisotro.

¹⁵Koa nihinana ny taranak’i Jakôba, ka voky; nihanatavy i Jesoròna[219], ka namely daka. Eny, tonga natavy izy, vory nofo sy dongadonga ka nandao an’Andriamanitra Izay nanao azy ary nanamavo an’ilay Vatolampy famonjena azy.

¹⁶Andriamani-kafa no nampitoviny lanja tamin’ny Tompo, zava-maharikoriko no naniratsirany Azy;

¹⁷ny nanolorany sorona dia lolo izay tsy andriamanitra akory[220] sady andriamanitra tsy fantany, andriamani-baovao niseho tatỳ aoriana sady tsy nohajain’ny razany.

¹⁸«Tsy raharahainao, ry Israely, ilay Vatolampy niteraka anao; hadinonao ilay Andriamanitra nahitanao masoandro.»

¹⁹Hitan’ny TOMPO ka nampisafoaka Azy ny zanany izay naniratsira Azy;

²⁰dia hoy Izy hoe: «Hanafenako tava ireo, dia ho hitako izay hiafarany fa taranaka mpivadibadika sy zaza tsy mahatoky.

²¹Ireo no nampitovy lanja Ahy tamin’andriamani-tsiizy sy naniratsira Ahy tamin’ny sampy tsinontsinona. Izaho kosa hampitovy lanja azy amin’izay tsy vahoaka akory; firenena adala no hampanaratsiako azy[221].

²²Nirehitra ny afon’ny fahatezerako ka nandoro ny toeran’ny maty, hatrany amin’ny farany ambany sy nandevona ny tany mbamin’ny vokatra ao aminy ary nampirehitra ny fanambanin’ny tendrombohitra. HEAVEN-THE DWELLING PLACE OF GOD — NY LANITRA-TOERAM-PONENAN’ANDRIAMANITRA THE WATER ABOVE THE VAULT — NY RANO AMBONIN’NY HABAKABAKA VAULT OF HEAVEN — NY HABAKABAKA ANDOHALAMBON’NY LANITRA EARTH — NY TANY Pillars of the sky (2) — Andry fanorenan’ny lanitra (2) Pillars of the earth (3) — Andry fanorenan’ny tany (3) Sheol — Toeran’ny maty The Abyss of waters (2) — Ranolalimbe Early conception of the universe — Fiheverana fahagola ny amin’ny firafitr’izao tontolo izao (Deôterônômy 32.22) [NEB 148]

²³Havangongoko amin’ny Israelita ny loza ary holanîko aminy ny zana-tsipîkako;

²⁴hofezahin’ny mosary ireo sady holevon’ny tazo sy ny areti-mandripaka[222]; ary halefako hamely azy ny biby masiaka mbamin’ny bibilava misy poizina.

²⁵Eny ivelany, dia ny sabatra no handringana; ao an-trano, dia ny tahotra no hahafaty. Ka samy hiharan’izany avokoa na zatovolahy na zatovovavy na zazakely na beantitra.»

²⁶«Nokasaiko haparitaka ireo ka ho foana eo amin’ny olombelona ny fahatsiarovana azy,

²⁷raha tsy ny fahavalo hirehaka no natahorako; mety diso hevitra manko ny mpandrafy azy ka hiteny hoe: ‹Ny tananay no nahery, fa tsy ny TOMPO velively no nanao izany.›

²⁸Firenena[223] tsy misaina i Israely sady tsy manam-pahalalana.

²⁹Raha mba hendry ireo dia ho nahalala izao sy ho nahafantatra ny hiafarany:

³⁰Fahavalo iraika lahy ve hahenjika Israelita arivo? Fahavalo roa lahy ve hampandositra Israelita iray alina? Eny, raha Izaho TOMPO, ilay Vatolampy ianteherany, no efa nanolotra azy ho eo am-pelatanan’ny fahavalony.

³¹Na ny fahavalony aza no mitsara, dia miaiky fa tsy mitovy amin’ilay Vatolampy ianteheran’i Israely ny vatolampy izay mba ianteherany[224].

³²Tahaka an’i Sôdôma sy i Gômôra[225] ihany ireo fahavalon’i Israely: tahom-boaloboka mamokatra voaloboka mahafaty sy sampaho mangidy.

³³Ny divainy dia toy ny zava-mahafaty avy amin’ny dragona ary toy ny poizina mahery avy amin’ny menarana.

³⁴Voatahiry ato amiko izany nafitsok’ireo izany sady voaisy tombokase ato an-trano firaketako:

³⁵Ahy ny famaliana sy ny fampanodiavana[226] raha avy izay hahasolafaka ny tongony fa antomotra ny andro hahitany loza ary ho avy faingana ny anjara voatendry ho azy.»

³⁶Eny, homen’ny TOMPO rariny tokoa ny vahoakany rehefa hitany fa lany hery; hohasoaviny indray ireo manompo Azy rehefa hitany fa tsy misy ianteherany intsony[227].

³⁷Amin’izay i Israely hitenenan’ny Tompo hoe: «Aiza ireo andriamani-kafa nataonareo ho vatolampy fialofana?

³⁸Ireo no nihinana ny sabora soronareo sy nisotro ny divay fanatitrareo. Aoka ireo hitsangana hamonjy anareo ary ho fierena ho anareo!

³⁹Fantaro ankehitriny fa Izaho ihany no Andriamanitra ary tsy misy andriamani-kafa miolotra amiko: Izaho no mahafaty sy mahavelona, Izaho no maharatra sy mahasitrana, ary tsy misy mahafaka olona eo am-pelatanako.

⁴⁰Manangan-tanana amin’ny lanitra Aho, ka mianiana hoe: ‹Velona mandrakizay Aho,

⁴¹ka horanitiko hanelatselatra ny sabatro, harangarangan’ny tanako ny famaizana, dia hovaliako ny mpandrafy Ahy ary hampanodiaviko ny mpankahala Ahy ny ataony.

⁴²Hataoko vonton-dra ny zana-tsipîkako, dia ny ran’ireo voavono sy voababo; hotrebotrebonin’ny sabatro ny nofo mbamin’ny loha lavavolon’ny fahavalo›!»

⁴³Ry hafa firenena, hobio ilay vahoakan’Andriamanitra! Fa valian’ny TOMPO ny nahafatesan’ny mpanompony; eny, valiany tokoa ireo mpandrafy Azy, ary avotany kosa ny taniny mbamin’ny vahoakany[228].

⁴⁴I Mosesy dia niaraka tamin’i Josoa[229], zanakalahin’i Nona, no tonga nilaza manontolo ho ren’ny vahoaka izany tononkira izany.

⁴⁵Nony tapitra voalazany avokoa tamin’ny Israelita rehetra ireo teny ireo,

⁴⁶dia hoy i Mosesy taminy: — Araiketo ao am-ponareo ny teny rehetra izay ambarako hiampangana anareo anio; didio ny taranakareo mba himasoany hotanterahina ny teny rehetra raketin’ity Lalàna ity.

⁴⁷Tsy zava-poana ho anareo izany fa fiainanareo; izany teny izany no hahamaro andro anareo any amin’ny tany izay efa halainareo ho fananana, rehefa tafita an’i Jôrdàna ianareo.

⁴⁸Androtrizay koa no nitenenan’ny TOMPO tamin’i Mosesy hoe:

⁴⁹— Mankanesa ianao amin’itsy tandavan-tendrombohitra Habarîma itsy, izay ao amin’ny faritany Môaba, tandrifin’i Jerikao, dia miakara eo an-tampon’ny tendrombohitra Nebao: ary tazano ny tany Kanahàna izay omeko ny Israelita ho fananany.

⁵⁰Dia aoka ianao ho faty eo an-tampon’io tendrombohitra hiakaranao io ka ho voaangona any amin’ny razanao, tahaka ny nahafatesan’i Aharôna rahalahinao tany an-tampon’ny tendrombohitra Hôra sy nanangonana azy tany amin’ny razany[230].

⁵¹Ianao sy i Aharôna manko dia diso tamiko teo anatrehan’ny Israelita, teo amin’ny ranon’i Meribà any Kadesy, tao an-taniefitra Tsina; tamin’izay no tsy nanehoanareo ny fahamasinako teo anatrehan’ny Israelita[231].

⁵²Eny, avy lavitra no hitazananao ny tany izay omeko ny Israelita, kanefa tsy hiditra ao ianao[232].