Read DIEM PROTESTANTA Deoterônômy 6 Bible Online

Deoterônômy 6 - DIEM PROTESTANTA bible

Deoterônômy 6

¹Izao no didy sy lalàna amam-pitsipika, nasain’ny TOMPO Andriamanitrareo hampianarina hotanterahinareo any amin’ny tany izay hiampitanareo mba halainareo ho fananana.

²Ny tanjona kendrena, ho an’ny andro rehetra iainanareo, dia ny hanajanareo ny TOMPO Andriamanitrareo ka hitandremanareo ny lalànany sy didiny rehetra izay ampitaiko aminareo sy amin’ny taranakareo mba ho maro andro ianareo.

³Henoy izany, ry vahoaka Israely, ary imasoy ny hanatanteraka azy, mba ho sambatra sy hitombo isa ianareo any amin’ilay tany tondra-dronono sy tantely[46], araka izay nampanantenain’ny TOMPO Andriamanitry ny razambenareo taminareo.

⁴«Mihainoa, ry vahoaka Israely: Ny TOMPO Andriamanitsika no TOMPO tokana[47].

⁵Koa tiavo ny TOMPO Andriamanitrao amin’ny fonao manontolo sy amin’ny fanahinao manontolo ary amin’ny herinao manontolo[48].

⁶Aoka haraikitrao ao am-ponao izao didy ampitaiko anao anio izao.

⁷Dia ampianaro tsara ny zanakao izany; ary resaho na mipetraka ao an-tranonao ianao na mandeha eny an-dalana, na mandry ianao na mifoha.

⁸Mba ho fampahatsiahivana anao, dia ataovy amin’ny boaty famehy eny amin’ny hato-tananao na eny an-kandrinao ireny,

⁹ary soraty eo amin’ny tolàm-baravaran’ny tranonao na eo amin’ny vavahadin’ny tanànanao[49].»

¹⁰Rehefa izay ianareo hampidirin’ny TOMPO Andriamanitrareo any amin’ny tany nianianany tamin’i Abrahama sy i Itsehàka ary i Jakôba razambenareo fa homeny anareo,

¹¹dia hahita tanàna lehibe sady tsara izay tsy ianareo no nanorina azy, sy lavaka famorian-drano izay tsy ianareo no nandavaka azy, ary saham-boaloboka aman’ôliva izay tsy ianareo no namboly azy; ka hihinana sy hivoky ianareo.

¹²Amin’izay, dia tandremonareo fandrao hadinoinareo ny TOMPO Izay nampiala anareo tany Ejipta, toera-nanandevozana anareo.

¹³Ilay TOMPO Andriamanitrareo ihany no hohajainareo, Izy no hotompoinareo, ary ny anarany no aoka hianiananareo.

¹⁴Aza manaraka andriamani-kafa amin’ireny andriamanitry ny firenena manodidina anareo ireny,

¹⁵satria Andriamanitra saro-piaro amin’ny maha Andriamanitra Azy ilay TOMPO Andriamanitrareo Izay eo afovoanareo. Koa tandremo fandrao hirehitra aminareo ny fahatezeran’ilay TOMPO Andriamanitrareo ka hofongorany tsy ho eto ambonin’ny tany ianareo.

¹⁶Aza maka fanahy ny TOMPO Andriamanitrareo ianareo, tahaka ny nataonareo tany Masà[50].

¹⁷Tandremo tsara ny didy sy baiko aman-dalàna izay efa nampitain’ny TOMPO Andriamanitrareo taminareo.

¹⁸Tanteraho izay mahitsy sady tsara eo imason’ny TOMPO mba ho sambatra ianareo sy hiditra hahazo ny tany soa izay tamim-pianianana no nampanantenan’ny TOMPO azy ny razambenareo;

¹⁹ary dia horoahinareo lavitra anareo avokoa ny fahavalonareo, araka izay voalazan’ny TOMPO.

²⁰Rahatrizay ny zanakareo hanontany anareo hoe: «Inona no anton’ireo baiko sy lalàna amam-pitsipika izay efa nandidian’ny TOMPO Andriamanitsika anareo?»,

²¹dia hovalianareo hoe: «Nandevozin’ny Farao tany Ejipta isika, ary fahefana mahery no nampialan’ny TOMPO antsika tany.

²²Famantarana sy zava-mahagaga goavana sady mandoza no nataon’ny TOMPO teo imasontsika hamelezana ny Farao mbamin’ny ankohonany sy ny Ejiptianina.

²³Isika kosa nampialany tany Ejipta mba hampidirina eto homena ilay tany izay nampanantenainy ny razambentsika tamim-pianianana.

²⁴Nodidian’ny TOMPO isika hanatanteraka ireo lalàna rehetra ireo sy hanaja Azy TOMPO Andriamanitsika, mba ho sambatra lalandava sy ho velona aina tahaka ny amin’izao anio izao.

²⁵Ary ho toetra marina ny antsika raha imasoantsika ny hanatanteraka manontolo izany didy izany eo anatrehan’ny TOMPO Andriamanitsika, araka izay nampitainy tamintsika[51].