Read DIEM PROTESTANTA Jôhany 1 Bible Online

Jôhany 1 - DIEM PROTESTANTA bible

Jôhany 1

¹Tamin’ny voalohany, fony nahary an’izao tontolo izao Andriamanitra, dia efa nisy ilay Teny; ilay Teny dia nitodika tany amin’Andriamanitra hatrany, ary ilay Teny dia Andriamanitra.

²Tamin’ny voalohany, dia nitodika tany amin’Andriamanitra ilay Teny[1];

³Izy no naharian’Andriamanitra ny zavatra rehetra, ka raha tsy teo Izy dia tsy nisy ary ny zavatra noarîna[2].

⁴Ilay Teny no nirakitra ny aina[3], ary io aina io no nitondra fahazavana ho an’ny olombelona.

⁵Ary ny fahazavana dia mamirapiratra anatin’ny haizina, ka tsy nahasakana azy ny haizina[4].

⁶Nisy lehilahy anankiray nirahin’Andriamanitra: i Jôhany[5] no anarany.

⁷Tonga hijoro ho vavolombelona i Jôhany, dia vavolombelona hanambara ilay fahazavana; ka ny hafatra nampitain’i Jôhany no hampino ny olona rehetra.

⁸Tsy hoe i Jôhany no fahazavana, fa izy no ho vavolombelona hanambara ny fahazavana.

⁹Ilay Teny no tena fahazavana tonga amin’izao tontolo izao sady manazava ny olombelona rehetra.

¹⁰Teo amin’izao tontolo izao ilay Teny; ary Izy no nahariana an’izao tontolo izao, nefa izao tontolo izao[6] dia tsy nahalala Azy.

¹¹Tonga teo amin’ny taniny[7] Izy, fa tsy noraisin’ny mpiray firenena aminy.

¹²Kanefa izay rehetra nandray Azy ary nino Azy, dia nomeny fahefana ho tonga zanak’Andriamanitra[8]:

¹³izy ireo dia nateraka tsy araka ny fomban’olombelona miankina amin’ny sitrapon-dehilahy, fa araka ny fomban’Andriamanitra.

¹⁴Ilay Teny dia tonga olombelona, ka niara-nonina taminay. Feno fahasoavana sy fahamarinana Izy ary hitanay ny voninahiny[9], dia voninahitra avy amin’ny Ray ho an’ny Zanaka lahitokana.

¹⁵Vavolombelona manambara Azy i Jôhany ka niantso mafy hoe: — Izy no Ilay voalazako hoe: «Ilay tamy aoriako dia lehibe noho izaho, satria efa nisy talohako[10].»

¹⁶Feno harem-pahasoavana ilay Teny ka nandraisantsika rehetra fahasoavana tovozin-tsy ritra:

¹⁷satria ny lalàna dia nomen’Andriamanitra tamin’ny alalan’i Mosesy[11], fa ny fahasoavana sy ny fahamarinana kosa dia tonga tamin’ny alalan’i Jesoa Kristy.

¹⁸Tsy nisy nahita an’Andriamanitra na oviana na oviana[12]; fa ny Zanaka lahitokana, Izay Andriamanitra sy miombona tanteraka amin’ny Ray, no efa nanambara Azy.

¹⁹Toy izao no fijoroan’i Jôhany ho vavolombelona. Nisy mpisorona sy levita nirahin’ny manampahefana jiosy avy any Jerosalema hankeo aminy, mba hanontany azy hoe: — Iza moa ianao?

²⁰Tsy nandà ny hamaly izy fa nilaza mazava hoe: — Tsy izaho no ilay Mesia!

²¹Ary nanontany azy ry zareo hoe: — Ahoana àry? I Elià ve ianao? Dia novaliany hoe: — Tsy izy aho! Ka hoy ireo taminy: — Ilay Mpaminany ve ianao? Fa novaliany hoe: — Tsia[13]!

²²Tamin’izay ry zareo dia niteny tamin’i Jôhany hoe: — Iza àry ianao, mba hitondranay valin-teny any amin’izay naniraka anay? Lazainao ho iza ny tenanao!

²³Dia hoy izy: — Izaho no «feon’olona miantso mafy ao an-taniefitra hoe: ahitsio ny lalan’ny Tompo[14]», araka ny tenin’i Isaià mpaminanin’Andriamanitra.

²⁴Ary nisy avy amin’ny Farisianina[15] ireto olona nirahina teo amin’i Jôhany,

²⁵ka nanontany azy hoe: — Nahoana àry ianao no manao batisa, raha toa tsy ianao no ilay Mesia na i Elià na ilay Mpaminany?

²⁶Ka novalian’i Jôhany hoe: — Ny ahy, ao amin’ny rano no anaovako batisa; fa eo anivonareo misy olona anankiray tsy fantatrareo,

²⁷dia Ilay tamy aoriako, ary tsy mendrika hamaha ny fehikapany akory aho!

²⁸Izany zavatra izany dia niseho tany Betania[16], andafy atsinanan’ny ony Jôrdàna, teo amin’ny fanaovan’i Jôhany batisa.

²⁹Nony ampitso, dia nahita an’i Jesoa avy nanatona azy i Jôhany ka hoy izy: — Indro ny Zanakondrin’Andriamanitra, Ilay manala ny fahotan’izao tontolo izao[17]!

³⁰Izy indrindra Ilay nolazaiko hoe: «Misy lehilahy tamy aoriako, Izay lehibe noho izaho, satria efa nisy talohako.»

³¹Ary izaho dia tsy nahalala Azy; fa mba hampisehoana Azy amin’ny vahoaka Israely no nahatongavako hanao batisa ao amin’ny rano.

³²I Jôhany no vavolombelona nanambara hoe: — Efa hitako ny Fanahy Masina nidina avy any an-danitra toy ny voromahailala, ka nitoetra teo amboniny[18].

³³Ary izaho dia tsy nahalala Azy; fa Andriamanitra, Izay naniraka ahy hanao batisa ao amin’ny rano, no nilaza tamiko hoe: «Ilay ho hitanao idinan’ny Fanahy Masina sy itoerany eo amboniny, dia Izy no Mpanao batisa ao amin’ny Fanahy Masina.»

³⁴Ary nahita aho, ka dia vavolombelona manambara fa Izy no Zanak’Andriamanitra.

³⁵Ny ampitson’iny indray, dia mbola teo ihany i Jôhany sy ny mpianany roa lahy;

³⁶ary nahatazana an’i Jesoa nandalo i Jôhany ka hoy izy hoe: — Indro ny Zanakondrin’Andriamanitra[19]!

³⁷Nandre an’i Jôhany niteny izany ireto mpianany roa lahy ka lasa nanaraka an’i Jesoa.

³⁸Ary nitodika i Jesoa ka nahita azy roa lahy nanaraka, dia nanao taminy hoe: — Inona no tadiavinareo izay? Ka novalian’izy roa lahy hoe: — Rabỳ[20] ô, (izany hoe Mpampianatra ô, raha adika), aiza ianao no mitoetra?

³⁹Dia hoy i Jesoa taminy: — Avia, fa ho hitanareo! Koa dia nandeha izy roa lahy ka nahita izay nitoeran’i Jesoa ary nitoetra teo aminy tamin’io andro io. (Tokony ho tamin’ny efatra tolakandro tamin’izay).

⁴⁰I Andrea, rahalahin’i Simôna Petera, no anankiray tamin’izy roa lahy nandre ny tenin’i Jôhany, ka nanaraka an’i Jesoa.

⁴¹Ny nihaonan’i Andrea voalohany dia i Simôna rahalahiny ka nilazany hoe: — Efa hitanay ny Mesia (izany hoe i Kristy na hoe Voahosotra, raha adika)!

⁴²Dia nentin’i Andrea nankany amin’i Jesoa i Simôna; ary nony nijery azy i Jesoa, dia nanao hoe: — Ianao no Simôna, zanakalahin’i Jônà! Hantsoina hoe Kefasy[21] ianao (izany hoe Petera na hoe Vato, raha adika)!

⁴³Ny ampitson’iny, dia niroso nankany amin’ny faritany Galilea i Jesoa; tafahaona tamin’i Filipo Izy ary nanao taminy hoe: — Avia hiaraka amiko!

⁴⁴I Filipo dia avy any Betsaidà[22], tanàna fiavian-dry i Andrea sy i Petera.

⁴⁵Tafahaona tamin’i Natanaela kosa i Filipo ka niteny taminy hoe: «Efa hitanay Ilay voalazan’i Mosesy tao amin’ny bokin’ny Lalàna sy voalazan’ireo mpaminany[23], dia i Jesoa zanak’i Jôsefa, Ilay avy any Nazareta.»

⁴⁶Ary hoy i Natanaela taminy: — Moa mba mety hisy zava-tsoa ve avy any Nazareta? Dia novalian’i Filipo hoe: — Ndao ianao hizaha!

⁴⁷Nahita an’i Natanaela tamy nanatona Azy i Jesoa ka izao no teniny momba an’i Natanaela: — Izany ka tena Israelita tsy misy fitaka!

⁴⁸Dia hoy i Natanaela taminy: — Ahoana no ahafantaranao ahy? Ka novalian’i Jesoa hoe: — Talohan’ny niantsoan’i Filipo anao, dia hitako teo ambany aviavy[24] ianao!

⁴⁹Fa i Natanaela kosa nilaza taminy hoe: — Mpampianatra ô, Ianao no Zanak’Andriamanitra, Ianao no Mpanjakan’i Israely[25]!

⁵⁰Ary novalian’i Jesoa hoe: — Mino ve ianao satria nilazako fa hitako teo ambany aviavy? Zavatra lehibe noho izany no mbola ho hitanao!

⁵¹Dia hoy koa i Jesoa tamin-dry i Natanaela: — Lazaiko marina dia marina aminareo fa ho hitanareo ny lanitra misokatra mbamin’ny anjelin’Andriamanitra miaka-midina eo ambonin’ny Zanak’olona[26]!