Read DIEM PROTESTANTA Jôhany 15 Bible Online

Jôhany 15 - DIEM PROTESTANTA bible

Jôhany 15

¹— Izaho no tena voaloboka[140]; ary ny Raiko no mpamboly.

²Ny sampana rehetra izay tafaray amiko nefa tsy mamokatra dia esorin’ny Raiko; ary ny sampana rehetra izay mamokatra kosa, dioviny mba hamokatra bebe kokoa.

³Madio izao ianareo noho ny teny izay nolazaiko taminareo.

⁴Aoka hiray amiko hatrany ianareo toy ny iraisako aminareo. Ny sampana tsy afa-mamokatra ho azy raha tsy miray amin’ny voaloboka hatrany; dia toy izany koa ianareo: tsy afa-mamokatra, raha tsy miray amiko hatrany.

⁵Izaho no voaloboka; ianareo no sampana. Izay miray amiko hatrany, toy ny iraisako aminy, no mamokatra be; satria raha misaraka amiko ianareo, dia tsy afa-manao na inona na inona.

⁶Raha misy olona tsy miray amiko hatrany, dia ariana any ivelany tahaka ny sampana izy, ka mihamaina; ary angonina ireo sampana maina ka atsipy ao anaty afo, dia may.

⁷Raha miray amiko hatrany ianareo ka mitoetra ao anatinareo ny teniko, dia angataho izay zavatra tianareo na inona na inona, fa ho tonga aminareo izany.

⁸Ny ahazoan’ny Raiko voninahitra, dia ianareo mamokatra be sady tonga mpianatro.

⁹Tahaka ny nitiavan’ny Ray Ahy no nitiavako anareo koa; mitoera ao amin’izany fitiavako anareo izany.

¹⁰Raha mitandrina ireo didiko ianareo, dia hitoetra ao amin’izany fitiavako anareo izany, tahaka ny nitandremako ireo didin’ny Raiko sy itoerako ao amin’ny fitiavana Ahy.

¹¹Izany no voalazako taminareo, dia mba ho ao aminareo ny hafaliako ary mba ho feno ny hafalianareo[141].

¹²Izao no didiko: mifankatiava ianareo tahaka ny nitiavako anareo.

¹³Tsy misy manam-pitiavana lehibe kokoa noho ny mahafoy ny ainy hamonjy ny sakaizany.

¹⁴Ianareo no sakaizako, raha manatanteraka izay andidiako anareo:

¹⁵tsy hataoko hoe mpanompo intsony ianareo, satria ny mpanompo tsy mahalala izay ataon’ny tompony; fa efa ataoko hoe sakaiza ianareo, satria izay rehetra reko tamin’ny Raiko no nampahafantariko anareo.

¹⁶Tsy ianareo no nifidy Ahy, fa Izaho no nifidy anareo sady nanendry anareo mba handehananareo sy hahavokaranareo ary haharetan’ny vokatrareo; hany ka na inona na inona angatahinareo amin’ny Ray noho ny anarako, dia homeny anareo.

¹⁷Koa izao no andidiako anareo: mifankatiava ianareo.

¹⁸— Raha ankahalain’izao tontolo izao ianareo, dia fantaro fa Izaho no efa nankahalainy talohanareo.

¹⁹Raha naman’izao tontolo izao ianareo, dia hotiavin’izao tontolo izao satria azy. Saingy Izaho efa nifidy anareo hiavaka amin’izao tontolo izao, dia ankahalain’izao tontolo izao ianareo.

²⁰Tsarovy ny teny izay nolazaiko taminareo hoe: «Ny mpanompo tsy lehibe noho ny tompony[142].» Raha nanenjika Ahy ry zareo, dia hanenjika anareo koa; raha nitandrina ny teniko izy ireo, dia hitandrina ny teninareo koa.

²¹Fa izany rehetra izany dia hataony aminareo noho ny amiko, satria tsy fantany Ilay naniraka Ahy.

²²Raha toa tsy tonga Aho ka tsy niteny taminy, dia tsy ho nanam-pahotana ry zareo; ankehitriny kosa dia tsy manana fialan-tsiny izy ireo amin’ny fahotany.

²³Izay mankahala Ahy dia mankahala ny Raiko ihany koa.

²⁴Raha toa ireo asa izay tsy nataon’olona na iza na iza no tsy nataoko taminy, dia tsy ho nanam-pahotana izy ireo; ankehitriny kosa, efa nahita ny asa nataoko ireo sady efa nankahala Ahy sy ny Raiko.

²⁵Tonga izany mba hahatanteraka ny teny voalazan’ny Soratra Masina hoe: «Nankahalainy tsy amin’antony Aho[143].»

²⁶Ho tonga ilay Mpampahery anareo, dia ilay Fanahy fahamarinana Izay mivoaka avy any amin’ny Ray: Izy no hirahiko ho etỳ aminareo avy any amin’ny Ray, ary Izy no ho vavolombelona hanambara Ahy.

²⁷Ary ianareo koa dia vavolombelona hanambara Ahy, satria miaraka amiko hatramin’ny voalohany ianareo!