Read DIEM PROTESTANTA Jôhany 18 Bible Online

Jôhany 18 - DIEM PROTESTANTA bible

Jôhany 18

¹Rehefa voalazan’i Jesoa izany, dia lasa Izy mbamin’ny mpianany nandeha nankeny andafin’ny lohasahan-driaka atao hoe Kidrôna[151]; ary nisy saha anankiray teo, izay nidiran’Izy sy ny mpianany.

²Fantatr’i Jodasy, ilay efa hanolotra Azy, io toerana io satria falehan’i Jesoa mbamin’ny mpianany matetika[152].

³Ka nony voarain’i Jodasy ny antoko miaramila iray sy ny mpiandry raharaha avy tamin’ny lohandoha-mpisorona sy ny Farisianina, dia nankeo amin’ilay toerana izy iray tarika nitondra fanilo sy fanala ary fiadiana.

⁴Tamin’izay i Jesoa dia efa nahalala izay rehetra hanjo Azy, ka lasa nitsena azy ireo sy nanao taminy hoe: — Iza no tadiavinareo?

⁵Dia novalian’ireo hoe: — I Jesoa avy any Nazareta! Ka hoy i Jesoa taminy: — Izaho no Izy! Teo koa izany i Jodasy ilay manolotra Azy, niaraka tamin-dry zareo.

⁶Vao nilazan’i Jesoa ry zareo hoe: «Izaho no Izy», dia nianòtra, ka lavo tamin’ny tany.

⁷Dia nanontany azy indray i Jesoa hoe: — Iza no tadiavinareo? Dia novalian’ireo hoe: — I Jesoa avy any Nazareta!

⁸Ka hoy i Jesoa: — Efa nolazaiko taminareo fa Izaho no Izy; koa raha Izaho no tadiavinareo, dia avelao handeha ireto!

⁹Izany dia mba hahatanteraka ny teny voalazan’i Jesoa hoe: «Ray ô, tsy navelako hisy very tamin’ireo nomenao Ahy na dia iray aza.»

¹⁰Ary nanan-tsabatra i Simôna Petera ka nanatsoaka azy; dia namely ny mpanompon’ny mpisorombe izy ary nahafaka ny sofiny havanana (I Malko no anaran’ilay mpanompo.)

¹¹Fa hoy i Jesoa tamin’i Petera: — Ampidiro amin’ny tranony ny sabatrao. Tsy hiaretako ve ny anjara fijaliana nomen’ny Ray Ahy[153]?

¹²Tamin’izay ny antoko miaramila sy ny komandy ary ny mpiandry raharaha nirahin’ireo manampahefana jiosy dia nisambotra an’i Jesoa ka namatotra Azy.

¹³Tany amin’i Hàna[154] aloha no nitondrany Azy, fa i Hanà no rafozan’i Kaiafa izay mpisorombe tamin’izany taona izany.

¹⁴I Kaiafa kosa no ilay nanome hevitra ireo manampahefana jiosy hoe: «Tsara raha maty ho an’ny vahoaka ny lehilahy anankiray[155].»

¹⁵Dia nanaraka an’i Jesoa i Simôna Petera sy mpianatra anankiray hafa. Fantatry ny mpisorombe io mpianatra io, ka niara-niditra tamin’i Jesoa tao an-tokotanin’ny mpisorombe.

¹⁶Fa i Petera kosa nijanona tany alatrano, teo akaikin’ny vavahady. Dia niainga ilay mpianatra izay fantatry ny mpisorombe, ka niteny tamin’ny vehivavy mpiandry vavahady, ary nampiditra an’i Petera.

¹⁷Fa hoy ity mpiandry vavahady tamin’i Petera: — Ianao koa ve tsy isan’ny mpianatr’iny Lehilahy iny? Dia novaliany hoe: — Tsia, tsy anisany aho!

¹⁸Namelona afon’arina ny mpanompo sy ny mpiandry raharaha ka nipetraka namindro teo, fa nangatsiaka ny andro; ary dia mba nijanona niara-namindro taminy koa i Petera.

¹⁹Tamin’izay i Hàna mpisorombe dia nanadina an’i Jesoa momba ny mpianany sy ny fampianarany,

²⁰ka novalian’i Jesoa hoe: — Izaho dia niteny an-karihary tamin’izao tontolo izao; Izaho dia nampianatra mandrakariva tao amin’ny sinagôga sy teo an-kianjan’ny tempoly izay ivorian’ny Jiosy rehetra fa tsy niteny na inona na inona an-takona.

²¹Ka ahoana no anontanianao Ahy? Ireo nihaino Ahy anontaniana izay noteneniko taminy, fa ireo no mahalala izay nolazaiko.

²²Rehefa nilaza izany i Jesoa, dia nisy anankiray tamin’ny mpiandry raharaha teo namely tahamaina Azy sady nanao hoe: — Izany ve no famalinao ny mpisorombe?

²³Fa hoy i Jesoa namaly azy: — Raha ratsy ny teniko, lazao ny maha ratsy azy; fa raha tsara ihany kosa, nahoana no dia mamely Ahy ianao?

²⁴Tamin’izay i Jesoa dia nasain’i Hàna nentina am-patorana ho any amin’i Kaiafa mpisorombe.

²⁵I Simôna Petera kosa mbola nijanona namindro teo, ka nisy nilaza taminy hoe: — Ianao koa ve tsy isan’ny mpianatr’iny Lehilahy iny? Fa nandà izy nanao hoe: — Tsia, tsy anisany aho!

²⁶Dia hoy ny anankiray tamin’ireo mpanompon’ny mpisorombe, havan’ilay nokapain’i Petera ny sofiny: — Tsy efa hitako niaraka taminy tao anaty saha ve ianao?

²⁷Fa nandà indray i Petera; ary niaraka tamin’izay dia nisy akoho naneno.

²⁸Dia nentina niala tao amin’i Kaiafa i Jesoa ho any an-dapan’ny governora. Mbola maraina be ny andro tamin’izay. Tsy niditra tao an-dapa anefa ry zareo manampahefana jiosy mba tsy ho voaloto ary mba ho afa-mihinana ny sakafo Paska.

²⁹Koa dia i Pilato no nivoaka nanatona azy teo alatrano ka nanao hoe: — Inona no iampanganareo io Lehilahy io?

³⁰Dia novalian’ireo hoe: — Raha toa mpanao ratsy Izy, dia tsy ho natolotray anao!

³¹Ka hoy i Pilato taminy: — Ento Izy, ka tsarao araka ny lalànanareo. Fa hoy ny Jiosy taminy: — Tsy manam-pahefana hahafaty olona izahay.

³²Izany dia mba hahatanteraka ny teny nolazain’i Jesoa nanambara ny karazam-pahafatesana efa hanjo Azy[156].

³³Tamin’izay dia niditra tao an-dapa indray i Pilato, ary niantso an’i Jesoa ka nanao taminy hoe: — Ianao ve no Mpanjakan’ny Jiosy?

³⁴Dia novalian’i Jesoa hoe: — Anao samirery izany teny izany sa nisy olon-kafa nilaza Ahy taminao?

³⁵I Pilato kosa niteny hoe: — Fa izaho angaha Jiosy? Ireo olona iray firenena aminao sy ireo lohandoha-mpisorona no nanolotra Anao tamiko; inona moa no nataonao?

³⁶Dia novalian’i Jesoa hoe: — Tsy anisan’izao tontolo izao ny Fanjakàko; fa raha an’izao tontolo izao ny Fanjakàko, dia ho niady ny mpanompoko mba tsy ho voatolotra tamin’ny manampahefana jiosy Aho; kanefa tsy anisan’izao etỳ izao ny Fanjakàko.

³⁷Ary hoy i Pilato taminy: — Koa Mpanjaka izany Ianao? I Jesoa kosa namaly hoe: — Voalazanao fa Mpanjaka Aho. Izao no nahaterahako ary izao no niaviako eto amin’izao tontolo izao: dia ny ho vavolombelona hanambara ny marina. Izay rehetra mpiandany amin’ny marina dia mihaino ny feoko.

³⁸Dia hoy i Pilato taminy: — Inona no marina? Avy nanontany izany i Pilato, dia nivoaka nankeo amin’ny Jiosy indray ka nanao taminy hoe: — Izaho dia tsy mahita izay helony, na dia iray aza!

³⁹Saingy fanao mahazatra anareo ny andefasako olo-meloka anankiray ho anareo, amin’ny fankalazana ny Paska; koa sitrakareo ve raha halefako ho anareo ny Mpanjakan’ny Jiosy?

⁴⁰Dia niantsoantso indray izy rehetra nanao hoe: — Tsy ilay io, fa i Barabasy! Kanefa jiolahy[157] i Barabasy.