Read DIEM PROTESTANTA Jôhany 19 Bible Online

Jôhany 19 - DIEM PROTESTANTA bible

Jôhany 19

¹Tamin’izay dia nalain’i Pilato i Jesoa ka nasainy nokapohina.

²Dia nandrandrana fehiloha tsilo ny miaramila ka nasatrony ny lohan’i Jesoa; ary nampitafîny lamba jaky[158] Izy.

³Dia nanatona Azy ny miaramila, ka namely tahamaina Azy sady niteny hoe: — Arahaba, ry Mpanjakan’ny Jiosy!

⁴Dia nivoaka nankeo alatrano indray i Pilato ka nanao tamin’ny vahoaka hoe: — Indro Izy entiko eto aminareo, mba hahafantaranareo fa tsy hitako izay helony, na dia iray aza!

⁵Tamin’izay dia nivoaka nankeo alatrano i Jesoa, misatroka fehiloha tsilo sy mitafy lamba jaky. Dia hoy i Pilato tamin’ny vahoaka: — Indro ny Lehilahy!

⁶Nony mahita an’i Jesoa ny lohandoha-mpisorona sy ny mpiandry raharaha, dia niantsoantso nanao hoe: — Homboy amin’ny hazofijaliana io! Homboy amin’ny hazofijaliana io! Fa hoy i Pilato taminy: — Entonareo Izy, ka homboy amin’ny hazofijaliana; fa Izaho tsy mahita izay helony.

⁷Ny Jiosy kosa namaly azy hoe: — Manana lalàna izahay, ary araka izany lalàna izany dia tokony ho faty Izy, satria nanao ny tenany ho Zanak’Andriamanitra[159]!

⁸Rehefa nandre izany teny izany i Pilato, dia vao mainka natahotra.

⁹Ary niditra tao an-trano indray izy ka nanao hoe tamin’i Jesoa hoe: — Avy aiza moa Ianao? Fa tsy namaly azy i Jesoa.

¹⁰Ka hoy i Pilato taminy: — Izaho ve no tsy itenenanao? Tsy fantatrao angaha fa sady manana fahefana handefa Anao aho, no manana fahefana hampanombo Anao amin’ny hazofijaliana koa?

¹¹I Jesoa kosa namaly azy hoe: — Tsy hanana fahefana amiko akory ianao, raha tsy nomen’Andriamanitra anao izany; koa izay nanolotra Ahy taminao no manan-keloka bebe kokoa!

¹²Noho izany, dia nitady handefa Azy i Pilato, saingy nantsoantsoin’ny Jiosy hoe: — Raha alefanao ilay io, dia tsy mba sakaizan’ny amperôra rômanina ianao; fa izay rehetra manao ny tenany ho mpanjaka, dia manohitra ny amperôra rômanina.

¹³Nony nandre ireo teny ireo i Pilato, dia nitondra an’i Jesoa hankeo alatrano, ka nampipetraka Azy teo amin’ny toerana avoavo, dia ilay toerana atao hoe Lampivato, na hoe Gabatà[160] amin’ny teny hebreo.

¹⁴Andro fiomanana amin’ny Paska tamin’izay, tokony ho tamin’ny mitataovovonana[161]. Ary hoy i Pilato tamin’ny Jiosy: — Indro ny Mpanjakanareo!

¹⁵Fa niantsoantso ireo nanao hoe: — Vonoy, vonoy, homboy amin’ny hazofijaliana io! Dia hoy i Pilato taminy: — Dia hohomboako amin’ny hazofijaliana ve ny Mpanjakanareo? Ka novalian’ny lohandoha-mpisorona hoe: — Tsy manana mpanjaka afa-tsy ny amperôra rômanina izahay.

¹⁶Tamin’izay dia natolotr’i Pilato azy ireo i Jesoa mba hohomboana amin’ny hazofijaliana. Dia noraisin’ny Jiosy i Jesoa.

¹⁷Ary ny tenan’i Jesoa no nitondra ny hazofijaliany, ka niainga ho any amin’ny toerana atao hoe Ikarandoha, na hoe Gôlgôtà[162] amin’ny teny hebreo.

¹⁸Teo no nanombohan’ny miaramila Azy tamin’ny hazofijaliana; ary nisy roa lahy hafa koa niaraka taminy, dia nohomboana tamina hazofijaliana teo an-daniny roa, fa i Jesoa teo afovoany.

¹⁹Nampanao soratra kosa i Pilato, ary nasainy napetaka teo an-dohan’ny hazofijalian’i Jesoa; ka izao no voasoratra: «I Jesoa avy any Nazareta, ilay Mpanjakan’ny Jiosy.»

²⁰Izany soratra izany dia novakîn’ny Jiosy maro, fa akaikin’ny tanàna ilay toerana nanomboana an’i Jesoa tamin’ny hazofijaliana; sady natao tamin’ny teny hebreo sy latinina ary grika izany soratra izany.

²¹Ka hoy ny lohandoha-mpisorona jiosy tamin’i Pilato: — Aza soratana hoe «ilay Mpanjakan’ny Jiosy», fa izao: «ilay io no nilaza hoe: Mpanjakan’ny Jiosy Aho.»

²²Fa novalian’i Pilato hoe: — Izay voasoratro dia voasoratro!

²³Rehefa voahombon’ny miaramila tamin’ny hazofijaliana i Jesoa, dia nalainy ny fitafiany ka nozarainy efatra: samy nanana ny anjarany avy ny miaramila[163]. Ary nalainy koa ny akanjony rebareba, saingy tsy nisy vitrana ilay akanjony fa tenona iray ihany hatrany ambony ka hatrany ambany;

²⁴dia nifampiresaka ireo hoe: — Aza triarina fa aoka hilokantsika, dia ho lasan’izay hahazo ny loka. Izany dia mba hahatanteraka ny Soratra Masina manao hoe: «Nifampizaran’ireo ny fitafiako ary nilokany ny akanjoko[164].» Dia izany no nataon’ny miaramila.

²⁵Nijoro teo akaikin’ny hazofijalian’i Jesoa ny reniny sy ny rahavavin-dreniny, dia i Maria vadin’i Klôpà, ary i Maria Magdalena.

²⁶Nony hitan’i Jesoa ny reniny ary teo anilan’io reniny io ilay mpianatra tiany, dia hoy Izy tamin-dreniny: — Ravehivavy, indro ny zanakao!

²⁷Avy eo dia hoy Izy tamin’ilay mpianatra: — Indro ny reninao! Ary nanomboka hatramin’io fotoana io i Maria dia noraisin’ilay mpianatra ho any aminy.

²⁸Taorian’izany, dia fantatr’i Jesoa fa efa vita ny zavatra rehetra; ka mba hahatanteraka ny Soratra Masina, dia hoy Izy: — Mangetaheta Aho[165].

²⁹Ary nisy bakoly feno vinaingitra teo; ka spaonjy novontosana vinaingitra sy notohizana tamina zaran-defona no natohoky ny miaramila teo am-bavan’i Jesoa[166].

³⁰Rehefa nanandrana ny vinaingitra Izy dia nanao hoe: — Vita ny zavatra rehetra! Dia nanondri-doha Izy ka nanolotra ny fanahiny.

³¹Ary satria fiomanana tamin’izay, dia nangatahin’ny manampahefana jiosy tamin’i Pilato ny hanapahana ny ranjon’ireo voahombo[167] sy hanesorana ny fatiny mba tsy hisy tavela eo amin’ny hazofijaliana ny andro sabata, satria andro lehibe izany sabata izany.

³²Dia tonga ny miaramila ka nanapaka ny ranjon’ny voalohany sy ny an’ilay anankiray hafa izay nohomboana tamin’ny hazofijaliana niaraka tamin’i Jesoa.

³³Nony nankeo amin’i Jesoa ny miaramila, dia hitany fa efa maty sahady Izy, ka dia tsy mba notapahiny ny ranjony;

³⁴fa nisy miaramila anankiray nandefona ny fon’i Jesoa, ary niaraka tamin’izay dia nisy ra sy rano nivoaka.

³⁵Ilay nahita no vavolombelona manambara ary azo antoka ny fijoroany ho vavolombelona, sady fantany fa milaza ny marina izy mba hinoanareo koa[168].

³⁶Eny, tonga izany mba hahatanteraka ny Soratra Masina hoe: «Tsy hisy hotapahina ny taolany[169].»

³⁷Ary hoy indray koa ny Soratra Masina hoe: «Hijery ilay nolefonina izy ireo[170].»

³⁸Taorian’izany, dia nangataka tamin’i Pilato i Jôsefa avy any Harimatia[171], mba hahazo manaisotra ny vatan’i Jesoa. Mpianatr’i Jesoa i Jôsefa, saingy an-tsokosoko noho izy natahotra ireo manampahefana jiosy. Neken’i Pilato ny fangatahany, ka dia lasa izy nanaisotra ny vatan’i Jesoa.

³⁹Tonga koa i Nikôdema (ilay nanatona an’i Jesoa andro alina teo aloha) nitondra ny miora sy aloesy nampifangaroina, tokony ho telopolo kilao[172].

⁴⁰Noraisin’izy roa lahy ny vatan’i Jesoa, ka nofonosina lamba nasiana zava-manitra, araka ny fanaon’ny Jiosy raha mamboatra faty halevina.

⁴¹Nisy saha anankiray kosa teo amin’ilay toerana nanomboana an’i Jesoa; ary nisy fasana vaovao tsy mbola nandevenana olona mihitsy tao anatin’ilay saha.

⁴²Koa satria andro fiomanana ho an’ny Jiosy tamin’izay sady akaiky eo ny fasana, dia tao no nandevenan’izy roa lahy an’i Jesoa.