Read DIEM PROTESTANTA Jôhany 20 Bible Online

Jôhany 20 - DIEM PROTESTANTA bible

Jôhany 20

¹Ny andro alahady, dia nandeha maraina be mbola maizimaizina i Maria Magdalena hankany amin’ny fasana, ka nahita ny vato efa voaesotra lavitry ny fasana.

²Dia lasa izy nihazakazaka nankany amin’i Simôna Petera sy ilay mpianatra tian’i Jesoa, ka nanao tamin’ireo hoe: — Nalain’olona tao am-pasana ny Tompo, ka tsy fantatray izay nametrahany Azy.

³Dia niainga i Petera sy ilay mpianatra anankiray nankany amin’ny fasana.

⁴Niara-nihazakazaka izy roa lahy, saingy nihazakazaka faingana kokoa noho i Petera ilay mpianatra anankiray, ka tonga taloha teo amin’ny fasana.

⁵Dia niondrika nitsirika izy, ka nahita ny lambam-paty nipetraka teo, nefa tsy niditra.

⁶Tonga koa i Simôna Petera nanaraka azy, dia niditra tao am-pasana, ka nijery ny lambam-paty nipetraka teo

⁷sy ny lambakely nasarona ny lohany, tsy niara-nipetraka tamin’ny lambam-paty fa voavalona mitokana terỳ.

⁸Tamin’izay dia niditra koa ilay mpianatra tonga taloha teo amin’ny fasana, ary nahita ka nino.

⁹Tsy mbola fantatr’ireo mpianatra manko ny Soratra Masina manambara fa i Jesoa dia tsy maintsy hitsangana velona avy any amin’ny maty[173].

¹⁰Dia lasa izy roa lahy nody tany aminy.

¹¹I Maria kosa nijanona nitomany teo ivelan’ny fasana. Ary raha nitomany izy, dia niondrika nitsirika tao am-pasana,

¹²ka nahita anjely roa niakanjo fotsy, nipetraka teo amin’izay nandrian’ny vatan’i Jesoa: ny iray teo an-doha, ary ny iray teo an-tongotra.

¹³Dia hoy ireo anjely tamin’i Maria: — Nahoana ianao no mitomany? Ka novaliany hoe: — Nalain’olona ny Tompoko, ka tsy fantatro izay nametrahany Azy.

¹⁴Dia nitodika i Maria nony avy nilaza izany, ka nahita an’i Jesoa nijoro teo, saingy tsy fantany hoe i Jesoa io.

¹⁵Dia hoy Jesoa taminy: — Nahoana ianao, ramatoa, no mitomany? Iza no tadiavinao? Noheverin’i Maria ho mpiandry saha io, ka nataony hoe: — Raha Ianao re, Tompoko, no naka Azy, mba lazao amiko izay nametrahanao Azy, hangalako Azy!

¹⁶Fa hoy i Jesoa taminy: — Ry Maria! Dia nitodika ravehivavy ka niteny aramianina taminy hoe: — Rabonỳ (izany hoe Mpampianatra)!

¹⁷Hoy kosa i Jesoa taminy: — Aoka ianao tsy hitazona Ahy[174], satria tsy mbola niakatra tany amin’ny Ray Aho. Fa mandehana mankany amin’ny rahalahiko, ka lazao aminy hoe: Miakatra ho any amin’ilay Raiko sady Rainareo Aho, ary ho any amin’ilay Andriamanitro sady Andriamanitrareo.

¹⁸Dia lasa i Maria Magdalena ka nanambara tamin’ny mpianatra hoe: — Efa nahita ny Tompo aho! Ary nambarany koa ireo hafatra nambaran’i Jesoa taminy.

¹⁹Ny harivan’io alahady io ihany, dia vory tao amin’ny trano iray ny mpianatra; ary noho izy ireo natahotra ny manampahefana jiosy, dia voahidy avokoa ny varavarana. Kanefa tonga i Jesoa nijoro teo afovoan’ny mpianatra ary nanao taminy hoe: — Ho ao aminareo anie ny fiadanana!

²⁰Rehefa nilaza izany i Jesoa, dia nasehony azy ireo ny tanany sy ny fony, ka faly ny mpianatra fa nahita ny Tompo[175].

²¹Dia hoy indray i Jesoa taminy: Ho ao aminareo anie ny fiadanana! Tahaka ny nanirahan’ny Ray Ahy no anirahako anareo koa.

²²Rehefa nilaza izany Izy, dia nitsoka taminy ary nanao hoe: — Raiso ny Fanahy Masina.

²³Na iza na iza avelanareo heloka, dia voavela; ary na iza na iza tsy avelanareo heloka, dia tsy voavela[176].

²⁴Fa i Tômà, ilay atao hoe Ikambana, anankiray tamin’ny 12 lahy, dia tsy mba tafaraka tamin’ireo mpianatra fony tonga i Jesoa.

²⁵Ka hoy ny mpianatra sasany tamin’i Tômà: — Efa nahita ny Tompo izahay! Fa hoy i Tômà taminy: — Raha tsy hitako eo amin’ny tanany roa ny loaky ny fantsika, ka atsofoko eo amin’ny loaky ny fantsika ny rantsan-tanako, ary atsofoko eo amin’ny fony ny tanako, dia tsy mba hino aho[177].

²⁶Nony afaka herinandro, dia vory tao an-trano indray ny mpianatr’i Jesoa; ary tafaraka tamin’ireo koa i Tômà. Voahidy avokoa ny varavarana, kanefa dia tonga i Jesoa nijoro teo afovoan’ny mpianatra ary nanao hoe: — Ho ao aminareo anie ny fiadanana!

²⁷Avy eo dia hoy Izy tamin’i Tômà: — Arosoy eto ny rantsan-tananao ka jereo ny tanako roa; arosoy koa ny tananao ka atsofoy eto amin’ny foko; ary aza malain-kino, fa minoa!

²⁸Dia namaly i Tômà ka nanao taminy hoe: — Tompoko sy Andriamanitro!

²⁹Fa hoy i Jesoa taminy: — Noho ianao nahita Ahy, dia nino; sambatra kosa izay tsy nahita, nefa nino[178].

³⁰Maro koa ny famantarana hafa nataon’i Jesoa teo imason’ny mpianany no tsy voasoratra amin’ity boky ity.

³¹Fa voasoratra ireo famantarana ireo mba hinoanareo[179] fa i Jesoa no ilay Mesia, ilay Zanak’Andriamanitra, ary mba hahavelona aina anareo amin’ny alalany, raha mino Azy ianareo.