Read DIEM PROTESTANTA Jôhany 21 Bible Online

Jôhany 21 - DIEM PROTESTANTA bible

Jôhany 21

¹Tamin’izany, dia niseho tamin’ny mpianany indray i Jesoa teo amoron’ny farihin’i Tiberiada, ary toy izao no nisehoany.

²Tafaraka i Simôna Petera, sy i Tômà ilay atao hoe Ikambana, ary i Natanaela ilay avy any Kanà any Galilea, mbamin’ireo zanakalahin’i Zebedeo sy mpianatra roa lahy hafa koa.

³Fa hoy i Simôna Petera tamin’izy enin-dahy: — Ndeha hanarato aho! Ka hoy ireo taminy: — Ndeha hiaraka aminao koa izahay. Dia niainga izy rehetra ka niditra tao an-tsambokely, saingy tamin’iny alina iny dia tsy nahazo na inona na inona akory.

⁴Ary nony efa nazava ratsy ny andro, dia nijoro teo amorom-parihy i Jesoa, kanefa tsy fantatry ny mpianatra hoe i Jesoa Izy.

⁵Dia hoy i Jesoa taminy: — Manan-javatra hohanina ve ianareo, rey anaka? Ka novalian’ireo hoe: — Tsia!

⁶Ary hoy Izy taminy: — Alatsaho ao ankavanan’ny sambokely ny haratonareo, fa hahazo ianareo. Dia nalatsak’izy fito lahy ny harato, ka tsy zakany nakarina noho ny habetsahan’ny trondro[180].

⁷Ary hoy ilay mpianatra tian’i Jesoa tamin’i Petera: — Ny Tompo io! Vao ren’i Simôna Petera fa hoy ny Tompo io, dia niakanjoany ny akanjo ivelany fa efa nesoriny, ka lasa izy nirotsaka tao anaty rano.

⁸Fa ny mpianatra sasany kosa nandeha an-tsambokely ihany nisarika ny harato feno trondro; tsy lavitra ny tany manko izy ireo, fa tokony ho zato metatra eo ho eo.

⁹Rehefa tafakatra teo an-tanety izy fito lahy, dia nahita afon’arina teo sy trondro teo amboniny ary mofo.

¹⁰Ka hoy i Jesoa taminy: — Itondray trondro amin’ireo vao azonareo teo.

¹¹Dia niakatra tao an-tsambokely i Simôna Petera, ka nisarika ho eo an-tanety ny harato feno trondro vaventy 153; kanefa na dia betsaka tahaka izany aza ny trondro, dia tsy triatra ny harato.

¹²Ary hoy i Jesoa tamin’izy fito lahy: — Avia hisakafo! Ny mpianatra izany tsy nisy na iray aza sahy nanontany Azy hoe: «Iza moa Ianao?», satria fantany ihany fa ny Tompo io.

¹³Ary nanatona i Jesoa dia nandray ny mofo ka natolony azy ireo; ary nataony toy izany koa ny trondro.

¹⁴Izany no fisehoan’i Jesoa fanintelony[181] tamin’ny mpianany, fony Izy tafatsangana velona avy any amin’ny maty.

¹⁵Rehefa avy nisakafo ireo mpianatra, dia hoy i Jesoa tamin’i Simôna Petera: — Ry Simôna zanakalahin’i Jôhany, moa tia Ahy mihoatra noho ny itiavan’ireto Ahy ve ianao? Ka novaliany hoe: — Eny, ry Tompo, fantatrao fa tiako Ianao. Dia hoy Izy taminy: — Fahano ireo zanakondriko.

¹⁶Ary hoy indray i Jesoa tamin’i Petera fanindroany: — Ry Simôna zanakalahin’i Jôhany, moa tia Ahy ve ianao? Ka novaliany hoe: — Eny, ry Tompo, fantatrao fa tiako Ianao. Dia hoy Izy taminy: — Aoka ianao ho mpiandry ireo ondriko[182].

¹⁷Ary hoy indray i Jesoa tamin’i Petera fanintelony: — Ry Simôna zanakalahin’i Jôhany, moa tia Ahy ve ianao? Dia nalahelo i Petera fa nataon’i Jesoa fanintelony hoe: «Moa tia Ahy ve ianao?», ka hoy ny navaliny Azy: — Ianao, ry Tompo, no mahalala ny zavatra rehetra, ka fantatrao fa tiako Ianao. Dia hoy Izy taminy: — Fahano ireo ondriko.

¹⁸Lazaiko marina dia marina aminao fa fony mbola tanora ianao, dia nahasikin-tena sy nandeha tamin’izay tianao haleha; fa rehefa antitra kosa ianao, dia hatsotranao ny tananao, ka olon-kafa no hanikina anao sy hitondra anao amin’izay tsy tianao haleha.

¹⁹(Izany voalazan’i Jesoa izany, dia manambara ny karazam-pahafatesana hanomezan’i Petera voninahitra an’Andriamanitra). Avy nilaza izany i Jesoa, dia nanao taminy hoe: — Avia hiaraka amiko!

²⁰Dia nitodika i Petera ka hitany manaraka azy ireo ilay mpianatra tian’i Jesoa, ilay mpianatra izay nirona teo amin’ny tratran’i Jesoa tamin’ny fisakafoana ka nanontany Azy hoe: «Tompo ô, iza moa ilay efa hanolotra Anao[183]?»

²¹Rehefa nahita an’ilay mpianatra i Petera, dia niteny tamin’i Jesoa hoe: — Ary izy io, ry Tompo, mba inona no ho anjarany?

²²Dia hoy i Jesoa tamin’i Petera: — Raha tiako haharitra mandra-piaviko izy, ahoanao izany? Fa ianao, avia hiaraka amiko!

²³Noho izany teny izany, dia niely tamin’ireo havana mpino fa hoe tsy ho faty io mpianatra io; kanefa i Jesoa tsy niteny tamin’i Petera hoe: «Tsy ho faty izy», fa hoe «Raha tiako haharitra mandra-piaviko izy, ahoanao izany[184]?»

²⁴Io mpianatra io no vavolombelona manambara izany zavatra izany sy nanoratra azy; ary fantatray fa azo antoka ny fijoroany ho vavolombelona[185].

²⁵Misy zavatra maro hafa koa izay nataon’i Jesoa; ka raha izany no voasoratra tsirairay, dia ataoko fa na izao tontolo izao aza dia tsy ho omby ny boky voasoratra[186].