Read DIEM PROTESTANTA Jôhany 9 Bible Online

Jôhany 9 - DIEM PROTESTANTA bible

Jôhany 9

¹Raha nandalo ry i Jesoa, dia nahita lehilahy jamba hatry ny vao teraka.

²Dia nanontany an’i Jesoa ny mpianany nanao hoe: — Mpampianatra ô, iza moa no nanota, ralehilahy io sa ny ray aman-dreniny, no dia teraka jamba izy[96]?

³Dia novalian’i Jesoa hoe: — Tsy izy no nanota na ny ray aman-dreniny, fa mba hanehoana ny asan’Andriamanitra eo aminy.

⁴Isika tsy maintsy manao ny asan’Ilay naniraka Ahy, raha mbola antoandro; fa ho avy ny alina izay tsy ahafahan’iza na iza miasa!

⁵Raha mbola eo amin’izao tontolo izao Aho, dia fahazavana ho an’izao tontolo izao[97].

⁶Nony avy nilaza izany Izy, dia nandrora tamin’ny tany sy nanao feta tamin’ny rorany[98], ka nanosotra feta ny mason’ilay jamba

⁷ary nanao taminy hoe: — Ndeha ianao misasa maso any amin’ny dobo Silôà[99]. (Silôà dia midika hoe «Nirahina».) Dia lasa nankany izy ary nisasa maso ka nahiratra rehefa niverina.

⁸Tamin’izay ireo mpiara-monina aminy sy ireo olona nahita fa mpangataka izy taloha, dia nanao hoe: — Tsy ity ve ilay nipetraka nangataka? Ka hoy ny sasany: — Izy io!

⁹Fa hoy ny sasany: — Tsia, fa olona mitovy aminy! Ralehilahy kosa nilaza hoe: — Izaho mihitsy ity!

¹⁰Dia hoy ny olona taminy: — Fomba ahoana àry no nahiratan’ny masonao?

¹¹Fa novaliany hoe: — Ilay Lehilahy atao hoe Jesoa no nanao feta sy nanosotra ny masoko, dia nanao tamiko hoe: «Ndeha ianao mankany amin’ny dobo Silôà, dia misasà maso.» Koa lasa nankany aho, dia nisasa maso ary nahiratra.

¹²Dia hoy ny olona taminy: — Aiza moa izany Lehilahy izay? Fa novaliany hoe: — Tsy fantatro!

¹³Dia nentin’ny olona tany amin’ny Farisianina ilay jamba taloha.

¹⁴Andro sabata no nanaovan’i Jesoa ny feta sy nampahiratany maso azy;

¹⁵koa ireo Farisianina indray no nanontany ilay jamba taloha ny amin’ny fomba nahiratany, ary izao no navaliny: — Nasiany feta ny masoko, dia nisasa maso aho ka nahiratra!

¹⁶Tamin’izay ny sasany tamin’ireo Farisianina dia nanao hoe: — Tsy avy amin’Andriamanitra izany Lehilahy izany, satria tsy mitandrina ny fepetra momba ny sabata! Ny sasany kosa nanao hoe: — Fomba ahoana moa no ahafahan’olona mpanota manao famantarana toy ireny? Dia nisara-tsaina ry zareo.

¹⁷Ary hoy indray ireto Farisianina tamin’ilay jamba: — Ianao kosa, ahoana no mba ilazanao Azy, raha nampahiratra ny masonao Izy? Ka novaliany hoe: — Mpaminany Izy.

¹⁸Tamin’izay ny manampahefana jiosy dia tsy nino hoe jamba taloha ralehilahy ka nahiratra, ambara-piantson-dry zareo ny ray aman-dreniny

¹⁹nanontaniany hoe: — Ralehilahy io ve no zanakareo izay lazainareo fa teraka jamba? Fomba ahoana àry no nahiratany ankehitriny?

²⁰Dia izao no navalin’ny ray aman-dreniny: — Fantatray fa izy io dia zanakay sady teraka jamba;

²¹fa tsy fantatray ny fomba nahiratany ankehitriny, ary tsy fantatray koa izay olona nampahiratra ny masony. Izy anontaniana fa efa lehibe, ka dia izy ihany no hilaza ny amin’ny tenany.

²²Izany no tenin’ny ray aman-dreniny noho izy ireo natahotra ny manampahefana jiosy; satria efa nifanaraka ny manampahefana jiosy fa raha manaiky an’i Jesoa ho Mesia, dia horoahina hiala amin’ny sinagôga.

²³Ka izany no nitenenan’ny ray aman-dreniny hoe: «Efa lehibe izy, ka izy anontaniana!»

²⁴Dia nantsoin’ireo Farisianina indray ilay jamba taloha, ka nilazany hoe: — Lazao ny marina eo anatrehan’Andriamanitra! Izahay aloha dia tsy mahalala fa mpanota iny Lehilahy iny.

²⁵Ka hoy ny navaliny azy: — Tsy fantatro na mpanota Izy na tsia; zavatra iray ihany no fantatro: jamba aho taloha fa mahiratra ankehitriny.

²⁶Dia hoy ireo taminy: — Inona no nataony taminao? Fomba ahoana no nampahiratany ny masonao?

²⁷Fa novaliany hoe: — Efa voalazako taminareo, fa tsy nohenoinareo! Ka ahoana no itiavanareo mihaino izany indray? Te ho tonga mpianany koa ve ianareo?

²⁸Dia notevatevain’ireo Farisianina ralehilahy sady nataony hoe: — Ianao no mpianany fa izahay mpianatr’i Mosesy.

²⁹Fantatray fa i Mosesy dia nitenenan’Andriamanitra; ilay iny kosa tsy fantatray izay ipoirany.

³⁰Dia niteny ralehilahy ka nanao taminy hoe: — Izany tokoa no mahagaga: tsy fantatrareo izay ipoirany, nefa nampahiratra ny masoko Izy!

³¹Fantatsika fa Andriamanitra tsy mihaino ny mpanota; fa izay tia vavaka sy manao ny sitrapony no henoiny[100].

³²Hatrizay hatrizay dia tsy mbola nandrenesana fa hoe nisy nampahiratra mason’olona teraka jamba.

³³Raha toa tsy avy amin’Andriamanitra izany Lehilahy izany, dia tsy hahefa na inona na inona.

³⁴Namaly kosa ry zareo ka nanao taminy hoe: — Tena teraka tanatin’ny ota ianao, ka ianao indray ve no mampianatra anay? Dia noroahin’ny Farisianina hiala amin’ny sinagôga ilay jamba taloha.

³⁵Ren’i Jesoa fa voaroaka hiala amin’ny sinagôga ilay jamba taloha, ka nony hitany dia nilazany hoe: — Mino ny Zanak’olona ve ianao?

³⁶Fa novaliany hoe: — Iza moa no Izy, Tompoko, mba hinoako Azy?

³⁷Dia hoy i Jesoa taminy: — Efa nahita Azy ianao, ary Ilay miresaka aminao izao no Izy!

³⁸Ka hoy ralehilahy hoe: — Mino aho, Tompoko! Sady niankohoka teo anatrehany izy.

³⁹Dia hoy i Jesoa: — Ho fitsarana no nahatongavako eto amin’izao tontolo izao, mba hahiratra izay tsy mahiratra ary ho tonga jamba izay mahiratra!

⁴⁰Nandre izany ny Farisianina sasany teo ka nanao taminy hoe: — Izahay koa ve jamba?

⁴¹Dia hoy i Jesoa taminy: — Raha jamba ianareo, dia tsy ho nanan-keloka; fa noho ianareo ankehitriny manao hoe: «Mahiratra izahay», dia tsy afaka ny helokareo.