Read DIEM PROTESTANTA Asa 1 Bible Online

Asa 1 - DIEM PROTESTANTA bible

Asa 1

¹Any ianao ry Teôfily, Ilay boky voalohany[7] dia nanoratako ny zavatra rehetra nataon’i Jesoa sy nampianariny, hatrany am-panombohany

²ka hatramin’ny andro nampiakarana Azy ho any an-danitra. Talohan’ny nampiakarana Azy, dia namelany baiko tamin’ny herin’ny Fanahy Masina ireo nofidiny ho apôstôly[8].

³Porofo maro no nentin’i Jesoa nanambara tena fa velona Izy taorian’ny nahafatesany: niseho tamin’ny apôstôly Izy nandritra ny efapolo andro sady nidinidinika taminy momba ny Fanjakàn’Andriamanitra.

⁴Ary indray andro i Jesoa dia niara-nisakafo taminy[9] ka nanafatrafatra azy hoe: — Aza miala eto Jerosalema, fa andraso ilay fanomezana nampanantenain’ny Ray, izay efa renareo tamiko.

⁵I Jôhany[10] dia nanao batisa tamin’ny rano; fa ianareo kosa, rehefa afaka andro vitsivitsy, dia hatao batisa amin’ny Fanahy Masina.

⁶Koa izay tafangona teo amin’i Jesoa dia nanontany Azy hoe: — Tompo ô, izao ve no fotoana hanarenanao indray ny fanjakana ho an’i Israely[11]?

⁷Fa novalian’i Jesoa hoe: — Tsy anjaranareo ny mahalala ny fotoana na ny vaninandro voatendrin’ny Ray araka ny fahefàny manokana[12].

⁸Fa hahazo hery ianareo rehefa hilatsahan’ny Fanahy Masina, ka ho vavolombelona hanambara Ahy eto Jerosalema sy eran’i Jodea mbamin’i Samaria ary hatrany amin’ny faran’ny tany[13].

⁹Nony avy nilaza izany i Jesoa, dia nakarina any an-danitra teo imason’izy ireo; ary nisy rahona nanakona an’i Jesoa ka tonga tsy hitan’izy ireo intsony Izy[14].

¹⁰Raha mbola nibanjina ny lanitra niakaran’i Jesoa teo iny izy ireo, dia indreo nisy roa lahy nanao fitafiana fotsy[15] tafajoro tampoka teo anilany

¹¹ka nanao taminy hoe: — Ry lehilahy galileanina, nahoana no mijanona eto mijery ny lanitra ianareo? Iny Jesoa Izay nalaina teo aminareo hakarina any an-danitra iny, dia mbola ho avy indray tahaka ny nahitanareo Azy nankany an-danitra.

¹²Dia niverina nankany Jerosalema ny apôstôly, rehefa niala teo amin’ilay tendrombohitra atao hoe Analanôliva, tendrombohitra akaiky an’i Jerosalema tokony ho iray kilaometatra[16] (halaviran-dalana azo aleha amin’ny sabata).

¹³Ka nony tonga tao an-tanàna izy ireo, dia niakatra tao amin’ny efitrano ambony rihana[17] fitoerany: dia i Petera, i Jôhany, i Jakôba, i Andrea, i Filipo, i Tômà, i Bartôlômeo, i Matio, i Jakôba zanakalahin’i Halfeo, i Simôna Zelôta ary i Jodasy zanakalahin’i Jakôba.

¹⁴Niray fo izy rehetra sady nazoto nivavaka niaraka tamin’ny vehivavy mpino sy i Maria renin’i Jesoa mbamin’ireo rahalahin’i Jesoa[18].

¹⁵Andro vitsivitsy taorian’izany nony tafavory ny mpino miisa tokony ho 120, dia nitsangana teo afovoan’izy rehetra i Petera ka nanao hoe:

¹⁶— Ry havako, tsy maintsy notanterahina izay nambaran’ny Fanahy Masina mialoha ao amin’ny Soratra Masina; fa niteny tamin’ny alalan’i Davida Izy ny amin’i Jodasy[19] izay tonga mpitarika ireo nisambotra an’i Jesoa;

¹⁷anisanay apôstôly ihany i Jodasy ary nandray anjara tamin’izao fanompoanay izao.

¹⁸Koa izany lehilahy izany dia efa nahavidy saha ho an’ny tenany tamin’ny vola azony, tambin’ny heloka vitany; potraka nihohoka izy, nipoaka ny kibony ka nivaroraka daholo ny tsinainy.

¹⁹Fantatry ny mponina rehetra eto Jerosalema izany, hany ka io saha io dia nantsoin-dry zareo amin’ny fiteniny hoe Hakeldamà, izany hoe Sahan-dra[20].

²⁰Fa izao no voalazan’ny Soratra Masina ao amin’ny bokin’ny Salamo: «Aoka ho lao ny tranony, ary aoka tsy honenan’olona akory!» Ary izao koa: «Aoka ho lasan’olon-kafa ny andraikiny[21]!»

²¹Ao ireo lehilahy mpiara-dia taminay nandritra ny andro rehetra nifaneraseran’i Jesoa Tompo taminay,

²²hatramin’ny andro nanaovan’i Jôhany batisa an’i Jesoa ka hatramin’ny andro nanalana Azy taminay sy nampiakarana Azy any an-danitra[22]. Koa amin’ireo no tokony hisy anankiray ho namanay mba ho vavolombelona hanambara fa nitsangana velona i Jesoa Tompo.

²³Nisy roa lahy natokana hifidianana, dia i Jôsefa atao hoe Barsabasy, izay nampiana anarana hoe Imarina, sy i Matià.

²⁴Ary niara-nivavaka izy rehetra nanao hoe: — Ianao no mahalala ny fon’ny olona tsy an-kanavaka, Tompo ô, ka asehoy izay nofidinao tamin’izy roa lahy ireto,

²⁵handray ny toerana amin’izao fanompoana maha apôstôly izao, fa nilaozan’i Jodasy izany hankanesany any amin’ny toerany manokana.

²⁶Dia nanaovana antsapaka izy roa lahy, ary voatendrin’ny antsapaka i Matià, ka dia izy no lany ho naman’ny apôstôly 11 lahy.