Read DIEM PROTESTANTA Asa 12 Bible Online

Asa 12 - DIEM PROTESTANTA bible

Asa 12

¹Tamin’izany fotoana izany, dia nasain’i Herôda[112] mpanjaka nosamborina ny olona sasantsasany anisan’ny Fiangonana mba hampahorîna.

²Novonoiny tamin’ny sabatra i Jakôba rahalahin’i Jôhany;

³ka nony hitany fa sitraky ny Jiosy izany, dia nosamboriny koa i Petera. (Andro fankalazana ny Azima[113] indrindra tamin’izay.)

⁴Rehefa voasambotr’i Herôda i Petera, dia nataony am-ponja; andia-miaramila efatra, misy miaramila efatra avy, no nasain’ity mpanjaka niandraikitra ny fiambenana azy. Nokasain’i Herôda hotsaraina imasom-bahoaka manko izy aorian’ny Paska.

⁵Voatana tao am-ponja àry i Petera, fa ny Fiangonana kosa nivavaka mafy tamin’Andriamanitra ho azy.

⁶Ny alina mialoha ny hitsaran’i Herôda azy ampahibemaso, dia natory teo anelanelana miaramila roa lahy i Petera. Voafatotra gadra vy anankiroa izy, ary teo am-baravaran’ny fonja dia efa nasiana mpiambina.

⁷Dia indro nisy anjelin’ny Tompo tonga teo, ary namirapiratry ny hazavana tao amin’ilay efitry ny fonja. Notohinin’ilay anjely teo amin’ny tehezany i Petera, dia nofohaziny ka nataony hoe: — Mitsangàna faingana! Nilatsaka ho azy ny gadra tamin’ny tanan’i Petera.

⁸Dia hoy ilay anjely taminy: — Misikîna ary anaovy ny kapa. Dia nataon’i Petera izany. Ary hoy koa ilay anjely taminy: — Tafio ny lambanao ary manaraha ahy.

⁹Dia niala tao am-ponja nanaraka an’ilay anjely i Petera. Saingy tsy fantany ho zavatra tena marina izay nataon’ny anjely fa noheveriny ho fahitana fotsiny.

¹⁰Nony efa nandalo ny fiambenana voalohany sy faharoa izy ireo, dia tonga teo amin’ny vavahady vy mahazo ny lalana ho any an-tanàna. Nivoha nidanadana ho azy ilay vavahady ka dia tafavoaka soa aman-tsara izy ireo. Nizotra tamin’izay lalana anankiray izay izy ireo, ary dia nilaozan’ny anjely tampoka i Petera.

¹¹Izay vao nahatsiaro tena i Petera ka nanao hoe: — Fantatro marina izao fa naniraka ny anjeliny tokoa ny Tompo, ka nanafaka ahy teo an-tanan’i Herôda sy tamin’ny ratsy rehetra notetehin’ny vahoaka jiosy.

¹²Nony nazava tsara tamin’i Petera ny toe-javatra, dia lasa izy nankany an-tranon’i Maria, renin’i Jôhany antsoina hoe Marka. Vory maromaro tao ny olona ary nivavaka.

¹³Nandondom-baravarana i Petera ka nisy ankizivavy atao hoe Rôda nanatona hihaino.

¹⁴Vao nahafantatra ny feon’i Petera izy, dia nentin-kafaliana, ka tsy namoha ny varavarana fa lasa nihazakazaka nilaza tamin’ny olona tao an-trano hoe ao am-baravarana ao i Petera.

¹⁵Dia hoy ny olona tamin-drazazavavy: — Lasa adala ity ianao! Nanizingizina i Rôda fa marina izay voalazany. Ka hoy indray ny olona hoe: — Ambiroany izany!

¹⁶Fa naharitra nandondòna ihany i Petera. Nony namoha azy ny tao an-trano ka nahita azy vao talanjona.

¹⁷Nanofahofa tanana hampangina azy ireo kosa i Petera, ka nitantara ny namoahan’ny Tompo azy tao am-ponja. Ary hoy koa izy hoe: — Ambarao amin’i Jakôba[114] sy amin’ny havana iray finoana izany! Dia lasa i Petera nankany an-toeran-kafa.

¹⁸Nony nazava ny andro, dia somaritaka be ihany ny miaramila mpiambina nifanontany momba izay niafaran’i Petera.

¹⁹Nampikarohin’i Herôda izy, nefa tsy hita. Dia nalaina am-bava ireto mpiambina ary nasainy novonoina. Avy eo dia niala tao Jodea i Herôda ka nankany Kesaria ary nipetrapetraka tany.

²⁰Tezitra izaitsizy tamin’ny mponina tany Tiro sy Sidôna i Herôda. Ry zareo kosa anefa niray saina nanatona ny mpanjaka. Rehefa nahazo an’i Blasta mpitandrina ny trano fandrian’ny mpanjaka ho namana izy ireo, dia nangataka hanao raharaham-pihavanana tamin’i Herôda, satria ny tanin’ny mpanjaka no mamatsy ny faritr’i Tiro sy i Sidôna.

²¹Tamin’ny andro voatendry, dia nitafy ny fanamiana maha mpanjaka i Herôda ary nipetraka teo amin’ny sezafiandrianana ka nikabary ampahibemaso tamin’ny solotenan’i Tiro sy i Sidôna.

²²Ary ny vahoaka tafavory niantsoantso hoe: — Andriamanitra izany miteny izany fa tsy mba olombelona[115]!

²³Niaraka tamin’izay dia nisy anjelin’ny Tompo namely an’i Herôda, noho izy nihambo hitovy saranga amin’Andriamanitra; ka dia nohanin-kankana no nahafaty azy[116].

²⁴Ary niely sy niroborobo fatratra kosa ny tenin’Andriamanitra.

²⁵Rehefa nahatontosa ny asa nanirahana azy tany Jerosalema i Barnabà sy i Saoly, dia niverina[117] sady nitondra an’i Jôhany izay antsoina hoe Marka hiaraka aminy!