Read DIEM PROTESTANTA Asa 15 Bible Online

Asa 15 - DIEM PROTESTANTA bible

Asa 15

¹Nisy kristianina sasany nidina avy tany Jodea, tonga tao Antiôkia ka nikatroka nampianatra ny havana iray finoana hoe: «Tsy ho voavonjy ianareo raha tsy foràna araka ny fomba amam-panao voalazan’ny lalànan’i Mosesy[144].»

²Notoherin’i Paoly sy i Barnabà ry zareo ary niadiany hevitra mafy ka izao no nifanarahana: hiakatra any Jerosalema i Paoly sy i Barnabà mbamin’ny olona sasantsasany avy ao Antiôkia mba hifampidinika amin’ny apôstôly sy ny loholona momba izany raharaha iadian-kevitra izany.

³Rehefa novatsîn’ny Fiangonana[145] ry i Paoly, dia lasa namakivaky an’i Fenisia sy i Samaria sady nitantara ombieny ombieny ny fitodihan’ny hafa firenena amin’Andriamanitra, ka nahafaly aoka izany ireo havana rehetra iray finoana.

⁴Nony tonga tao Jerosalema ry i Paoly sy ny namany, dia noraisin’ny Fiangonana sy ny apôstôly ary ny loholona ka nitantara taminy ny zavatra rehetra nampanaovin’Andriamanitra azy ireo.

⁵Fa ny mpino sasany, isan’ny tariky ny Farisianina, dia nitsangana ka nanao hoe: — Tsy maintsy foràna ireo mpino hafa firenena, ka asaina mitandrina ny lalànan’i Mosesy.

⁶Dia nivory ny apôstôly sy ny loholona hifampidinika momba izany raharaha izany.

⁷Taorian’ny ady hevitra naharitra, dia nitsangana i Petera ka nanao hoe: — Ry rahalahy, fantatrareo fa nofidin’Andriamanitra avy eo aminareo aho, efa ela ihany izay, mba hitory ny Vaovao Mahafaly amin’ny hafa firenena ka handrenesany sy hinoany azy.

⁸Ary Andriamanitra, Izay mahalala ny fon’ny olona, no vavolombelona niantoka azy ireo tamin’ny nanomezany azy ny Fanahy Masina, tahaka antsika koa[146].

⁹Tsy nasiany tombo sy hala isika sy ny hafa firenena fa nodioviny fo izy ireo satria nino.

¹⁰Koa nahoana àry no mizaha toetra an’Andriamanitra ianareo ankehitriny ka mampitondra zioga[147] mavesatra ny mpianatra nefa samy tsy nahazaka izany na ny razantsika na ny tenantsika?

¹¹Mino koa isika fa ny fahasoavan’i Jesoa Tompo no amonjena antsika toy ny amonjena azy ireo ihany koa.

¹²Dia nangina ny mpivory rehetra, ka nihaino an’i Barnabà sy i Paoly nitantara ny famantarana sy zava-mahagaga rehetra nampanaovin’Andriamanitra azy tany amin’ny hafa firenena.

¹³Nony vita ny azy roa lahy, dia niteny kosa i Jakôba[148] nanao hoe: — Ry rahalahy, henoy aho!

¹⁴Notantarain’i Simôna[149] teo ny fomba niahian’Andriamanitra ny hafa firenena hatrany am-boalohany, hahazoany vahoaka voatokana ho Azy avy amin’ny hafa firenena.

¹⁵Mifanaraka tsara amin’izany ny tenin’ireo mpaminanin’Andriamanitra, satria izao no voalazan’ny Soratra Masina:

¹⁶«Rehefa afaka izany, dia hiverina Aho, hoy ny Tompo; haoriko indray ilay tranolain’i Davida izay rava, haoriko indray izay nirodana ka hajoroko.

¹⁷Dia hitady ny Tompo ny olona sisa, mbamin’ny hafa firenena rehetra izay efa voatokana ho fananako.

¹⁸Izany no ambaran’ny Tompo, Izay efa nampahafantatra izany zavatra izany hatramin’ny fahagolan-tany[150].»

¹⁹Koa dia izao no hevitro: tsy tokony homentsika fahasahiranana ny hafa firenena mitodika amin’Andriamanitra.

²⁰Fa aoka hanoratantsika izy ka hangatahina tsy hihinana ny hena maloto natao sorona tamin’ny sampy, tsy hanao fifandraisana mamoafady ara-panambadiana, tsy hihinana ny henam-biby tsy nosomindaina, ary hifady ny ra[151].

²¹Satria efa torîna hatramin’ny ela isan-tanàna ary famaky ao amin’ny sinagôga isaky ny sabata ny lalànan’i Mosesy.

²²Tamin’izay dia hitan’ny apôstôly sy ny loholona mbamin’ny Fiangonana manontolo fa mety ny hifidianana solotena avy amin’ny mpivory ka halefa hiara-dia amin’i Paoly sy i Barnabà hankany Antiôkia. Dia voafidy i Joda, atao hoe Barsabasy[152], ary koa i Silasy, samy lehilahy eken-teny teo amin’ny havana iray finoana.

²³Toy izao no vakin’ilay taratasy nampitondraina azy roa lahy: «Izahay apôstôly sy loholona havanareo dia manolotra ny fiarahabana ho anareo havana hafa firenena monina any Antiôkia sy Siria ary Silisia.

²⁴Renay fa misy olona avy atỳ aminay manao fampianarana mampikorontan-tsaina sy mampitebiteby fanahy anareo, kanefa tsy nahazo teny taminay velively.

²⁵Noho izany, dia hitanay fa mety ary lany eranay rehetra ny hifidianana solotena halefa atỳ aminareo. Ireo solotena ireo dia hiaraka amin’i Barnabà sy i Paoly, rahalahy malalanay,

²⁶izay nanao vy very ny ainy ho voninahitr’i Jesoa Kristy Tompontsika.

²⁷Indreny àry irahinay i Joda sy i Silasy hilaza mivantana aminareo izany teny izany koa.

²⁸Fa sitraky ny Fanahy Masina sy ny tenanay ny tsy hampitondra enta-mavesatra anareo, afa-tsy ireto zavatra tsy maintsy hotandremana ireto:

²⁹tsy mihinana ny hena natao sorona tamin’ny sampy; mifady ny ra; tsy mihinana ny henam-biby tsy nosomindaina; ary tsy manao fifandraisana mamoafady ara-panambadiana. Tsara tokoa no ataonareo raha mitandrin-tena tsy hanao izany. Veloma!»

³⁰Dia nalefa ireo iraka mbamin’i Barnabà sy i Paoly ka nidina nankany Antiôkia. Novorîn’izy efa-dahy ny mpino marobe tao an-tanàna ka notolorany an’ilay taratasy.

³¹Novakîna izany ka samy dibo-kafaliana izy rehetra noho ny fampaherezana nentin’ilay taratasy.

³²I Joda sy i Silasy izay samy mpaminany, dia niteny naharitra tamin’ny havana iray finoana ka nampirisika sy nampahery azy ireo.

³³Ary rehefa nitoetra elaela tao Antiôkia izy roa lahy, dia nalefan’ireo hiverina soa aman-tsara any amin’ny naniraka azy. [

³⁴Kanefa sitrak’i Silasy ny hijanona tao.]

³⁵Nitoetra tany Antiôkia kosa i Paoly sy i Barnabà; ary nampianatra sy nitory ny tenin’ny Tompo izy roa lahy mbamin’ny namany maro.

³⁶Rehefa afaka andro vitsivitsy, dia hoy i Paoly tamin’i Barnabà: — Andeha hiverenantsika hovangiana ireo havana iray finoana any amin’ny tanàna rehetra izay efa nitoriantsika ny tenin’ny Tompo mba hahitana izay manjo azy any.

³⁷Tian’i Barnabà hoentina hiara-dia amin’izy roa lahy i Jôhany, ilay atao hoe Marka;

³⁸saingy noheverin’i Paoly fa tsy tokony hoentina izy io satria nandao azy roa lahy tany Pamfilia ka tsy niara-niasa taminy intsony[153].

³⁹Dia nifanditra mafy izy roa lahy ka nisara-dia. I Barnabà moa nitondra an’i Marka, ary niondrana an-tsambo ho any Sipra.

⁴⁰I Paoly kosa nifidy an’i Silasy ho mpiara-miasa, ary niainga rehefa nankinin’ireo havana iray finoana tamin’ny fahasoavan’ny Tompo.

⁴¹Dia lasa ry i Paoly namakivaky an’i Siria sy i Silisia[154] ka nampahery ny Fiangonana rehetra.