Read DIEM PROTESTANTA Asa 23 Bible Online

Asa 23 - DIEM PROTESTANTA bible

Asa 23

¹Nibanjina an’ireo mpitsara i Paoly ka nanao hoe: — Ry rahalahy, nitondra tena teo anatrehan’Andriamanitra tamin-kitsimpo tokoa aho mandraka androany.

²Fa i Hananià[210] mpisorombe kosa nanome baiko ireo olona teo anilan’i Paoly mba hamely tehamaina ny vavany.

³Tamin’izay dia hoy i Paoly tamin’ny mpisorombe: — Andriamanitra kosa hamely anao, ry ilay rindrina milalotra fotsy ivelany ity[211]! Mipetraka mba hitsara ahy araka ny lalàna ianao, kanefa dia fandikan-dalàna ny fanomezanao baiko hamely tehamaina ahy.

⁴Ry zareo teo anilan’i Paoly kosa nilaza taminy hoe: — Maniratsira ny mpisoromben’Andriamanitra ianao!

⁵Fa novalian’i Paoly hoe: — Tsy fantatro, ry rahalahy, fa izy no mpisorombe. Eny, izao tokoa no voalazan’ny Soratra Masina: «Aza miteny ratsy ny lehibem-pirenenao[212].»

⁶Fantatr’i Paoly fa ny sasany tamin’ireo anisan’ny Fitsarana ambony dia Tsadoseanina, ary ny sasany dia Farisianina; izany no niantsoany teo anoloan’izy rehetra hoe: — Ry rahalahy, izaho dia Farisianina, zanaka Farisianina[213]. Noho izaho manantena ny fitsanganan’ny maty no itsarana ahy.

⁷Nony voalazan’i Paoly izany teny izany, dia nifanditra ny Farisianina sy ny Tsadoseanina, ka nizara roa toko ny mpivory.

⁸(Lazain’ny Tsadoseanina mantsy fa tsy misy fitsanganan’ny maty[214], ary tsy misy koa na anjely na fanahy; nefa izany rehetra izany dia eken’ny Farisianina).

⁹Vao mainka nihamafy ny antsoantso; ary ny mpahay lalàna sasany, anisan’ny antoko Farisianina, dia tafatsangana ka nanohitra mafy nanao hoe: — Tsy ahitanay zava-dratsy mihitsy amin’io lehilahy io. Angamba nisy fanahy na anjely niteny taminy.

¹⁰Nihahenjana ny fifandirana ka natahotra ny komandy sao hifandroritan’ny olona i Paoly. Noho izany, dia nomeny baiko ny miaramilany hidina hanaisotra an’i Paoly teo anivon’ny mpivory sy hitondra azy any amin’ny toby.

¹¹Dia niseho tamin’i Paoly ny Tompo ny alin’iny ka nilaza taminy hoe: — Mahereza! Vavolombelona nanambara Ahy teto Jerosalema ianao, ary tsy maintsy ho vavolombelona hanambara Ahy toy izany koa any Rôma.

¹²Ny ampitso maraina, dia nioko ny Jiosy sasantsasany ka nanao velirano fa tsy hihinana na hisotro raha tsy efa nahafaty an’i Paoly.

¹³Nihoatra ny efapolo ny isan’ny mpioko.

¹⁴Dia nankany amin’ny lohandoha-mpisorona sy ny loholona ry zareo ka niteny hoe: — Nanao velirano mihitsy izahay fa tsy hihinana na hisotro raha tsy efa nahafaty an’i Paoly.

¹⁵Ankehitriny àry dia aoka ianareo sy ny Fitsarana ambony hangataka amin’ny komandy mba hitondrany an’i Paoly mankatỳ aminareo, mody hoe te hamotopototra mazavazava kokoa ny momba azy. Izahay kosa dia efa vonona ny hamono azy alohan’ny higadonany eto.

¹⁶Henon’ny zanak’anabavin’i Paoly anefa izany teti-dratsy izany; ka nankany amin’ny toby izy, dia niditra ka nampandre an’i Paoly.

¹⁷Dia niantso ny anankiray tamin’ireo kapiteny i Paoly ka nanao taminy hoe: — Mba tariho ho any amin’ny komandy ity tovolahy ity fa misy zavatra holazainy aminy.

¹⁸Dia nitondra ilay tovolahy nankao amin’ny komandy ilay kapiteny sady niteny hoe: — Niantso ahy i Paoly mpifatotra, ka nangataka ahy hitondra ity tovolahy ity atỳ aminao fa misy zavatra holazainy aminao.

¹⁹Dia nandray ny tanan’ilay tovolahy ny komandy ka nitondra azy hitokana ary nanontany azy hoe: — Inona izato holazainao amiko?

²⁰Dia hoy izy: — Nifanaiky ny Jiosy fa hangataka ny hitondranao an’i Paoly hankao amin’ny Fitsarana ambony rahampitso, mody hoe te hanadihady mazavazava kokoa ny momba azy.

²¹Nefa aza manaiky azy ireo ianao! Misy Jiosy mihoatra ny efapolo lahy manko miteti-dratsy hamely an’i Paoly. Nanao velirano izy efapolo lahy fa tsy hihinana na hisotro raha tsy efa nahafaty azy. Vonona izao ry zareo, fa ny valin-teninao no andrasany.

²²Dia nalefan’ny komandy handeha ilay tovolahy nony avy nofeperany hoe: — Aza lazalazaina amin’olona fa efa nambaranao ahy izany.

²³Nantsoin’ny komandy ny roa lahy tamin’ireo kapiteny ka nilazany hoe: — Manomàna miaramila an-tongotra 200 lahy, sy miaramila an-tsoavaly 70 ary mpitan-defona 200 ka samia vonona hiainga anio amin’ny sivy alina hankany Kesaria.

²⁴Anomano soavaly koa hitaingenan’i Paoly, hahatonga azy soa aman-tsara any amin’i Feliksa governora[215].

²⁵Ary toy izao ny taratasy nosoratan’ny komandy:

²⁶«Izaho Klaody Lisia dia manolotra ny fiarahabana ho anao Andriamatoa hajaina, Feliksa governora.

²⁷Nosamborin’ny Jiosy ity lehilahy ity ary efa ndeha hovonoiny no fantatro fa mizaka ny zom-pirenena rômanina: dia nitondra miaramila aho ka nanafaka azy.

²⁸Ary satria te hahalala izay anton’ny niampangan’ny Jiosy azy aho, dia nentiko teo anatrehan’ny Fitsarana ambony izy.

²⁹Hitako fa adihevitra momba ny lalànan-dry zareo no niampangany azy, fa tsy nisy fiampangana tokony hanamelohana azy ho faty na hanaovana azy am-ponja.

³⁰Nony nampahafantarina ahy fa nioko hamono azy ny Jiosy, dia nanapa-kevitra niaraka tamin’izay aho, handefa azy mankatỳ aminao; ary ny mpiampanga azy dia nasaiko hanao ny fitoriany aminao[216].»

³¹Araka ny baiko azony, dia nalain’ireo miaramila i Paoly ka iny alina iny ihany dia nentiny tany Antipatrida.

³²Nony ampitso, dia niverina nody ny miaramila an-tongotra, fa ny miaramila an-tsoavaly no navelany hanohy ny dia miaraka amin’i Paoly.

³³Vao tonga tany Kesaria, dia natolotr’ireo miaramila an-tsoavaly tamin’ny governora ilay taratasy ary narosony teo anoloany koa i Paoly.

³⁴Rehefa voavakin’ny governora ny taratasy, dia nanontaniany izay faritany fiavian’i Paoly; ka nony fantany fa avy any Silisia i Paoly,

³⁵dia hoy izy hoe: — Hihaino anao aho rehefa tonga ny mpiampanga anao. Dia nasain’ny governora nambenana tao an-dapan’i Herôda[217] i Paoly.