Read DIEM PROTESTANTA Asa 25 Bible Online

Asa 25 - DIEM PROTESTANTA bible

Asa 25

¹Telo andro taorian’ny nahatongavan’i Festo tao amin’ny faritany, dia niainga avy ao Kesaria izy ho any Jerosalema.

²Tonga teo aminy hiampanga an’i Paoly ny lohandoha-mpisorona sy ny loholona jiosy. Nitaky tombontsoa tamin’i Festo ry zareo ary niangavy azy,

³mba hampaka an’i Paoly ho atỳ Jerosalema; efa niray teti-dratsy manko izy rehetra mba hamono azy eny an-dalana.

⁴Nefa namaly i Festo fa i Paoly dia am-ponja any Kesaria, ary ny tenany rahateo dia hiverina tsy ho ela.

⁵Ary hoy koa izy: — Aoka hiara-midina amiko any Kesaria ny lehibenareo ka any no hiampangany an’izany lehilahy izany raha nisy ratsy vitany.

⁶Nandritra ny valo na folo andro monja no niarahan’i Festo tamin-dry zareo, dia niverina tany Kesaria izy. Ny ampitson’ny nahatafaverina azy ihany, dia nipetraka teo amin’ny fitsarana izy ary nampaka an’i Paoly.

⁷Nony tonga i Paoly, dia nohodidin’ireo Jiosy nidina avy tany Jerosalema ka nampangainy ho nahavita fahadisoana maro sady lehibe, nefa tsy hain-dry zareo porofoina akory.

⁸Niaro tena kosa i Paoly ka nanao hoe: — Tsy misy fahadisoako na tamin’ny lalànan’ny Jiosy na tamin’ny tempoly na tamin’ny amperôra rômanina.

⁹Nila sitraka tamin’ny Jiosy anefa i Festo ka nanontany an’i Paoly hoe: — Tianao ve ny hiakatra any Jerosalema ka hotsaraina any eo anatrehako ny momba ity raharaha ity?

¹⁰Fa novalian’i Paoly hoe: — Eto amin’ny fitsaran’ny amperôra rômanina izay tokony hitsarana ahy no ijoroako. Tsy nanisy ratsy ny Jiosy aho, ka na ianao aza dia mahalala izany tsara tokoa.

¹¹Koa raha meloka aho sy nahavita ratsy mahamendrika ahy ho voaheloka ho faty, dia tsy laviko ny ho faty. Fa raha tsy misy marina kosa ny fiampangana ataon-dry zareo ahy, dia tsy azon’iza na iza atolotra azy aho. Akariko amin’ny amperôra rômanina ny raharaha[225].

¹²Nony avy nifampidinika tamin’ny mpanolotsaina i Festo, dia nanao hoe: — Nampiakarinao amin’ny amperôra rômanina ny raharaha, ka dia ho any amin’ny amperôra rômanina ianao.

¹³Nony afaka andro vitsivitsy, dia tonga tany Kesaria i Agripà mpanjaka sy i Berenîka anabaviny hiarahaba an’i Festo[226].

¹⁴Koa satria naharitra andro maro no nitoerany tao, dia novelabelarin’i Festo tamin’ny mpanjaka ny raharahan’i Paoly: — Misy lehilahy izay navelan’i Feliksa ho mpifatotra ao.

¹⁵Fony aho tany Jerosalema, dia tonga teo amiko ny lohandoha-mpisorona sy ny loholona jiosy hiampanga azy ary niangavy ahy hanameloka azy.

¹⁶Fa izao no navaliko an-dry zareo: «Tsy fanaon’ny Rômanina ny manameloka olona raha tsy efa nampifanatrehina tamin’ny mpiampanga ny ampangaina ary nahazo niaro tena nanohitra ny fiampangana.»

¹⁷Ka dia tonga teto niaraka tamiko izy rehetra. Tsy nangataka andro aho fa ny ampitson’iny ihany dia nipetraka teo amin’ny fitsarana aho ka nasaiko nalaina ralehilahy.

¹⁸Nony nitsangana ireo mpiampanga, dia tsy nisy zava-dratsy araka izay nampoiziko nitoriany azy.

¹⁹Ny niadiany hevitra tamin’i Paoly dia momba ny fivavahany sy izany Jesoa efa maty izany saingy nolazain’i Paoly hoe velona.

²⁰Very hevitra aho ny amin’ny hamotopotorana izany raharaha izany, ka dia nanontaniako i Paoly raha tiany ny hankany Jerosalema hotsaraina any momba izany raharaha izany.

²¹Nefa moa nampiakatra ny raharaha i Paoly mba ho ny amperôra rômanina no ho tompon’ny teny farany momba azy. Dia nasaiko nambenana izy mandra-pahazoako handefa azy any amin’ny amperôra rômanina.

²²Dia hoy i Agripà tamin’i Festo: — Mba te handre izany lehilahy izany koa aho! Ary novalian’i Festo hoe: — Handre azy ianao rahampitso!

²³Nony ampitso, dia tonga i Agripà sy i Berenîka, nianjaika tokoa araka ny fiandrianany be voninahitra. Niditra tao amin’ny efitra fitsarana izy mianadahy narahin’ny komandin’ny tafika sy ny olo-manan-kaja tao an-tanàna. Dia nasain’i Festo nalaina i Paoly ka nentiny nankeo.

²⁴Ary hoy i Festo: — Ry Agripà mpanjaka sy ianareo rehetra manatrika etoana, io lehilahy hitanareo io dia nampangain’ny Jiosy marobe tamiko, na tany Jerosalema na teto, ka nantsoantsoiny hoe tsy tokony ho velona intsony.

²⁵Tsy hitako akory izay ratsy vitany mahamendrika azy ho voaheloka faty. Kanefa moa izy ihany no nampiakatra ny raharahany amin’ny amperôra rômanina, dia tapa-kevitra aho handefa azy any aminy!

²⁶Tsy manan-javatra mazava tsara momba azy hatao an-tsoratra ho an’ny amperôra rômanina aho; koa dia entiko eto anatrehanareo izy, indrindra fa eto anatrehanao, ry Agripà mpanjaka; ka rehefa avy nalaina am-bava izy, dia mba hanan-javatra hatao an-tsoratra aho.

²⁷Tsy fahendrena manko, araka ny hevitro, ny mampanatitra mpifatotra raha tsy tondroina tsara ny zavatra iampangana azy.