Read DIEM PROTESTANTA Rômanina 3 Bible Online

Rômanina 3 - DIEM PROTESTANTA bible

Rômanina 3

¹Misy tombony àry ve ny maha Jiosy? Misy mahasoa ve ny famorana?

²Eny, misy maro tokoa amin’ny lafiny rehetra. Voalohany, ry zareo Jiosy no nanankinan’Andriamanitra ny teny izay nambàrany.

³Fa ahoana kosa ny amin’izay tsy nahatoky tamin’ireo Jiosy ireo? Noho ireny tsy nahatoky ireny ve no hampiova an’Andriamanitra ka hahatonga an’Andriamanitra ho tsy mahatoky?

⁴Sanatria! Fa tsy maintsy azo antoka Andriamanitra na dia mpandainga avokoa aza ny olona, araka ny voalazan’ny Soratra Masina hoe: «Hoekena ho marina Ianao raha miteny, ary handresy lahatra raha alaina am-bava[13]!»

⁵Koa raha asehon’ny tsy rariny vitantsika fa marina Andriamanitra, inona no holazaintsika? Zavatra tsy rariny ve ny ataon’Andriamanitra raha ampihariny amintsika ny hatezerany? (Araka ny fiheveran’ny besinimaro no itenenako).

⁶Sanatria izany! Fa raha zavatra tsy rariny no ampiharin’Andriamanitra, hataony ahoana no fitsara an’izao tontolo izao?

⁷Raha ohatra kosa ny laingako no vao mainka maneho an’Andriamanitra ho azo antoka sy mampitombo ny voninahiny, nahoana no mbola melohina ho mpanota aho?

⁸Ary ahoana no tsy ahazoana manao hoe: «Ndeha hanao ratsy hiavian’ny soa»? Misy tokoa manendrikendrika ahy ho mpilaza izany; mendrika hohelohina ireo olona ireo!

⁹Ahoana àry? Manan-tombony amin’ny hafa firenena tokoa ve isika Jiosy? Tsia dia tsia! Efa voalazako fa samy eo ambany fahefan’ny fahotana avokoa na Jiosy na hafa firenena,

¹⁰araka ny voalazan’ny Soratra Masina hoe: «Tsy misy olo-marina, na dia iray akory aza;

¹¹tsy misy manam-pahalalana; tsy misy mitady an’Andriamanitra.

¹²Be siasia avokoa izy rehetra ary samy tsy misy antony; tsy misy manao ny tsara, na dia iray akory aza.»

¹³«Fasana misokatra ny tendany: entiny mamitaka ny lelany.» «Poizina menarana ny teniny»;

¹⁴«ozona sy teny mangidy no mameno ny vavany!»

¹⁵«Mailaka erỳ izy raha ndeha handatsaka aina,

¹⁶ka mandrava sy mampahory amin’izay alehany;

¹⁷ny lalana mitondra amin’ny fiadanana tsy fantany!»

¹⁸«Ny tahotra an’Andriamanitra, tsy ananany mihitsy[14]!»

¹⁹Fantatsika kosa fa izay rehetra voalaza ao amin’ny lalàna dia voalaza ho an’izay eo ambanin’io lalàna io. Noho izany, dia tsy hisy hanan-kalahatra eo anatrehan’Andriamanitra; ary izao tontolo izao no hiaiky fa diso eo anoloany.

²⁰Koa tsy misy olombelona hoeken’Andriamanitra ho marina[15], noho izy manatanteraka ny lalàna; fa ny lalàna dia miasa hahafantaran’ny olombelona mazava hoe nanota izy.

²¹Ankehitriny kosa dia efa nahariharin’Andriamanitra ny fomba anekeny antsika ho marina[16]; ary tsy avy amin’ny lalàna velively izany. Ny lalànan’i Mosesy mbamin’ireo bokin’ny mpaminany rahateo dia efa mijoro ho vavolombelona manambara

²²fa ny finoana niainan’i Jesoa Kristy no haneken’Andriamanitra ny olombelona ho marina; ary mankamin’ny mpino rehetra izany, satria tsy misy fanavakavahana intsony.

²³Eny, nanota ny olon-drehetra ka tsy eo afovoan’izy ireo intsony ilay Andriamanitra be voninahitra.

²⁴Kanefa, noho ny fahasoavan’Andriamanitra, dia nekeny maimaimpoana ho marina izy ireo tamin’ny alalan’ny fanavotana izay ao amin’i Kristy Jesoa.

²⁵Fa notendren’Andriamanitra ho sorom-panonerana ho an’ireo manam-pinoana i Kristy Jesoa Izay nahafoy ny rany: izany no maneho ny fomba aneken’Andriamanitra ny olombelona ho marina! Ireo heloka vitan’ny olombelona fahiny dia noleferin’Andriamanitra

²⁶ary tsy nosazîny, satria tiana haseho ankehitriny ny fomba aneken’Andriamanitra ny olombelona ho marina. Hita amin’izany fa marina tokoa Andriamanitra sady mahatonga ho marina izay entanin’ny finoana niainan’i Jesoa!

²⁷Koa misy antony hireharehan’ny olona ve? Efa nofoanana izany. Satria nahoana? Noho ny olona manatanteraka ny lalàna ve? Tsia, fa noho ny olona manam-pinoana.

²⁸Miaiky manko isika fa ny olona manam-pinoana no eken’Andriamanitra ho marina, fa tsy izay manatanteraka ny lalàna.

²⁹Sa Andriamanitry ny Jiosy ihany ve Andriamanitra? Moa tsy Andriamanitry ny hafa firenena koa ve? Eny, Andriamanitry ny hafa firenena koa Izy,

³⁰satria tokana ihany Andriamanitra[17]; ka ny Jiosy dia ekeny ho marina noho izy ireo mino; ary ny hafa firenena dia ekeny ho marina noho izy ireo mino ihany koa.

³¹Moa ve manafoana ny lalàna amin’ny alalan’ny finoana isika amin’izany? Sanatria! Vao mainka koa aza manamafy orina ny lalàna!