Read DIEM PROTESTANTA 1 Kôrintianina 16 Bible Online

1 Kôrintianina 16 - DIEM PROTESTANTA bible

1 Kôrintianina 16

¹Momba ny famoriam-bola atao ho an’ny vahoakan’Andriamanitra any Jerosalema[89], dia izao: mba manaova koa ianareo, araka ireo fepetra nasaiko narahin’ny Fiangonana rehetra any Galatia.

²Isan’alahady dia samia mba manokana vola ao aminy avy arakaraka izay vola miditra ka hitahiry izany, mba tsy hilaina intsony ny hamoriam-bola amin’ny fahatongavako.

³Ary rehefa tonga aho, dia izay olona sitrakareo no hirahiko sy hampombaiko taratasy mba hitondra ny fanomezanareo hankany Jerosalema.

⁴Raha ilaina moa ny handehanako any, dia hiara-dia izahay.

⁵Hankatỳ aminareo aho rehefa avy niteny an’i Masedônia (fa hitety io faritany io aho[90]).

⁶Angamba hitoetra maharitra eo aminareo aho na handany ny ririnina mihitsy aza; ka dia ianareo no hamatsy ahy sy hanatitra ahy any amin’izay toerana tokony halehako.

⁷Fa tsy mikasa hitsidika anareo mandalo fotsiny aho, satria manantena hitoetra eo aminareo fotoana maharitraritra raha sitrapon’ny Tompo.

⁸Kanefa mbola hijanona eto Efeso aho mandra-piavin’ny Pentekôsta;

⁹satria varavarana lehibe no misokatra ho ahy hahazoako miasa tsara eto, na dia maro aza ny mpanohitra[91].

¹⁰Rehefa tonga i Timôty[92], dia mba ataovy izay hahatsapany fa tsara fandray azy ianareo; satria miasa tahaka ahy koa izy amin’ny asan’ny Tompo.

¹¹Aoka mba tsy hisy hanao tsinontsinona azy. Omeo vatsy izy ary atero mba ho tonga soa aman-tsara atỳ amiko, fa miandry azy aho sy ireo havana iray finoana eto.

¹²Fa i Apôlao havantsika kosa dia nampirisihiko matetika hankatỳ aminareo miaraka amin’ny havana sasany iray finoana; saingy tsy tiany hatao mihitsy izany ankehitriny[93], fa ho avy ihany izy rehefa misy hahafahany.

¹³Miambena ianareo, mamahara tsara amin’ny finoana, aoka hitombandahy, mahereza.

¹⁴Ataovy amim-pitiavana ny zavatra rehetra.

¹⁵Fantatrareo ry i Stefanasy mianakavy[94]: ireo no kristianina voalohany tany Akaîa sady nanokan-tena hanampy ny vahoakan’Andriamanitra. Mangataka anareo aho, ry havako,

¹⁶mba hanaiky tsara ny olona tahaka ireny mbamin’izay rehetra miara-miasa sy miara-misasatra aminy.

¹⁷Mahafaly ahy ny fahatongavan’i Stefanasy sy i Fôrtnato ary i Akaîko, fa ireo no nahefa ny tsy vitanareo.

¹⁸Sady namelombelona ahy izy telo lahy no namelombelona anareo. Koa mahaiza mankasitraka ny olona tahaka ireny.

¹⁹Manao veloma anareo ireo Fiangonana atỳ amin’ny faritany Azia. Noho isika tafaray amin’ny Tompo, dia manao veloma anareo i Akoilà sy i Prisila[95] mbamin’ny Fiangonana mivory ao an-tranony.

²⁰Manao veloma anareo ireo havana rehetra iray finoana eto. Mifanaova veloma amin’ny fanoroham-pihavanana.

²¹Soratanako izao teny izao: Veloma, hoy i Paoly.

²²Raha misy tsy manam-pitiavana ny Tompo, aoka izy ho voaozona! Maràna tha — Avia, ry Tomponay ô[96]!

²³Homba anareo anie ny fahasoavan’i Jesoa Tompo!

²⁴Momba anareo rehetra izay tafaray amin’i Kristy Jesoa ny fitiavako!