Read DIEM PROTESTANTA 2 Kôrintianina 10 Bible Online

2 Kôrintianina 10 - DIEM PROTESTANTA bible

2 Kôrintianina 10

¹Izaho Paoly mihitsy no manainga anareo, dia izaho izay lazaina fa manetry tena rehefa manoloana anareo, nefa henjana aminareo rehefa lavitra anareo. Miangavy anareo amin’ny fahalemem-panahy sy hamoram-pon’i Kristy aho:

²aoka re aho mba tsy ho voatery hanao teny henjana amin’ny hahatongavako atỳ aminareo; fa mikasa hihenjana amim-pahasahiana tokoa aho amin’ny olona sasany, izay mihevitra fa manao fitondrantena araka ny fisainan’olombelona izahay.

³Na dia ao anatin’ny fiainana maha olombelona aza izahay, dia tsy araka ny fisainan’olombelona no iadianay;

⁴satria tsy fitaovam-piadiana malemy, araka ny an’ny olombelona, no entinay miady; fa fitaovam-piadiana mahery, araka an’Andriamanitra, mba hoenti-mandrava mànda. Ravànay ny hevitra diso

⁵sy feno avonavona rehetra, izay atsangana hanohitra ny fahalalana an’Andriamanitra; ary babonay hanaiky an’i Kristy ny olona rehetra mahitsy fieritreretana.

⁶Vonona hanafay ny tsy mpanota rehetra izahay, rehefa mampiseho fanoavana tanteraka ianareo.

⁷Mijery zavatra araka ny fisehony ivelany ihany ianareo! Raha misy olona matoky tena fa an’i Kristy, dia izao indray no aoka hosaintsaininy: tahaka ny maha an’i Kristy azy no maha an’i Kristy anay koa.

⁸Ary tsy hahazo henatra aho na dia ireharehako somary tafahoatra aza ny fahefana nomen’ny Tompo anay, dia fahefana hampandrosoana ny Fiangonanareo fa tsy handravana azy.

⁹Tsy te hiseho ho toy ny hoe mampitahotra anareo aho amin’ireto taratasy soratako; fa misy manao hoe:

¹⁰«Mafonja sy mahery vaika ireo taratasin’i Paoly; nefa rehefa mby eto aminay izy tenany, dia olona osa ary ny teniny dia tsinontsinona.»

¹¹Izao no aoka hosaintsainin’ilay miteny toy izany: sahala amin’izay soratanay an-taratasy raha lavitra izahay, no hataonay rehefa tonga izahay.

¹²Marina tokoa fa tsy sahinay ny hampitovy na hampitaha ny tenanay amin’ny olona sasany midera tena; satria tsy hendry ireny, fa manohatra tena amin’ny tenany ihany ary mampitaha tena amin’ny tenany ihany.

¹³Izahay kosa tsy mba hirehareha mihoa-pampana, fa dia araka ny fenitry ny asa voafaritr’Andriamanitra ho anjaranay, ka nahatongavanay hatratỳ aminareo.

¹⁴Fa tsy toy ny olona tsy tonga hatratỳ aminareo izahay, ka hoe nihoatra ny faritra natao ho anay; tonga hatratỳ aminareo tokoa izahay nitondra ny Vaovao Mahafaly momba an’i Kristy.

¹⁵Tsy mirehareha mihoa-pampana izahay, ka hirehareha amin’ny asa nataon’ny sasany; fa izao no antenainay: rehefa mitombo ny finoanareo, dia hitatra hatrany hatrany eo aminareo koa ny asanay, araka ny fenitra napetrak’Andriamanitra ho anay[42].

¹⁶Avy eo dia hitory ny Vaovao Mahafaly amin’ireo faritany ivelan’ny anareo izahay, ka tsy hirehareha amin’izay efa vitan’ny sasany eo amin’ny faritra sahaniny.

¹⁷Fa hoy ny Soratra Masina hoe: «Izay mirehareha dia ny nataon’ny Tompo no aoka hireharehany[43]»;

¹⁸satria tsy izay midera tena no olona voazaha toetra, fa izay derain’ny Tompo.