Read DIEM PROTESTANTA 2 Kôrintianina 11 Bible Online

2 Kôrintianina 11 - DIEM PROTESTANTA bible

2 Kôrintianina 11

¹Enga anie ka mba handefitra amiko ianareo amin’izao hadalana kely izao! Eny, mandefera amiko[44] ianareo!

²Saro-piaro momba anareo aho, ary fahasaro-piaro avy amin’Andriamanitra izany; satria ianareo dia toy ny virijiny madio atolotra ho fofombadin’ny lehilahy anankiray, dia i Kristy.

³Saingy atahorako fandrao hihasimba ny toe-tsainareo, ka hilaozanareo ny firaiketam-po mahitsy sy madio amin’i Kristy, tahaka ny nahavoafitaka an’i Eva tamin’ny lainga tsara lahatra nataon’ny bibilava[45].

⁴Eny, leferinareo tsara raha misy olona tonga mitory Jesoa hafa noho ilay Jesoa notorînay; ary ianareo toa vonon-kandray fanahy hafa noho ilay Fanahy Masina efa azonareo, na vonon-kandray vaovao mahafaly hafa noho ilay Vaovao Mahafaly efa noraisinareo.

⁵Heveriko fa tsy misy mahalatsa-danja ahy velively amin’ireo apôstôly fanaperana ireo.

⁶Na tsy ampy fahaiza-mandahateny aza aho, dia ampy fahalalana; nasehonay mazava tsara mandrakariva tamin’ny zavatra rehetra izany mba hahasoa anareo.

⁷Fony aho nitory taminareo ny Vaovao Mahafaly avy amin’Andriamanitra, dia nanao izany maimaimpoana aho; moa diso ve aho, raha nanetry tena mba hisandratanareo?

⁸Nekeko ny nandoavan’ny Fiangonana sasany vola tamiko, ka tahaka ny hoe nandroba azy ireo aho mba hanampiako anareo[46].

⁹Fony teo aminareo aho, dia tsy nanahirana na iza na iza raha nisy zavatra nilaiko, satria ireo havana kristianina avy any Masedônia no nanome ahy ny zavatra nilaiko[47]; ary tamin’ny zavatra rehetra dia nitandrina tsara izay tsy hanahirana anareo aho sady mbola hitandrina izany ihany.

¹⁰I Kristy Izay ato amiko dia milaza ny marina hatrany, ka milaza marina aho fa tsy azo esorina amiko izany reharehako izany eran’ny faritany Akaîa.

¹¹Ahoana moa no ilazako izany? Satria tsy tiako ve ianareo? Andriamanitra no mahalala fa tiako ianareo!

¹²Hataoko hatrany izao fanaoko izao, mba tsy hanan-kolazaina ry zareo te ho hita fa manahaka anay amin’izay ireharehany.

¹³Apôstôly sandoka izy ireny, milaza lainga momba izay ataony, ka miova endrika[48] ho apôstôlin’i Kristy.

¹⁴Tsy mahagaga izany satria hain’i Satàna aza ny miova endrika ho anjely mamirapiratra.

¹⁵Koa tsy sarotra ho an’ireo mpanompon’i Satàna ny miova endrika ho mpanompon’ilay Andriamanitra marina; kanefa ny hiafaran’ireo dia ho araka ny asany ihany.

¹⁶Antitranteriko ihany: aoka tsy hisy hanao ahy ho adala! Kanefa raha izany no iheveranareo ahy, dia raiso toy ny adala aho, mba hahazoako mirehareha kely koa.

¹⁷Izay lazaiko izao dia tsy araka ny Tompo no ilazako azy; fa miteny toy ny adala aho amin’izao toe-javatra ireharehako izao.

¹⁸Satria maro no mirehareha araka ny maha olombelona, dia mba hirehareha araka izany koa aho.

¹⁹Fa hendry ianareo ka sitrakareo ny handefitra amin’ireo adala.

²⁰Eny, leferinareo raha misy manandevo anareo, raha misy mandàny anareo, raha misy maka ny anareo, raha misy manao zinona anareo, raha misy mamely ny tavanareo.

²¹Hanalam-baràka ny tenanay no ilazako ho: osa loatra izahay ka tsy nahavita izany! Kanefa izay sahin’ny olona lazaina — miteny toy ny adala aho — dia mba sahiko lazaina koa.

²²Hebreo ve ireo apôstôly sandoka ireo? Izaho koa! Israelita ve izy ireo? izaho koa! Taranak’i Abrahama ve izy ireo? Izaho koa[49].

²³Mpanompon’i Kristy ve izy ireo? Hiteny toy ny very saina aho: eny, mpanompon’i Kristy koa aho, ary mihoatra noho izy ireo; fa nisasatra mafy kokoa aho, natao am-ponja matetika kokoa, nokapohina bebe kokoa, tambavahoana imbetsaka kokoa.

²⁴Indimy nokapohin’ny Jiosy aho, ka nandalasina in-39 misesy isaky ny mandeha[50];

²⁵intelo nokaravasîn’ny Rômanina aho, ary indray maka saika matin’ny tora-bato[51]; intelo vaky sambo aho, ary efa tavela teo anivon-dranomasina indray andro sy indray alina maninjitra.

²⁶Matetika nanao dia an-tongotra aho ka efa tojo ny loza isan-karazany: loza tamin’ny ony tondraka, loza tamin’ny jiolahy, loza avy amin’ny Jiosy mpiray firenena[52] amiko, loza avy amin’ny hafa firenena, loza tao an-tanàna, loza tany an-taniefitra, loza teny an-dranomasina, loza teo anivon’ny misandoka ho havana kristianina.

²⁷Niasa mafy sy nisasatra aho, niari-tory matetika, nijalin’ny hanoanana sy hetaheta, tsy nitendry hanina matetika, niaritra hatsiaka sady tsy nanan-kitafy.

²⁸Ankoatra izay tsy voalaza, dia mbola mitambesatra amiko isan’andro vaky ny fiahiana ny Fiangonana rehetra.

²⁹Iza no malemy, ka tsy malemy aho? Iza no lavo tamin’ny fahotana, ka tsy malahelo mafy aho?

³⁰Raha tsy maintsy mirehareha aho, dia ireo zavatra mampiharihary ny fahalemeko no hataoko rehareha.

³¹Andriamanitra, Rain’i Jesoa Tompo, Ilay ankalazaina mandrakizay, dia mahalala fa tsy mandainga aho.

³²Fony tany Damasy aho, ny governora notendren’i Hareta mpanjaka dia nampiambina ny tanàna Damasy mba hisamborana ahy.

³³Fa nisy nampidina ahy an-tsobika avy teo amin’ny varavarankelin’ny mànda, ka dia afa-nandositra ny tanan’i Hareta aho[53].