Read DIEM PROTESTANTA 2 Kôrintianina 4 Bible Online

2 Kôrintianina 4 - DIEM PROTESTANTA bible

2 Kôrintianina 4

¹Izahay no manana izany fanompoana izany, dia noho ny indrafon’Andriamanitra taminay; koa tsy mety ketraka izahay.

²Efa nolavinay ny asa miafina mahamenatra, ka tsy manao zavatra amin-kafetsena izahay sady tsy manatsatso ny tenin’Andriamanitra; fa asehonay mazava tsara ny marina, ka eo imason’Andriamanitra dia tonga mendrika hitokian’ny fieritreretan’ny olona rehetra izahay.

³Fa raha saronan-javatra ny Vaovao Mahafaly torînay, dia saronan-javatra amin’izay ho very.

⁴Tsy mino izy ireo, satria ny sainy efa nohajambain’i Satàna zanahary tompoin’izao tontolo izao[19]; hany ka voasakana izy ireo tsy hahita ny fahazavàn’ny Vaovao Mahafaly momba ny voninahitr’i Kristy, ilay tena endrik’Andriamanitra.

⁵Tsy ny tenanay manko no ambaranay rehefa mitoriteny izahay, fa i Jesoa Kristy Tompo; izahay kosa dia milaza ny tenanay ho mpanomponareo noho ny amin’i Jesoa.

⁶Fa Andriamanitra, Izay nandidy hoe: «Aoka ny mazava hamirapiratra avy ao anaty haizina[20]», no nampamirapiratra ny mazava ao am-ponay, mba hampisehoanay ny fahalalana ny voninahitr’Andriamanitra, izay hita eo amin’ny tavan’i Jesoa Kristy.

⁷Izahay mitondra izany raki-tsoa izany kosa dia toy ny vilany tany ihany, mba hahitana tsara fa izao hery tsy manan-tsahala izao dia an’Andriamanitra fa tsy anay.

⁸Ifandaharam-pahoriana izahay, nefa tsy voapotsitra; very hevitra, nefa tsy mamoy fo;

⁹enjehin’olona, nefa tsy ilaozan’Andriamanitra; azera, nefa tsy maty.

¹⁰Entinay mandrakariva ao amin’ny tenanay koa fa velona i Jesoa;

¹¹satria, eo amin’ny fiainanay, dia ny fahafatesana no mananontanona anay lalandava noho ny amin’i Jesoa mba haseho ao amin’ny tenanay mety maty koa fa velona i Jesoa,

¹²hany ka ny fahafatesana no miasa ao aminay, fa ny fiainana no miasa ao aminareo.

¹³Hoy ny Soratra Masina: «Nino aho, ka izany no nitenenako[21].» Noho izahay manana io finoana omen’ny Fanahy Masina io, dia mino koa izahay ka izany no itenenanay.

¹⁴Fantatray fa Andriamanitra, Izay nanangana an’i Jesoa Tompo ho velona, dia hanangana anay koa ho velona miaraka amin’i Jesoa, ary hametraka anay mbaminareo ho eo akaikiny.

¹⁵Eny, noho ny aminareo avokoa izany rehetra izany, ka dia mihamaro ny olona tratran’ny fahasoavana mba hitomboan’ny vavaka fisaorana ho voninahitr’Andriamanitra.

¹⁶Izany no tsy mahaketraka anay, fa na dia mihalevona aza ny maha olona eto ivelany, dia mihavao isan’andro kosa ny maha olona ao anaty:

¹⁷satria ny fahoriana maivana sy mandalo mihatra aminay dia miasa manomana voninahitra lehibe mihoa-pampana sady maharitra mandrakizay,

¹⁸raha tsy mibanjina ny hita izahay, fa ny tsy hita. Ny hita manko dia miserana ihany, fa ny tsy hita no maharitra mandrakizay.