Read DIEM PROTESTANTA 2 Kôrintianina 8 Bible Online

2 Kôrintianina 8 - DIEM PROTESTANTA bible

2 Kôrintianina 8

¹Tianay hampahafantarina anareo, ry havana, ny fahasoavana nomen’Andriamanitra tao amin’ireo Fiangonana any Masedônia.

²Voasedra mafy tamin’ny fahoriana nahazo azy ny mpino, kanefa lehibe tokoa ny hafaliany ary nahafoy mihitsy izy ireo tamin’ny famoriam-bola, na dia tena mahantra aza.

³Vavolombelona nahita aho fa nanome araka izay zakany ry zareo, eny mihoatra noho izay zakany aza; nahim-pony

⁴no niangaviany mafy taminay mba hahazo tombon-tsoa handray anjara amin’ny fanasoavana ny vahoakan’Andriamanitra any Jodea[33].

⁵Nanao mihoatra noho izay nantenainay izy ireo, fa nanolo-tena ho an’ny Tompo aloha, ary ho anay koa noho ny sitrapon’Andriamanitra.

⁶Ka dia niangavianay i Tito hankatỳ aminareo hahatomombana izany asa fanasoavana izany, araka ny efa nanombohany azy teo aloha.

⁷Manam-be tokoa ianareo amin’ny zavatra rehetra: dia amin’ny finoana, amin’ny teny, amin’ny fahalalana, amin’ny fahazotoana isan-karazany, ary amin’ilay fitiavana raisinareo avy aminay[34]; araka izany koa no aoka hahafoizanareo be amin’izao asa soa izao.

⁸Tsy milaza izany ho didy aho, fa ny fahazotoana asehon’ny sasany no hitsapako raha fitiavana mangarangarana ny anareo.

⁹Satria fantatrareo ny fahasoavan’i Jesoa Kristy Tompontsika: fa na dia nanankarena aza Izy, dia tonga mahantra noho ny aminareo[35], mba hampanankarena anareo ny fahantrany.

¹⁰Ambarako aminareo izay hevitro ny amin’izany raharaha izany: mahasoa anareo izany, satria lohalaharana ianareo tsy tamin’ny firotsahana hanao azy fotsiny fa tamin’ny fanapahan-kevitra hanao azy koa.

¹¹Ankehitriny kosa dia tontosay ny fanaovana azy. Nanana risi-po ianareo raha nanapa-kevitra hanao azy, ka dia aoka hanana risi-po tahaka izany koa hanatontosa azy araka izay anananareo.

¹²Fa raha misy ny risi-po hanome, dia ny manome araka izay ananana ihany no ankasitrahin’Andriamanitra, fa tsy hoe ny manome araka izay tsy ananana.

¹³Izany no atao, tsy sanatria ny hahaory anareo ka hiadanan’ny sasany, fa ny mba hisian’ny fitoviana.

¹⁴Amin’izao ankehitriny izao, dia manam-be ianareo mba hanafa-pahasahiranana azy ireo. Any kosa andro hahatonga azy ireo hanam-be mba hanafa-pahasahiranana anareo. Amin’izany no hisian’ny fitoviana,

¹⁵araka ny voalazan’ny Soratra Masina hoe: «Izay nanangona be tsy nanana amby, ary izay nanangona kely tsy nanana ny tsy ampy[36].»

¹⁶Hisaorana anie Andriamanitra Izay nahatonga an’i Tito ho mazoto miasa ho anareo tahaka ny ataonay koa!

¹⁷Nanaiky ny fiangavianay azy i Tito; nefa tena nazoto rahateo izy, ka dia nahim-pony no nankanesany tany aminareo.

¹⁸Nalefanay hiaraka aminy koa ilay rahalahy derain’ny Fiangonana rehetra amin’ny asa fitoriana ny Vaovao Mahafaly;

¹⁹ary tsy izany ihany, fa notendren’ireo Fiangonana mba hiara-dia aminay koa io rahalahy io amin’izao asa fanasoavana ilofosanay izao, ho voninahitr’Izy Tompo ary ho mariky ny risi-ponay hanasoa ny hafa.

²⁰Tandremanay mba tsy hisy hanome tsiny anay amin’izao famoriana vola be ilofosanay izao:

²¹satria mikendry hanao ny tsara izahay, tsy eo anatrehan’ny Tompo ihany, fa eo anatrehan’ny olona koa[37].

²²Nalefanay hiaraka amin’izy ireo ilay rahalahinay[38] izay efa nosedrainay matetika tamin-javatra maro ka hitanay fa mazoto; kanefa vao mainka mazoto kokoa izy ankehitriny, satria be ny fahatokiany anareo.

²³Raha ny amin’i Tito, dia namako izy sady mpiara-miasa amiko ho fanasoavana anareo; fa iretsy roa lahy rahalahinay kosa dia irak’ireo Fiangonana ary miasa ho voninahitr’i Kristy.

²⁴Koa asehoy azy telo lahy fa tia azy tokoa ianareo, mba ho fantatr’ireo Fiangonana fa rariny raha ataonay reharehanay ianareo.