Read DIEM PROTESTANTA Galatianina 4 Bible Online

Galatianina 4 - DIEM PROTESTANTA bible

Galatianina 4

¹Izao anefa no teniko: raha mbola zaza ny mpandova, dia tsy hafa noho ny mpanompo izy na dia tompon’ny zavatra rehetra aza;

²fa fehezin’izay mpikarakara azy sy ny mpitandrim-pananany izy mandra-pahatongan’ny fetr’andro voatendrin’ny rainy[22].

³Dia tahaka izany koa isika; fony mbola zaza, dia nandevozin’ireo herin-javatr’izao tontolo izao[23] isika;

⁴fa rehefa tonga tokoa ny fotoanandro, dia nirahin’Andriamanitra ny Zanany: natera-behivavy io Zanany io ary niaina teo ambany fahefan’ny lalàna jiosy,

⁵mba hanavotra izay teo ambany fahefan’ny lalàna ary mba handraisantsika ny anjara maha zanak’Andriamanitra.

⁶Ary ny maha zanaka anareo, dia ny nanirahan’Andriamanitra ho ao am-pontsika ny Fanahin’ny Zanany miantso hoe: «Raiko ô[24]!»

⁷Hany ka tsy mpanompo intsony ianao, fa zanaka; ary raha zanaka ianao, dia mpandova koa noho ny ataon’Andriamanitra[25].

⁸Taloha anefa, fony tsy mbola nahafantatra an’Andriamanitra ianareo, dia nanompo andriamani-tsy izy[26];

⁹ankehitriny kosa, efa nahalala an’Andriamanitra ianareo. Mihoatra noho izany aza: efa nahalala anareo Andriamanitra, ka ahoana ianareo no miverina indray amin’ny herin-javatra tsy manam-pahefana azy ary tsy misy fotony[27], dia herin-javatra izay tianareo hotompoina hatrany am-boalohany indray?

¹⁰Andro sy volana ary fizaràn-taona sy taona[28] no tandremanareo fatratra.

¹¹Matahotra ny aminareo aho, fandrao dia sasa-poana taminareo.

¹²Miangavy anareo aho, ry havana, aoka ho tonga tahaka ahy ianareo fa izaho koa mba efa tonga tahaka anareo. Tsy nanisy ratsy ahy velively ianareo,

¹³nefa fantatrareo fa aretina nihatra tamin’ny tenako no nahatonga ahy hitory aminareo ny Vaovao Mahafaly tamin’ny voalohany;

¹⁴ary na dia fitsapana ho anareo aza ny tenako narary, dia tsy mba nesoinareo aho na nolavinareo, fa noraisinareo tahaka ny ho nandraisanareo anjelin’Andriamanitra anankiray, eny tahaka ny ho nandraisanareo an’i Kristy Jesoa mihitsy aza.

¹⁵Nankaiza àry ilay fankamamianareo ahy nahasambatra anareo? Ijoroako ho vavolombelona aminareo manko fa, raha azo natao, na dia ny masonareo aza dia ho nombotanareo homena ahy tamin’izay.

¹⁶Koa dia tonga fahavalonareo ve aho, satria milaza aminareo zavatra marim-pototra?

¹⁷Mila fitia aminareo ry zareo nefa tsy araka ny mety; fa ny hihatahanareo amiko no tadiaviny mba hitiavanareo azy.

¹⁸Tsara izany ilàn’olona fitia amin’ny zavatra tsara, kanefa mandrakariva fa tsy hoe raha eo aminareo ihany aho.

¹⁹Rey anaka, mijaly toy ny vehivavy mihetsi-jaza indray aho, mandra-pahatongan’ny endrik’i Kristy ho voasokitra ao anatinareo.

²⁰Irîko ny ho eo aminareo ankehitriny, ka hitenenako araka ny tandrify anareo, fa mahasanganehana ahy ny zava-mitranga eo aminareo!

²¹Hono ho’aho, ianareo izay te hofehezin’ny lalàna, tsy renareo ve izay ambaran’ny lalàna?

²²Fa izao no voasoratra ao: Nanan-janaka roa lahy i Abrahama, ny anankiray tamin’ny vehivavy mpanompo ary ny anankiray tamin’ny vehivavy tsy mpanompo.

²³Kanefa ilay tamin’ny vehivavy mpanompo dia nateraka araka ny maha olombelona fotsiny, fa ilay tamin’ny vehivavy tsy mpanompo dia nateraka noho ny fampanantenana nataon’Andriamanitra[29].

²⁴Ireo toe-javatra ireo dia raisiko ho fanoharana, fa izy roa vavy dia tandindon’ny fanekempihavanana anankiroa. Ny fanekempihavanana anankiray moa natao tany an-tendrombohitra Sinay, ka miteraka ho amin’ny fanompoana: dia i Hagara izany,

²⁵fa ny hoe Hagara dia ny tendrombohitra Sinay any Arabia; ary i Hagara dia mifandraika amin’i Jerosalema[30] ankehitriny, satria samy mpanompo i Jerosalema sy ny zanany.

²⁶Fa ilay Jerosalema any an-danitra kosa tsy mba mpanompo: dia ny renintsika izany.

²⁷Fa izao no voalazan’ny Soratra Masina: «Mifalia, ry vehivavy momba, izay tsy niteraka! Manaova antso firavoravoana, ianao tsy nihetsi-jaza! Fa ny zanaky ny vehivavy mpitondratena dia maro noho ny an’ny manambady[31]!»

²⁸Fa ianareo, ry havana, dia zanaka nateraka araka ny fampanantenana nataon’Andriamanitra, tahaka an’i Itsehàka.

²⁹Fahizany anefa, ilay teraka araka ny maha olombelona fotsiny dia nanenjika ilay teraka araka ny Fanahy Masina; dia tahaka izany koa ankehitriny.

³⁰Saingy inona no lazain’ny Soratra Masina? Izao: «Roahy io vehivavy mpanompo io sy ny zanany, fa ny zanaky ny vehivavy mpanompo dia tsy hiray lova amin’ny zanaky ny vehivavy tsy mpanompo[32].»

³¹Noho izany, ry havana, tsy zanak’ilay vehivavy mpanompo isika, fa zanak’ilay vehivavy tsy mpanompo.