Read DIEM PROTESTANTA Galatianina 6 Bible Online

Galatianina 6 - DIEM PROTESTANTA bible

Galatianina 6

¹Ry havana, raha misy olona sendra latsaka amin’ny hadisoana, dia aoka ianareo izay manana ny Fanahy Masina hanarina azy amim-pahalemem-panahy; ary aoka hitandrin-tena koa ianao fandrao voataona amin’ny ratsy.

²Mifampitondrà izay mahavesatra, fa izany no hahatanterahanareo[37] ny lalànan’i Kristy.

³Eny, raha misy manao ny tenany ho zavatra, kanjo tsinontsinona, dia mamita-tena izy;

⁴fa samia mandinika ny asany avy, ka ny amin’ny tenany ihany no hahazoany mirehareha fa tsy ny amin’ny olon-kafa,

⁵satria samy hitondra ny anjara entany avy ny tsirairay.

⁶Aoka izay ampianarina ny tenin’Andriamanitra mba hanome ampahany amin’ny fananany rehetra ho an’izay mampianatra azy.

⁷Aza mety hofitahina ianareo. Tsy azo vazivazîna Andriamanitra, fa izay afafin’ny olona ihany no hojinjainy[38]:

⁸eny, izay mamafy ny sitraky ny maha olona mpanota, dia hijinja fahaverezana avy amin’ny maha olona mpanota; fa izay mamafy ny sitraky ny Fanahy Masina, dia hijinja fiaina-maharitra mandrakizay avy amin’ny Fanahy Masina.

⁹Ary aza mba ketraka amin’ny fanaovan-tsoa isika, satria hijinja amin’ny fotoanandro isika raha tsy kivy.

¹⁰Koa dieny mbola manana andro isika, dia aoka hanao soa amin’ny olona rehetra, fa indrindra amin’ny mpianakavin’ny finoana.

¹¹Jereo amin’ny havaventin’ny soratra fa tanako mihitsy no anoratako ho anareo izao.

¹²Izay rehetra te hiseho ho tsara araka ny maha olombelona, dia ireo no manery anareo hoforana; nefa noho izao antony izao ihany: mba tsy hanenjehana azy noho ny hazofijalian’i Kristy[39].

¹³Fa na dia ny tenan’izy voafora aza tsy mitandrina ny lalàna; kanefa tiany hoforana ianareo, mba hireharehany amin’ny fampiharana izany amin’ny vatanareo.

¹⁴Raha ny amiko, dia sanatria raha mba misy hataoko rehareha afa-tsy ny hazofijalian’i Jesoa Kristy Tompontsika: fa tamin’ny alalan’ny hazofijaliany no efa maty izao tontolo izao raha ny amiko, ary izaho kosa efa maty raha ny amin’izao tontolo izao.

¹⁵Tsy dia ny hoe maha voafora na tsy maha voafora manko no tena zavatra, fa ny maha olom-baovao.

¹⁶Ary fiadanana sy famindrampo avy amin’Andriamanitra no ao amin’izay rehetra hanaraka io fitsipika io, izany hoe ao amin’ilay Israely vahoakan’Andriamanitra.

¹⁷Amin’ny ho avy, aoka tsy hisy olona hanahirana ahy intsony; fa izaho dia mitondra ny diam-pery eo amin’ny tenako noho ny maha mpanompon’i Jesoa ahy[40].

¹⁸Homba anareo anie, ry havana, ny fahasoavan’i Jesoa Kristy Tompontsika! Amen.