Read DIEM PROTESTANTA Efesianina 3 Bible Online

Efesianina 3 - DIEM PROTESTANTA bible

Efesianina 3

¹Noho izany izaho Paoly, izay migadra noho ny amin’i Kristy Jesoa hanasoavana anareo hafa firenena, dia mangataka amin’Andriamanitra ho anareo.

²Matoky aho fa efa renareo ny andraikitra tontosaiko aminareo, noho ny tombon-tsoa nomen’Andriamanitra ahy.

³Fanambarana avy tamin’Andriamanitra no nahalalako ny tsiambaratelony. (Efa nisy voasoratro fohifohy ihany momba izany tetsy aloha,

⁴ka raha mamaky ianareo, dia ho hainareo fantarina ny fahalalàko ilay tsiambaratelo momba an’i Kristy.)

⁵Tsy mbola nampahafantarina ny olombelona izany tsiambaratelo izany tamin’ny andro lasa; fa ireo apôstôly sy mpaminany voatokana ho an’Andriamanitra kosa no nanambarana azy ankehitriny noho ny asan’ny Fanahy Masina.

⁶Izao àry izany tsiambaratelo izany: amin’ny alalan’ny Vaovao Mahafaly, ny hafa firenena dia natao hitambatra amin’ny Jiosy ka hiara-mandova ny zava-tsoa natokan’Andriamanitra ho an’ny vahoakany, sy ho tena iray ihany ary hiombona anjara amin’ny fampanantenàn’Andriamanitra ao amin’i Kristy Jesoa.

⁷Tonga mpanompon’ny Vaovao Mahafaly aho noho ny tombon-tsoa nomen’Andriamanitra ahy maimaimpoana, araka ny fiàsan’ny heriny.

⁸Kely noho izay bitika indrindra amin’ny vahoakan’Andriamanitra rehetra aho, kanefa nomen’Andriamanitra izany tombon-tsoa izany: dia ny hitory amin’ny hafa firenena ny Vaovao Mahafaly momba ny haren’i Kristy tsy hita lany,

⁹ary ny hampahazava amin’ny olona rehetra ny fomba hanatanterahan’Andriamanitra ny tsiambaratelony. Hatrizay hatrizay dia voaafina tao amin’Andriamanitra Mpahary ny zavatra rehetra, izany tsiambaratelo izany;

¹⁰fa ankehitriny kosa naseho tamin’ny alalan’ny Fiangonana izany, ka tonga fantatr’ireo fanapahana sy ny fahefana eny ana habakabaka[12] ny fahendren’Andriamanitra, dia fahendrena mahefa zavatra tsy tambo isaina.

¹¹Izany rahateo no fandaharana hatrizay hatrizay ka notanterahin’Andriamanitra tamin’ny alalan’i Kristy Jesoa Tompontsika.

¹²Ary isika efa tafaray amin’i Kristy dia manana ny fahasahiana manatona an’Andriamanitra amim-pahatokiana, noho ny finoana niainan’i Kristy.

¹³Koa izany no angatahako anareo mba tsy ho ketraka amin’ny fahoriana manjo ahy hanasoavana anareo, fa misy vokany be voninahitra ho anareo izany.

¹⁴Noho izany no andohalehako eo anatrehan’Andriamanitra Ray,

¹⁵Izay antom-pisian’ny fianakaviana rehetra any an-danitra sy etỳ an-tany.

¹⁶Mangataka amin’Andriamanitra aho mba homeny anareo, araka ny haren’ny voninahiny, ny hohatanjahina fatratra ao anatinareo amin’ny herin’ny Fanahiny,

¹⁷ka hitoeran’i Kristy ao am-ponareo amin’ny finoana; dia hamahatra tsara sy ho mafy orina amin’ny fitiavana ianareo.

¹⁸Mangataka amin’Andriamanitra aho ny hahaizanareo mbamin’ny vahoakan’Andriamanitra rehetra mahafantatra tsara ny fitiavan’i Kristy, dia izay sakany sy lavany ary haavony sy halaliny.

¹⁹Enga anie ho fantatrareo tokoa ny fitiavan’i Kristy — na dia tsy mety ho fantatra tanteraka na oviana na oviana aza izany — , mba hamenoana anareo ka hidiranareo ao amin’ny hafenoana rehetra ananan’Andriamanitra.

²⁰Ary ho an’Andriamanitra Izay mahay manao mihoatra noho ny zavatra rehetra, eny, mihoatra lavitra noho izay angatahintsika na heverintsika aza, araka ny heriny miasa ato amintsika,

²¹ho Azy anie ny voninahitra ao amin’ny Fiangonana sy ao amin’i Kristy Jesoa, manerana ny taranaka rehetra mifandimby sy mandrakizay mandrakizay! Amen.