Read DIEM PROTESTANTA 1 Tesalônisianina 5 Bible Online

1 Tesalônisianina 5 - DIEM PROTESTANTA bible

1 Tesalônisianina 5

¹Momba ny andro sy ny fotoana hitrangan’izany, ry havana, dia tsy ilaina ny hanoratako aminareo.

²Satria fantatrareo tsara fa ny andron’ny Tompo dia ho avy tampoka, toy ny iavian’ny mpangalatra amin’ny alina[17].

³Amin’ny anaovan’ny olona hoe: «Miadana sy mandry feizay ny zavatra rehetra[18]!», amin’iny no hamely azy tampoka ny fandringanana ka tsy ho azony andosirana mihitsy, mova tsy ny fanaintainan’ny vehivavy bevohòka mihetsi-jaza.

⁴Fa ianareo, ry havana, tsy mba ao amin’ny maizina, ka tsy mba hanampoka anareo toy ny mpangalatra izany andro izany.

⁵Satria ianareo rehetra dia an’ny mazava sy an’ny andro; tsy mba an’ny alina isika na an’ny maizina.

⁶Koa aza mba matory tahaka ny sasany, fa aoka hiambina sy hahonon-tena.

⁷Fa ny alina no atorian’ny olona ary ny alina no imamoany.

⁸Fa satria an’ny andro isika, dia aoka hahonon-tena ka hitafy finoana sy fitiavana ho toy ny fiarovan-tratra, ary hitafy fanantenam-pamonjena ho toy ny fiarovan-doha[19].

⁹Fa tsy notendren’Andriamanitra hiharan’ny fahatezerany isika, fa mba hahazo famonjena amin’ny alalan’i Jesoa Kristy Tompontsika.

¹⁰Maty ho antsika i Kristy, mba hahatonga antsika hiara-miaina aminy, na mbola velona aina isika na efa maty, amin’ny andro hiaviany.

¹¹Noho izany àry, mifampirisiha sy mifampahereza ianareo araka izay efa fanaonareo.

¹²Mangataka aminareo izahay, ry havana, mba hanaja izay mikely aina eo anivonareo, dia izay voatendrin’ny Tompo hitarika sy hananatra anareo.

¹³Fankatoavana be dia be ombàm-pitiavana no asehoy azy ireo, noho ny asa tontosainy. Mihavàna tsara ianareo samy ianareo.

¹⁴Miangavy anareo izahay, ry havana: anaro ny kamo[20], ampaherezo ny katahotra, ampio ny osa, ary aoka hahari-po amin’ny olona rehetra.

¹⁵Tandremo mba tsy hisy hamaly ratsy ny ratsy, fa miezaha mandrakariva hifanasoa ary hanasoa ny olona rehetra.

¹⁶Mifalia mandrakariva;

¹⁷mivavaha lalandava;

¹⁸misaora an’Andriamanitra amin’ny zavatra rehetra, fa izany no sitrak’Andriamanitra hataonareo tafaray amin’i Kristy Jesoa.

¹⁹Aza vonoina ny asan’ny Fanahy Masina;

²⁰aza atao tsinontsinona ny teny ataon’ireo mpilaza hafatra avy amin’Andriamanitra;

²¹diniho ny zavatra rehetra, ka tano izay tsara;

²²halaviro daholo ny zava-dratsy isan-karazany.

²³Ilay Andriamanitra loharanon’ny fiadanana anie hahatonga anareo ho voatokana tanteraka ho Azy; ka harovany avokoa anie ny fanahinareo sy ny ainareo ary ny tenanareo mba tsy hanan-tsiny amin’ny andro hiavian’i Jesoa Kristy Tompontsika!

²⁴Mitana ny toky nomeny Andriamanitra Izay miantso anareo, ka hoefainy izany.

²⁵Ry havana, mivavaha koa ho anay.

²⁶Ataovy veloma amin’ny fanoroham-pihavanana daholo ny havana rehetra iray finoana.

²⁷Iangaviako indrindra amin’ny anaran’ny Tompo ianareo: mba vakio amin’ny havana rehetra iray finoana ity taratasy ity.

²⁸Homba anareo anie ny fahasoavan’i Jesoa Kristy Tompontsika!