Read DIEM PROTESTANTA 2 Tesalônisianina 2 Bible Online

2 Tesalônisianina 2 - DIEM PROTESTANTA bible

2 Tesalônisianina 2

¹Ny amin’ny andro hiavian’i Jesoa Kristy Tompontsika sy hanangonana antsika ho eo aminy, ry havana, dia izao no angatahinay aminareo[5]:

²aza mety hohozongozonin-tsaina na hampitahorina mora foana ianareo, satria misy milaza fa efa tonga sahady ny andro hiavian’ny Tompo. Mety ho fanomezam-pahasoavana hampita hafatra avy amin’Andriamanitra na mety ho toriteny no nilazan’olona izany taminareo, na mety koa ho taratasy hamboina ho avy aminay.

³Aza mety hofitahin’olona mihitsy ianareo; satria tsy ho tonga izany andro izany raha tsy efa mitranga ny fikomiana farany amin’Andriamanitra ary aseho ilay mpanao ratsy, ilay mirona amin’ny fahaverezana.

⁴Hijoroan’ilay mpanao ratsy ho fahavalo sady hotoheriny avokoa izay rehetra ataon’ny olona ho andriamanitra na izay rehetra toloran’ny olona fanompoam-pivavahana; hidirany sy hipetrahany hatramin’ny tempolin’Andriamanitra aza, ka ny tenany no hanora-tena ho Andriamanitra[6].

⁵Tsy tadidinareo ve fa voalazako anareo izany fony aho mbola tatỳ aminareo?

⁶Fantatrareo izao ny zava-misakana ilay mpanao ratsy, mba tsy hisehoany raha tsy amin’ny fotoanandrony.

⁷Eny, efa miasa tokoa ny hery miafin’ny fanaovan-dratsy; saingy tsy hitranga ilay mpanao ratsy raha mbola eo ihany ilay olona misakana azy[7].

⁸Ary rehefa hiseho ilay mpanao ratsy, dia ny fofonaina avy amin’ny vavan’i Jesoa Tompo no hahafaty azy ary ny fiavian’i Jesoa amim-boninahitra no hanafoana azy[8].

⁹Ombàn’ny herin’i Satàna no hiavian’ilay mpanao ratsy, ka hahavita karazan’asa mahagaga sy famantarana ary zava-mahatalanjona manodoka olona izy[9],

¹⁰sady hampiasa haratsiam-panahy amin’ny endrika samihafa hahavoafitaka ireo ho very. Ho very ireo satria tsy nandray ary tsy nandala ny hafatra marim-pototra tokony ho nahavonjy azy;

¹¹koa dia ny fahadisoan-kevitra no nalefan’Andriamanitra hiasa mahery tao aminy mba hinoan’ireo ny lainga;

¹²hany ka ho voaheloka avokoa izay rehetra tsy nino ilay hafatra marim-pototra fa finaritra nanao ratsy.

¹³Tsy maintsy velom-pisaorana mandrakariva an’Andriamanitra izahay ny aminareo, ry havana notiavin’ny Tompo. Fa nofidin’Andriamanitra ho toy ny santa-bokatra hatolotra Azy ianareo[10], ka hahazo famonjena noho ianareo voatokan’ny Fanahy Masina mba ho an’Andriamanitra ary noho ianareo nino ny hafatra marim-pototra.

¹⁴Izany no niantsoan’Andriamanitra anareo, tamin’ny alalan’ny Vaovao Mahafaly notorînay, mba hahazoanareo miombom-boninahitra amin’i Jesoa Kristy Tompontsika.

¹⁵Koa mamahara tsara, ry havana, ary tano ny fampianarana natolotray anareo am-bava na an-taratasy.

¹⁶Enga anie i Jesoa Kristy Tompontsika sy ilay Andriamanitra Raintsika Izay efa tia antsika ka nanome antsika fampiononana mandrakizay sy fanantenana tsara tamin’ny alalan’ny fahasoavany

¹⁷hampionona ny fonareo ary hampahery anareo hanao izay tsara rehetra na amin’ny asa na amin’ny teny.