Read DIEM PROTESTANTA 2 Tesalônisianina 3 Bible Online

2 Tesalônisianina 3 - DIEM PROTESTANTA bible

2 Tesalônisianina 3

¹Farany, ry havana, mivavaha ho anay mba hiely faingana ny tenin’ny Tompo, ka hankatoavina araka ny voninahitra tandrify azy, toy ny teo aminareo.

²Mivavaha koa mba hanafahan’Andriamanitra anay amin’ny olona tsy valahara sy ratsy fanahy; satria tsy ary manana finoana avokoa ny olona rehetra.

³Fa mitana ny toky nomeny ny Tompo, ka hampahery anareo sady hiaro anareo tsy ho azon’ilay Ratsy[11].

⁴Ary omen’ny Tompo fitokiana izahay ny momba anareo, ka azonay antoka fa ny zavatra ameperanay anareo dia efa ataonareo sady mbola hataonareo hatrany.

⁵Ny Tompo anie hitarika ny fonareo hahatsapa ny fitiavan’Andriamanitra anareo sy hanam-paharetana miandry ny fiavian’i Kristy[12]!

⁶Ry havana, mamarafara anareo amin’ny anaran’i Jesoa Kristy Tompontsika izahay: halaviro ny namana kamo[13], tsy manaraka ny fampianarana efa nampitainay taminy.

⁷Eny, fantatrareo izay tokony hataonareo hanahafanareo anay. Tsy olona kamo izahay, fony tatỳ aminareo.

⁸Tsy nihinana ny sakafon’olona maimaimpoana izahay, fa nikely aina sy nisasatra niasa andro aman’alina mba tsy hanahirana na dia iray aminareo aza[14].

⁹Izany no nataonay, dia tsy hoe tsy manan-jo handray fanampiana avy aminareo izahay, fa mba hanomezanay ohatra hotahafinareo.

¹⁰Eny, fony tany aminareo izahay, dia namepetra anareo hoe: «Raha misy tsy te hiasa, aoka izy tsy hihinana[15]!»

¹¹Izany no lazainay dia satria renay fa misy aminareo kamo[16] tsy miasa fa manao zavatra tsisy antony etsy sy eroa.

¹²Ny olona toy izany dia feperanay sady ampirisihinay amin’ny anaran’i Jesoa Kristy Tompo mba hiasa amim-pilaminana ka hihinana ny azy ihany.

¹³Fa ianareo kosa, ry havana, aza ketraka amin’ny fanaovan-tsoa.

¹⁴Raha misy olona tsy manaiky ny teny ataonay amin’ny alalan’izao taratasy izao, dia mariho izy ka aza ifampiraharahana mihitsy mba hahamenatra azy;

¹⁵kanefa aza raisina ho fahavalo izy fa anaro toy ny mpiray tampo.

¹⁶Ny Tompo loharanom-piadanana anie hanome anareo fiadanana mandrakariva amin’ny zavatra rehetra! Homba anareo rehetra anie ny Tompo!

¹⁷Soratanako ireto teny ireo: veloma, hoy i Paoly. Io no sonia famantarana ny taratasiko rehetra; izao no soratro.

¹⁸Homba anareo rehetra anie ny fahasoavan’i Jesoa Kristy Tompontsika!