Read DIEM PROTESTANTA 1 Timôty 5 Bible Online

1 Timôty 5 - DIEM PROTESTANTA bible

1 Timôty 5

¹Aza levilevena ny lehilahy efa zokiolona fa anaro toy ny rainao izy[23]; ny zatovolahy, ento toy ny rahalahy;

²ny vehivavy efa zokiolona, ento toy ny reny; ary ny zatovovavy, ento toy ny anabavy, amin’ny fahadiovana tanteraka.

³Hajao ny vehivavy mpitondratena, dia ireo tena mpitondratena tokoa[24].

⁴Raha manana zanaka aman-jafy ilay vehivavy mpitondratena, dia aoka ireo aloha hianatra haneho ny toe-panahy araka an’Andriamanitra amin’ny fianakaviany ka hamaly babena ny ray aman-dreniny na ny raibe aman-drenibeny, fa izany no ankasitrahin’Andriamanitra.

⁵Ny vehivavy, tena mpitondratena tokoa sady tsy mana-mpiahy, dia efa nametraka ny fanantenany amin’Andriamanitra, ka mivavaka hatrany ary mangataka hampian’Andriamanitra andro aman’alina.

⁶Fa ny mpitondratena, manaram-po amin’ny fahafinaretana, dia efa maty fanahy mbola velona.

⁷Izany no anafatrafaro ny vehivavy mpitondratena sy ny fianakaviany, mba tsy hananany tsiny.

⁸Fa raha misy tsy mahakarakara ny havany, indrindra fa ny ankohonany, dia efa nandà ny finoana izy ka ratsy kokoa noho ny tsy mpino.

⁹Aza atao lisitra ho isan’ny vehivavy mpitondratena afa-tsy izay mihoatra ny enimpolo taona sady indray mandeha ihany no nanambady[25],

¹⁰ary tsara laza amin’ny asa soa vitany; vehivavy nitaiza tsara ny zanany, nampiantrano vahiny, nanasa ny tongotr’ireo namana kristianina[26], nanampy ny nozoim-pahoriana, nazoto tamin’ny asa soa isan-karazany.

¹¹Aza ekena ho anaty lisitra ireo mpitondratena mbola tanora, satria rehefa voan’ny filàm-pahafinaretana izy dia miala amin’i Kristy ary te hanambady indray;

¹²ka manjary meloka ireo, satria mivadika tamin’ilay toky nomeny an’i Kristy tam-boalohany.

¹³Ary tsy vitan’izany, fa mianatra mandany andro miriorio mitety tranon’olona koa ireo; ary tsy hoe mandany andro fotsiny, fa mipentsompentsona, manao zavatra tsisy antony etsy sy eroa miresaka zavatra tsy tokony horesahina.

¹⁴Koa tiako mba hanambady indray ireo vehivavy mpitondratena mbola tanora, ka dia hanan-janaka sy hitondra ny tokantranony mba tsy hohararaotin’ny fahavalontsika hitenenan-dratsy antsika.

¹⁵Efa nisy sasantsasany nivily sahady nanaraka an’i Satàna.

¹⁶Raha misy vehivavy mpino, manan-kavana mpitondratena, dia aoka izy hanampy azy; fa tsy hamela azy hanahirana ny Fiangonana; amin’izay ny Fiangonana dia ho afa-manampy ireo tena mpitondratena.

¹⁷Aoka ny loholona tsara fitondra ny Fiangonana handray valin-kasasarana avo roa heny[27], indrindra fa ireo mikely aina amin’ny fitorian-teny sy ny fampianarana.

¹⁸Fa hoy ny Soratra Masina hoe: «Aza akombona ny vavan’ny omby mively vary», ary koa hoe: «Mendrika hahazo ny karamany ny mpiasa[28].»

¹⁹Aza mandray teny fiampangana loholona, raha tsy misy vavolombelona roa na telo[29].

²⁰Izay loholona manota dia teneno eo anatrehan’ny besinimaro mba hatahotra koa ny sasany.

²¹Eo imason’Andriamanitra sy i Kristy Jesoa ary ny anjely masina no ameperako mafy anao: tandremo tsara ireo torohevitra ireo, ka tsy hisy fizahàn-tavan’olona na fiangarana amin’izay ataonao.

²²Aza maika loatra mametra-tanana amin’olona mba hanokana azy amin’ny asan’ny Tompo. Aza miombona ota amin’ny sasany; tahirizo madio ny tenanao.

²³Aoka tsy dia ho rano fotsiny ihany no ho fisotronao, fa misotroa divay kely koa noho ny ambavafonao ary noho ny fahosaosanao matetika.

²⁴Miharihary ny fahotan’ny olona sasany, dieny alohan’ny famotopotorana; fa ny an’ny sasany kosa atỳ aorian’ny famotopotorana vao miseho.

²⁵Miharihary toy izany koa ny asa tsara; ary na izay tsy miharihary avy hatrany aza, dia tsy hay afenina[30].