Read DIEM PROTESTANTA Hebreo 3 Bible Online

Hebreo 3 - DIEM PROTESTANTA bible

Hebreo 3

¹Koa amin’izany, ry havana, efa voatokana ho an’Andriamanitra ianareo sady efa voaantsony hiombon’anjara amin’ny fiainana any an-danitra, ka diniho i Jesoa ilay irak’Andriamanitra sady Mpisorombe antoky ny finoana izay ekentsika.

²Fa i Jesoa dia nahatoky an’Andriamanitra teo amin’ny andraikitra nanendreny Azy, nahatoky tahaka an’i Mosesy izay voalazan’ny Soratra Masina hoe: «Nahatoky tao amin’ny tranon’Andriamanitra manontolo izy[16].»

³Nefa mendri-boninahitra kokoa noho i Mosesy i Jesoa, satria ny mpanao trano dia mahazo haja bebe kokoa noho ny trano nataony.

⁴Ny trano rehetra manko dia nisy mpanao azy, fa Andriamanitra kosa no nanao ny zavatra rehetra.

⁵Ary i Mosesy dia nahatoky tao amin’ny tranon’Andriamanitra manontolo, araka ny maha mpanompo azy, ka natao hanambara ny zavatra izay holazain’Andriamanitra amin’ny ho avy.

⁶Fa i Kristy kosa dia nahatoky araka ny maha Zanaka Azy, ka mifehy ny tranon’Andriamanitra; ary dia isika izany tranon’Andriamanitra izany, raha mitana ny fahasahiana sy ny fanantenana ireharehantsika[17].

⁷Noho izany, araka izay lazain’ny Fanahy Masina hoe: «Anio, raha renareo ny feon’Andriamanitra,

⁸dia aza hamafisina ny fonareo, tahaka ny tamin’ny andro niodinan’ny razanareo tamin’Andriamanitra, tahaka ny tamin’ny andro nakana fanahy Azy tany an-taniefitra.

⁹Tany no nakan’ny razanareo fanahy Ahy sy nizahany toetra Ahy, hoy Andriamanitra, na dia efa hitany aza ny asa vitako

¹⁰nandritra ny efapolo taona. Izany no nahatezitra Ahy tamin’ireo olona ireo, ka hoy Aho hoe: ‹Maniasia lalandava ny fisainany; tsy nahafantatra ny lalako ireo.›

¹¹Tezitra Aho ka nianiana hoe: Tsy hiditra mihitsy ao amin’ny toeram-pitsaharana nomaniko ireo[18]!»

¹²Tandremo, ry havana, fandrao hisy aminareo hanana fo ratsy tsy mino ka hiala amin’Andriamanitra velona.

¹³Fa aoka ianareo hifampirisika isan’andro, dieny mbola misy ny hoe «anio» lazain’ny Soratra Masina, mba tsy hisy ho voafitaky ny fahotana ianareo ka ho tonga mafy fo.

¹⁴Eny, efa tonga mpiombon-tsoa amin’i Kristy isika, raha tanantsika mafy hatramin’ny farany ny toky izay nananantsika hatrany am-boalohany.

¹⁵Izao no lazain’ny Soratra Masina: «Anio, raha renareo ny feon’Andriamanitra, dia aza hamafisina ny fonareo, tahaka ny tamin’ny niodinan’ny razanareo tamin’Andriamanitra[19].»

¹⁶Iza moa ireo nandre ny feon’Andriamanitra nefa niodina taminy? Ireo rehetra nentin’i Mosesy niala tany Ejipta.

¹⁷Ary iza no nahatezitra an’Andriamanitra nandritra ny efapolo taona? Ireo nanota ka niampatrampatra tany an-taniefitra ny fatiny.

¹⁸Raha nianiana Andriamanitra nanao hoe: «Tsy hiditra mihitsy ao amin’ny toeram-pitsaharana nomaniko ireo», iza moa no lazainy? Ireo tsy nanaiky[20].

¹⁹Koa dia hitantsika fa tsy tafiditra ireo satria tsy nino.