Read DIEM PROTESTANTA 1 Petera 4 Bible Online

1 Petera 4 - DIEM PROTESTANTA bible

1 Petera 4

¹Noho i Kristy efa nijaly tao amin’ny nofo[29], dia raiso ho fiadianareo koa ny toe-tsaina nananany; satria izay olona nijaly tao amin’ny nofo dia nampitsaharina tamin’ny ota,

²ka tamin’ny androny sisa eto an-tany dia tsy araka ny filàndratsin’ny olombelona intsony no tokony hiainany fa araka ny sitrapon’Andriamanitra.

³Eny, fotoana maharitra ihany tamin’ny lasa no nanaovanareo ny zavatra fanaon’ny mpanompo sampy, ka nizoranareo tamin’ny fihetsika tsy maotina, ny fanirian-dratsy, ny fahamamoana, ny fihinanam-be loatra, ny fisotroana tafahoatra, ary ny fanompoan-tsampy izay tsy fanao.

⁴Amin’izany dia gaga ireo mpanompo sampy satria tsy dodona intsony ianareo ny hiaraka aminy mba hanarampo amin’ny filibàna, ka dia tevatevainy;

⁵nefa hampamoahin’Ilay vonona hitsara ny velona sy ny maty izy ireo.

⁶Fa izany no nitoriana ny Vaovao Mahafaly tamin’izay maty aza: mba ho velona araka ny fomban’Andriamanitra izy ao amin’ny fanahy, rehefa notsaraina tao amin’ny nofo araka ny fomban’ny olona.

⁷Antomotra ny faran’ny zavatra rehetra; koa hendre, mahonòna tena mba ho afa-mivavaka.

⁸Fa indrindra indrindra, mifankatiava fatratra, satria ny fitiavana no mikosoka ny fahotana maro niavosa[30].

⁹Mifampiantranoa ka aza asiana monomonona.

¹⁰Samia mifanompo araka ny fanomezam-pahasoavana noraisinareo avy, mova tsy mpitandrim-pananana mitantana tsara ny fanomezana maro samy hafa avy amin’Andriamanitra.

¹¹Izay mitoriteny, aoka ho toy ny milaza ireo hafatr’Andriamanitra; izay manompo[31], aoka ho araka ny hery ampombain’Andriamanitra azy; ka dia amin’ny zavatra rehetra no hanomezam-boninahitra an’Andriamanitra amin’ny alalan’i Jesoa Kristy, fa an’Andriamanitra ny voninahitra sy ny fanjakana mandrakizay mandrakizay! Amen.

¹²Ry hava-malala, aza gaga amin’ny fanenjehana mivaivay miseho teo aminareo sady mihatra aminareo mba ho fizahan-toetra, ka hihevitra izany ho zava-tsy fahita midona aminareo.

¹³Fa mifalia araka ny iombonanareo fijaliana amin’i Kristy, mba ho heni-kafaliana aman-karavoana koa ianareo amin’ny andro hisehoan’ny voninahiny.

¹⁴Sambatra ianareo raha haratsîna amin’ny maha mpianatr’i Kristy anareo; fa ny Fanahy Masina be voninahitra, dia ny Fanahin’Andriamanitra, no mitoetra eo aminareo.

¹⁵Eny, aoka aminareo tsy hisy hijaly satria mpamono olona, na mpangalatra, na mpanao ratsy, na mpitsabaka amin’ny raharahan’olona;

¹⁶fa raha amin’ny maha kristianina azy no ijaliany, dia aoka izy tsy ho menatra fa hanome voninahitra an’Andriamanitra noho izany anarana entiny izany.

¹⁷Tonga ny fotoanandro hiantombohan’ny fitsarana hatrao amin’ny ankohonan’Andriamanitra; ka raha miantomboka amintsika izany, hanao ahoana kosa no hiafaran’izay tsy mety mino nyVaovao Mahafaly avy amin’Andriamanitra?

¹⁸Fa hoy ny Soratra Masina: «Raha saika tsy voavonjy ny marina, inona no hanjo ny tsy mpivavaka sy ny mpanota[32]?»

¹⁹Koa izay miaritra fijaliana araka ny sitrapon’Andriamanitra, aoka hanao soa hatrany sy hanankin-tena amin’Ilay mitana ny toky nomeny, dia ny Mpahary azy.