Read DIEM PROTESTANTA 1 Jôhany 5 Bible Online

1 Jôhany 5 - DIEM PROTESTANTA bible

1 Jôhany 5

¹Izay rehetra mino fa i Jesoa no Kristy, dia naterak’Andriamanitra; ary izay rehetra tia ilay Andriamanitra niteraka, dia tia izay naterak’Andriamanitra koa.

²Ny ahafantarantsika fa tia ireo zanak’Andriamanitra isika, dia ny fitiavantsika an’Andriamanitra sy ny fanatontosàntsika ireo didiny.

³Eny, ny fitiavana an’Andriamanitra dia ny fitandremantsika ireo didiny[26]; sady tsy mavesatra ireo didiny ireo,

⁴satria izay rehetra naterak’Andriamanitra dia maharesy izao tontolo izao. Ary ny fitaovam-pandresena izay maharesy izao tontolo izao dia ny finoantsika.

⁵Iza moa no maharesy izao tontolo izao, afa-tsy izay mino fa i Jesoa no ilay Zanak’Andriamanitra?

⁶I Jesoa Kristy dia Ilay avy tamin’ny alalan’ny rano sy tamin’ny alalan’ny ra[27]. Tsy tamin’ny rano ihany no nahatongavany, fa tamin’ny rano sy ny ra; ary ny Fanahy Masina no vavolombelona manambara izany, satria ny Fanahy Masina no fahamarinana.

⁷Fa ankehitriny, telo no vavolombelona[28] manambara:

⁸dia ny Fanahy Masina sy ny rano ary ny ra[29]; sady mifanaraka tsara izy telo.

⁹Raisintsika ny zavatra ambaran’ny olona; ary lehibe noho izany ny zavatra ambaran’Andriamanitra, satria ny zavatra ambaran’Andriamanitra dia izay efa nambarany momba ny Zanany.

¹⁰Koa izay mino ilay Zanak’Andriamanitra no manana izany zavatra ambara izany ao anatiny; izay tsy mino an’Andriamanitra kosa dia efa nampandainga an’Andriamanitra, satria tsy nino ny zavatra nambarany momba ilay Zanany.

¹¹Ary ny zavatra nambara dia izao: fiaina-maharitra mandrakizay no efa nomen’Andriamanitra antsika ary ao amin’ilay Zanany izany fiainana izany.

¹²Izay manana ny Zanaka no velona aina; izay tsy manana ny Zanak’Andriamanitra no tsy velona aina[30].

¹³Izany no voasoratro ho anareo izay mino ny anaran’ilay Zanak’Andriamanitra, mba hahafantaranareo fa velona aina mandrakizay ianareo.

¹⁴Ary izao no toky ananantsika eo anatrehan’Andriamanitra: raha mangata-javatra araka ny sitrapony isika, dia mihaino antsika Izy;

¹⁵ary raha fantatsika fa mihaino antsika Izy na inona na inona angatahintsika, dia fantatsika koa fa azontsika izay angatahintsika aminy.

¹⁶Raha misy mahita ny namana iray finoana manao ota tsy mahafaty, dia aoka izy hivavaka ho azy ary Andriamanitra no hanome azy fiainana: izay ny amin’ireo manao ota tsy mahafaty. Fa misy ota mahafaty, ka tsy mba ny amin’izany no ilazako hoe tokony hivavaka izy.

¹⁷Ota avokoa ny asa ratsy rehetra, saingy misy ota tsy mahafaty.

¹⁸Fantatsika fa izay rehetra naterak’Andriamanitra dia tsy manota, satria arovan’ilay Zanak’Andriamanitra[31] izy ka tsy voakasik’ilay Ratsy.

¹⁹Fantatsika fa avy amin’Andriamanitra isika, fa izao tontolo izao kosa eo ambany fahefàn’ilay Ratsy avokoa.

²⁰Ary fantatsika fa tonga ny Zanak’Andriamanitra ka efa nanome antsika fahazavan-tsaina mba hahalalantsika an’ilay Andriamanitra tena Izy; ary tafaray amin’izany Andriamanitra tena Izy izany isika, amin’ny alalan’i Jesoa Kristy Zanany Izay Andriamanitra tena Izy sady fiaina-maharitra mandrakizay.

²¹Rey anaka, mitandrema tena fandrao manompo sampy ianareo.