Read DIEM PROTESTANTA Mpitsara 5 Bible Online

Mpitsara 5 - DIEM PROTESTANTA bible

Mpitsara 5

¹[26] Tamin’izany andro izany i Debôrà dia nihira niaraka tamin’i Baràka zanakalahin’i Abinôhama ka nanao hoe:

²Efa samy vonon-kiantafika ny vatan-dehilahy eto Israely[27], nanolo-tena hiady ny vahoaka; koa isaory ny TOMPO izany!

³Mihainoa ianareo, ry mpanjaka, manongilàna sofina ianareo, ry mpifehy, fa hihira ho an’ny TOMPO aho; eny, hikaloako salamo ny TOMPO Andriamanitr’i Israely.

⁴Rehefa tonga avy tany Edôma Ianao, Tompo ô, ka nidina avy teny an-tendrombohitra Sehira[28], dia nihovotrovotra ny tany, ary nandrotsaka orana ny rahona, dia ora-mikija avy any an-danitra;

⁵ny tendrombohitra niempo teo anatrehanao, ry TOMPO niseho tany Sinay[29]; ny tendrombohitra niempo teo anatrehanao, ry TOMPO Andriamanitr’i Israely.

⁶Tamin’ny andron’i Samgary zanakalahin’i Hanata sy tamin’ny andron’i Jahela[30] dia nidify ity faritra ity ny andian’ireo mpitaingin-drameva[31]; fa nanaraka lalan-kafa ireo mpandeha.

⁷Tsy nisy lehibe intsony, tsy nisy lehibe intsony teto amin’i Israely, mandra-pisehoko izaho Debôrà ho toy ny reny teto amin’i Israely.

⁸Nifidy andriamani-baovao ny olona ka vetivety dia vaky ny ady; nefa zara raha nahitana ampinga na lefona iray ho an’ny vatan-dehilahy andiany efapolo teto Israely.

⁹Ny ahy ny fo dia miandany amin’ireo komandin’i Israely; ny foko dia miandany amin’ireo vahoaka nanolo-tena hiady; koa isaory ny TOMPO izany!

¹⁰Ianareo izay mitaingina borikivavy fotsy, ianareo izay mipetraka eo ambony karipetra, ianareo izay mandeha eny an-dalana, mankalazà ny TOMPO noho ny fandresena[32]!

¹¹Teo akaikin’ny fampisotroan-drano, ireo mpizara rano ho an’ny biby fiompy no nankalaza ny fandresen’ny TOMPO, dia fandresena nomeny ireo lehiben’i Israely fony injay nirotsaka hiady teo am-bavahadin’ny tanàna ilay vahoakan’ny TOMPO.

¹²Mifohaza, mifohaza ianao, ry Debôrà, mifohaza, mifohaza ianao, ka miventesa hiran’ady. Ry Baràka zanakalahin’i Abinôhama, mitsangàna ka ataovy babo ireo mpamabo anao.

¹³Nirohotra nankany amin’ny lehibeny ireo Israelita ary nivory teo amiko ny vahoakan’ny TOMPO niaraka tamin’ireo lehilahy mahery fo.

¹⁴Ireo taranaka avy any Efraîma dia efa tonga ao an-dohasaha, ka narahin’ny fokon’i Benjamîna izay nifangaro tamin’ny andian-tafiny. Nipoitra avy amin’ny terak’i Makira[33] ireo mpitari-tafika ary avy amin’ny fokon’i Zebolòna ireo manampahefana.

¹⁵Ireo lehiben’i Jisakara dia niandany tamin’i Debôrà; ary nifikitra tamin’i Baràka ny fokon’i Jisakara ka niriotra nanaraka azy teny amin’ny tany lemaka. Tao amin’ny fokon’i Reobena[34] kosa dia adihevitra tsisy farany.

¹⁶Nahoana ianareo no nijanona teny anelanelan’ny vala hihaino ny siotsiokan’ny mpiandry ondry? Tao amin’ny fokon’i Reobena tokoa dia adihevitra tsisy farany.

¹⁷Tsy nihetsika koa ny terak’i Gilehada[35] teny an-dafy atsinanan’i Jôrdàna. Ary nahoana ny fokon’i Dana[36] no nipetra-potsiny teo anilan’ny sambony? Ny fokon’i Asera[37] koa nonina teo amoron-dranomasina ka nijanona teo amin’ny fitodian-tsambony.

¹⁸Ny vahoakan’i Zebolòna mbamin’i Naftalỳ kosa dia nanaiky hanao vy very ny ainy teo an-tany fiadiana, na dia ho faty aza!

¹⁹Tonga hiady ireo mpanjakan’i Kanahàna ka dia nanafika tao Tahenàka, teo akaikin’ny loharanon’i Megidao[38], nefa tsy nahazo na babo na volafotsy!

²⁰Avy eny an-danitra eny no nandray anjara tamin’ny ady koa ny kintana, ka ny fihodinkodinana arahiny no niadiany tamin’i Siserà.

²¹Renirano efa nikoriana hatry ny ela, dia ny renirano Kisôna[39], no nipaoka ny fahavalo. Aoka mba hiroso hiady amin-kerim-po koa aho!

²²Dia nihazakazaka mafy ny soavaly; ka nikatrokatroka ny hitsa-kitrony.

²³Ozòny ny tanàna Merôza[40], hoy ilay anjelin’ny TOMPO. Ozòny, ozòny ny mponina ao aminy noho izy tsy tonga hikatroka niaraka tamin’ireo mahery fo mba hanampy ny TOMPO hiady.

²⁴Hotahîna mihoatra noho ny vehivavy rehetra kosa anie i Jahela izay vadin’i Hebera lehilahy kenita! Eny, hotahîna mihoatra noho ny vehivavy rehetra izay mitoetra an-day anie izy!

²⁵Fa rano no nangatahin’i Siserà; nefa ronono kosa no nomeny azy, dia rononomandry tao anaty tsatokaty marevaka.

²⁶Avy eo noraisiny tamin’ny tanan-kavia ny tsimaday ary tamin’ny tanan-kavanana ny tantanan’ny mpiasa, dia nasiany ka vaky ny lohan’i Siserà; ary nataony gorobaka ny fihirifany.

²⁷Teo an-tongo-dravehivavy izy no nitolefika sy nianjera ary nitsitra; teo an-tongo-dravehivavy teo izy no nitolefika sy nianjera; teo amin’ny nahatolefika azy teo izy no nianjera ka maty.

²⁸Nitazana teo am-baravarankely ny renin’i Siserà, teo anelanelan’ny makarakara izy no nitaraina hoe: «Nahoana àry no mbola tsy tonga ihany ny kalesiny? Nahoana àry no mitaredretra any ny kalesiny?»

²⁹Izay hendry indrindra tamin’ireo andriambavy namany no nanome azy izao valinteny manaraka izao, ka izany koa no naverimberin’ny tenany hoe:

³⁰«Manangona babo izay ny miaramila, ary mbola eo am-pizaràna azy: tovovavy iray na roa isaky ny mahery fo; karazan-damba miloko samy hafa sady vita peta-kofehy ho an’i Siserà; eny, lamba vita peta-kofehy anatiny sy ivelany no hahodidina ny vozon’ilay mpamabo.»

³¹TOMPO ô, aoka ny fahavalonao rehetra ho faty tahaka an’i Siserà avokoa; fa ny sakaizanao kosa anie ho toy ny masoandro fony izy miposaka mamirapiratra mafy indrindra! Dia nandry feizay ny tany nandritra ny efapolo taona.