Read DIEM PROTESTANTA Mpitsara 9 Bible Online

Mpitsara 9 - DIEM PROTESTANTA bible

Mpitsara 9

¹I Abimelèka, zanakalahin’i Jerobahala[61] na Gidehôna, dia nankany Sekema mba hifandinika tamin’ny anadahin-dreniny sy izay rehetra isan’ny fianakavian-dreniny ka nanao taminy hoe:

²— Mba anontanio ny mponina rehetra eto Sekema ange izay mety aminy kokoa na ny hofehezin’ny fitopolo lahy zanak’i Jerobahala, na ny hofehezin’ny olona iray ihany. Ary tsarovy fa izaho dia isan’ny fianakavianareo.

³Dia lasa ireto anadahin-drenin’i Abimelèka namerina izany teny rehetra izany tamin’ireo mponin’i Sekema. Koa nanapa-kevitra ireo fa homba an’i Abimelèka satria havany ihany izy.

⁴Ary nanome sekela volafotsy fitopolo avy tao amin’ny rakitry ny tempolin’i Bahala-Berita[62] ho an’i Abimelèka izy. Izany vola izany no hividianan’i Abimelèka ireo olom-poana sy marivo salosana hanaraka azy.

⁵Ary tonga tao an-tranon-drainy tao Hôfrà i Abimelèka ka namono ny rahalahiny fitopolo lahy zanak’i Jerobahala teo ambony vatolampy iray ihany. I Jôtama, ilay kely indrindra tamin’ireo ihany, no sisa afaka satria niery izy.

⁶Dia nivory avokoa ny mponin’i Sekema sy ny olona rehetra tao Bety-Milao ka nankeo amin’ny terebinta tao Sekema, teo anilan’ny tsangambato, mba hanangana an’i Abimelèka ho mpanjakany[63].

⁷Notantaraina tamin’i Jôtama izany. Koa lasa izy nitsangana teo an-tampon’ny tendrombohitra Gerizima[64], dia nanandra-peo ka niantso mafy hoe: — Mihainoa ahy ianareo mponin’i Sekema, dia mba hihaino anareo koa Andriamanitra!

⁸«Indray andro dia nanapa-kevitra ny hazo fa hifidy mpanjaka ho azy, ka niteny tamin’ny hazo ôliva hoe: ‹Manjakà aminay ianao!›

⁹Fa namaly azy ny hazo ôliva hoe: ‹Dia holaviko ve ny hamokatra diloilo izay anomezam-boninahitra ny andriamanitra sy ny olona, ka handeha hitsingevaheva eny ambonin’ny hazo hafa aho?›

¹⁰Ary hoy koa ireo hazo tamin’ny aviavy: ‹Andao ianao hanjaka aminay.›

¹¹Fa namaly azy ny aviavy hoe: ‹Dia holaviko ve ny hanome voa mamy sy matsiro, ka handeha hitsingevaheva eny ambonin’ny hazo hafa aho?›

¹²Ary hoy koa ireo hazo tamin’ny voaloboka: ‹Andao ianao hanjaka aminay.›

¹³Fa namaly azy ny voaloboka hoe: ‹Dia holaviko ve ny hamokatra divay izay mahafaly an’Andriamanitra sy ny olona, ka handeha hitsingevaheva eny ambonin’ny hazo hafa aho?›

¹⁴Farany, dia ny kirihitra tsilo no nitenenan’ny hazo rehetra hoe: ‹Andao ianao hanjaka aminay.›

¹⁵Ary namaly azy ny kirihitra tsilo hoe: ‹Raha sitrakareo tokoa ny hifidy ahy ho mpanjakanareo, dia avia mipetraka eto ambany alokaloko ianareo! Fa raha tsy hanao izany ianareo, dia aoka hisy afo mivoaka avy amin’ny tsiloko ka handoro hatramin’ny hazo sederan’i Libano[65] aza!› »

¹⁶Dia hoy ihany i Jôtama hoe: — Ankehitriny àry, moa rariny sy hitsiny ve ny nataonareo fony nampanjaka an’i Abimelèka ianareo? Mety ve ny nataonareo tamin’i Jerobahala sy ny ankohonany? Araka ny soa vitany taminareo ve no navalinareo azy?

¹⁷Fa niady ho anareo ny raiko ka nanao vy very ny ainy mba hanafaka anareo tamin’ny Midianita;

¹⁸nefa androany dia nikomianareo ny ankohonany. Novonoinareo ny zanany fitopolo lahy teo ambony vatolampy iray ihany; ary nampanjakainareo tamin’ny mponin’i Sekema i Abimelèka zanakalahin’ny mpanompovaviny, satria havanareo izy.

¹⁹Koa raha tàhiny rariny sy hitsiny ny nataonareo tamin’i Jerobahala sy ny ankohonany androany, dia hifalianareo anie i Abimelèka ary hifaliany anie ianareo!

²⁰Raha tsy izany kosa, dia aoka hisy afo mivoaka avy amin’i Abimelèka ka handoro anareo mponin’i Sekema sy i Bety-Milao, ary aoka hisy afo mivoaka avy aminareo ka handoro an’i Abimelèka!

²¹Taorian’izay dia nitsoaka nandositra nankany Beerà[66] i Jôtama ary nitoetra tany mba hiery an’i Abimelèka rahalahiny.

²²Nifehy an’i Israely nandritra ny telo taona i Abimelèka.

²³Taorian’izany, dia nisy fanahy mampikorontana nalefan’Andriamanitra tamin’ny mpanjaka sy tamin’ny mponin’i Sekema ka nikomy tamin’i Abimelèka ireo Sekemita.

²⁴Izany no ho valin’ny herisetra nataon’i Abimelèka tamin’ny fitopolo lahy zanak’i Jerobahala sy ho todin’ny ran’ny rahalahiny izay novonoiny, sady hamaliana ireo mponin’i Sekema izay niara-nitsikombakomba taminy.

²⁵Mba hamelezana an’i Abimelèka, dia nisy mpisakan-dalana napetraky ny Sekemita teo an-tampon-kavoana akaikin’ny tanàna ka izay rehetra nandalo tamin’izany lalana izany, dia norobainy avokoa[67]. Koa nampandrenesina izany i Abimelèka.

²⁶Indray andro dia tonga tao Sekema i Gahala zanakalahin’i Hebeda, sy ireo rahalahiny; ary nametraka fitokiana taminy ny mponin’i Sekema.

²⁷Nandeha nioty voaloboka tany an-tsaha ny Sekemita, ary nanosihosy voaloboka, dia nanomana fety. Nankany amin’ny tempolin’ny andriamaniny izy ary nisotro sy nihinana sady nanozona an’i Abimelèka.

²⁸Ary i Gahala nanontany azy ireo hoe: — Fa iza moa isika eto Sekema no hanaiky hanjakan’i Abimelèka? Ary mba iza moa izy fa tsy zanakalahin’i Jerobahala ary tsy i Zebola ve no nampitondrainy ny tanàna? Koa aoka ianareo tsy hivadika amin’ireo taranak’i Hamôra, ilay mpanorina an’i Sekema[68]! Tsy misy antony tokony hanompoantsika an’i Abimelèka akory.

²⁹Enga anie ka ho eo ambony fahefàko ny vahoaka sekemita, dia haongako i Abimelèka! Avy eo i Gahala dia nanao tamin’i Abimelèka hoe: — Hamaroy ny tafikao, ka mivoaha hiady amiko!

³⁰Ary nony ren’i Zebola governoran’ny tanàna ireo tenin’i Gahala zanakalahin’i Hebeda, dia tezitra izy.

³¹Koa nandefa iraka miafina ho any amin’i Abimelèka izy hanao hoe: — Indro tonga eto Sekema i Gahala, zanakalahin’i Hebeda, sy ireo rahalahiny ka manainga ny eto an-tanàna hikomy aminao.

³²Koa izao anio alina izao ihany dia miaingà ianao sy ny tafikao ka miafena any an-tsaha.

³³Ary rahampitso maraina, vao miposaka ny masoandro, dia tongava hanafika ny tanàna; ka rehefa mivoaka hifanehatra aminao i Gahala sy ny olona mpomba azy dia ataovy araka ny tokony hafitsokao aminy.

³⁴Dia niainga i Abimelèka sy ny tafika manontolo mpomba azy nony alina, ka nizara ho antokony efatra ary nandeha niafina tao akaikin’i Sekema.

³⁵Ary rehefa nivoaka ny tanàna i Gahala ary nijoro teo anoloan’ny vavahady, dia nipoitra avy tao amin’ny toerana niafenany i Abimelèka sy ny antokon-tafika niaraka taminy.

³⁶Nahita ireo i Gahala ka nanao tamin’i Zebola hoe: — Jereonao fa misy tafika midina avy ao an-tampon-kavoana. Dia novalian’i Zebola hoe: — Tsia fa aloky ny havoana no heverinao ho olona!

³⁷Nanamafy kosa i Gahala hoe: — Jereonao fa tafika mihitsy ireny midina avy amin’ny havoana afovoany ireny, ary misy antokony iray hafa koa avy amin’ny lalana mihazo ny Terebintan’ny Mpanandro[69].

³⁸Dia namaly azy indray i Zebola hoe: — Aiza amin’izay ity vavanao nilaza taminay hoe: «Iza moa i Abimelèka no hotompointsika?» Ka tsy ireo ve ny tafika novingavingainao? Koa miaingà ianao ankehitriny hiady aminy!

³⁹Dia nivoaka ny tanàna i Gahala nitarika ny mponin’i Sekema, ka niady tamin’i Abimelèka.

⁴⁰Ary voatery nandositra izy fa nenjehin’i Abimelèka. Maro ireo maty niampatrampatra mandra-pahatongany teny am-bavahadin’ny tanàna.

⁴¹Ary i Abimelèka dia nandeha nipetraka tao Aromà[70]; fa i Zebola kosa nandroaka an’i Gahala sy ny rahalahiny tao Sekema mba tsy honina ao intsony.

⁴²Ny ampitson’iny, dia niomana ho any an-tsaha ny mponina tao Sekema, ka nampandrenesina izany i Abimelèka.

⁴³Dia nalain’i Abimelèka ny tafiny ka nozarainy ho antokony telo, dia niafina tany an-tsaha izy. Ary rehefa hitany fa indreny ny olona nivoaka avy tao Sekema, dia nipoitra hamely azy izy.

⁴⁴Ary i Abimelèka sy ny antokony niaraka taminy dia niroatra naka toerana teo ambavahadin’ny tanàna, fa ireo antokony roa hafa kosa niroatra tamin’ireo olona tany an-tsaha ka nandringana azy.

⁴⁵Nanohy ny ady tao an-tanàna i Abimelèka ny tontolo andro ka nahazo ny tanàna sy nandringana ny olona rehetra tao; dia noravany ny tanàna ary nofafazany sira ilay toerana.

⁴⁶Ary rehefa ren’ny mponina rehetra tao Migdala-Sekema izany, dia niditra tao amin’ny efitrano fierena tao ambanin’ny tempolin’i Bahala-Berita[71] izy.

⁴⁷Ary nisy nampandre an’i Abimelèka fa tafangona miafina ao ny mponina rehetra tao Migdala-Sekema.

⁴⁸Dia niakatra nankany an-tendrombohitra Tsalmôna[72] i Abimelèka sy ny tafika manontolo nomba azy. Ary naka famaky izy, dia nikapa sampan-kazo ka nobetainy izany ary napetrany teo an-tsorony; dia nasainy nanao tahaka izany haingana koa ny tafiny.

⁴⁹Koa samy nikapa sampan-kazo iray avy ny miaramilany rehetra ary nanaraka an’i Abimelèka. Ary nentiny ny sampan-kazo ka natobiny teo anilan’ilay efitrano fierena, dia nodorany io mbamin’izay rehetra tao anatiny. Izany no nahafaty ny mponina rehetra tao Migdala-Sekema, dia lehilahy sy vehivavy tokony ho arivo.

⁵⁰Avy eo dia nankany Tebetsa[73] i Abimelèka, ary nanao fahirano ny tanàna ka nahazo azy.

⁵¹Nisy tilikambo fiambenana mafy tao afovoan-tanàna, koa nandeha nialoka tao avokoa ny mponina rehetra na lahy na vavy mbamin’ireo lehiben’ny tanàna: nohidiany ny varavarana ary niakatra teny an-tampon-trano izy rehetra.

⁵²Ary tonga hatrany amin’ny tilikambo i Abimelèka mba hamely izany; dia nanatona teo am-baravarana izy mba handoro ilay tilikambo.

⁵³Kanjo nisy vehivavy iray nanjera vato lehibe iray teo an-dohany ka nahavaky ny karandohany.

⁵⁴Dia nantsoin’i Abimelèka faingana ilay tovolahy mpitondra ny fiadiany ary nodidiany hoe: — Raiso ny sabatrao ka vonoy aho, fandrao holazain’ny olona hoe vehivavy no nahafaty ahy. Dia notrobaran’ilay tovolahy tamin’ny sabatra i Abimelèka ka maty.

⁵⁵Ary rehefa hitan’ny vatan-dehilahy israelita fa maty i Abimelèka, dia samy nody any amin’ny fonenany avy izy.

⁵⁶Toy izany no namalian’Andriamanitra an’i Abimelèka noho ny ratsy nataony tamin’ny rainy fony izy namono nahafaty ireo rahalahiny fitopolo.

⁵⁷Novalian’Andriamanitra toy izany koa ny mponin’i Sekema ka natsingeriny teo an-dohany ny ratsy rehetra nataony, ary tanteraka taminy ireo ozona nambaran’i Jôtama, zanakalahin’i Jerobahala[74].