Read DIEM PROTESTANTA Apôkalipsỳ 17 Bible Online

Apôkalipsỳ 17 - DIEM PROTESTANTA bible

Apôkalipsỳ 17

¹Dia nanatona ahy ny anankiray tamin’ireo anjely fito izay nanana ny lovia fito, ka niteny tamiko nanao hoe: — Avia atỳ fa hasehoko anao ny fitsarana ilay vehivavy janga malaza ratsy, izay mipetraka eo ambonin’ny ranobe.

²Fa io vehivavy io no nijangajangan’ny mpanjakan’ny tany, ary nahaboboka ny mponina ambonin’ny tany tamin’ny divaim-pijangajangàny[110].

³Dia nahazo tsindrimandry avy amin’ny Fanahy Masina aho ka nentin’ny anjely ho any an-taniefitra, ary nahita vehivavy mitaingina biby. Mivolon-jaky ilay biby, rakotra anarana manevateva an’Andriamanitra ny tenany, sady nanana loha fito sy tandroka folo.

⁴Ravehivavy dia nitafy lamba volomparasy sy jaky sady niravaka volamena sy vatosoa ary perla; teny an-tanany kosa nisy tsatokaty volamena feno fanazimbazimbana, dia ny zava-maloto vokatry ny fijangajangàny;

⁵ary nisy anarana voasoratra teo an-kandriny, dia anarana mifono hevi-miafina manao hoe: «Izaho no Babilôna lehibe, foiben’ny fijangajangana sy ny fanazimbazimbana eto ambonin’ny tany.»

⁶Hitako ravehivavy fa boboky ny ran’ireo vahoakan’Andriamanitra, boboky ny ran’ireo vavolombelona nanambara an’i Jesoa ka novonoina ho faty noho izany. Gaga dia gaga tokoa aho nahita an-dravehivavy;

⁷ka hoy ny anjely tamiko: — Nahoana no gaga ianao? Holazaiko anao ny hevi-miafina ny amin-dravehivavy sy ny amin’ilay biby fito loha sy folo tandroka mitondra azy.

⁸Ny biby izay hitanao dia nanan-kery taloha, fa tsy manana intsony izao, ary efa hiakatra avy any amin’ny hantsambe[111] mba hizotra ho amin’ny fandringanana. Dia ho gaga ny mponina ambonin’ny tany raha mahita ilay biby: satria nanan-kery izy io taloha, fa tsy manana intsony izao, nefa mbola hanan-kery indray. Ho gaga ny mponina ambonin’ny tany, izany hoe ny olona tsy voasoratra anarana ao amin’ny horonamboky mirakitra ny lisitr’ireo hanana ny fiaina-maharitra mandrakizay; io horonamboky io dia nisy hatramin’ny fiandohan’izao tontolo izao.

⁹Eto no ilàna saina manam-pahendrena. Ny loha fito dia tendrombohitra fito izay ipetrahan-dravehivavy; ary milaza mpanjaka fito koa ireo:

¹⁰efa lavo ny dimy fa iray ihany no eo izao, ary ny iray mbola tsy tonga; ary rehefa tonga izy dia vetivety fotsiny no tsy maintsy hitoerany.

¹¹Ny biby, izay nanan-kery taloha nefa tsy manana intsony izao, dia ilay mpanjaka laharana fahavalo naman’ireo fito ireo ary mizotra ho amin’ny fandringanana.

¹²Ny tandroka folo, izay hitanao, dia mpanjaka folo[112] tsy mbola nahazo fanjakana; kanefa handray fahefana maha mpanjaka izy ireo ka hanjaka mandritra ny adiny iray monja miaraka amin’ilay biby.

¹³Miray hevitra ireo mpanjaka folo ireo ka manolotra ny hery sy ny fahefàny ho an’ilay biby.

¹⁴Hiady amin’ny Zanakondry izy rehetra, nefa haharesy azy ny Zanakondry satria Izy no Tompon’ny tompo sy Mpanjakan’ny mpanjaka; ary haharesy miaraka amin’ny Zanakondry koa ireo olona voaantso sy voafidy, dia ireo mpino Azy.

¹⁵Dia hoy koa ny anjely tamiko: — Ny ranobe, izay hitanao ipetrahan’ilay vehivavy janga, dia vahoaka sy olona maro mbamin’ny firenena sy ny samy hafa fiteny.

¹⁶Ny tandroka folo sy ny biby efa hitanao kosa no hankahala ilay vehivavy janga, ka hahatonga azy hanirery sy hampitanjaka azy ary hihinana ny nofony sy handevona ny tenany amin’ny afo.

¹⁷Fa nanome fo azy ireo Andriamanitra hanatanteraka ny heviny, dia hevitra tokana: ny hanomezan’ireo ny fanjakany ho an’ilay biby, mandra-pahatanteraky ny tenin’Andriamanitra.

¹⁸Ravehivavy efa hitanao no ilay tanàna lehibe izay manjaka amin’ireo mpanjakan’ny tany.