Read DIEM PROTESTANTA 1 Samoela 11 Bible Online

1 Samoela 11 - DIEM PROTESTANTA bible

1 Samoela 11

¹Tonga nanafika ny tanànan’i Jabesy any Gilehada i Nahasy mpanjakan’ny Hamônita ka nanao fahirano azy[43]. Dia hoy ny mponin’i Jabesy taminy: — Manaova fanekena aminay, fa vonon-kanompo anao izahay.

²Fa hoy ny navalin’i Nahasy azy: — Sitrako ny hanao fanekena aminareo raha toa ka hopotseriko avokoa ny masonareo ankavanana; fa ny hahafa-baràka an’i Israely manontolo mihitsy no tadiaviko.

³Hoy kosa ireo loholon’i Jabesy taminy: — Omeo fito andro izahay hahafahanay mandefa iraka manerana ny faritanin’i Israely; fa raha tsy misy mamonjy anay, dia hitolo-batana aminao izahay.

⁴Rehefa tonga tany Gibehà[44] tanànan’i Saoly ireo iraka ka nitantara ny vaovao misy, dia samy nigogogogo nitomany ny vahoaka rehetra.

⁵Tamin’izay indrindra no tonga avy any an-tsaha niroaka ny ombiny i Saoly, ka nanontany izay anton-javatra nampitomany ny olona. Dia nitaterana izay voalazan’ny iraka avy any Jabesy izy.

⁶Raha nandre izany i Saoly, dia nilatsahan’ny Fanahin’Andriamanitra, ary nirehi-pahatezerana mafy.

⁷Naka omby roa izy, ka notetitetehiny madinika izany, ary nasainy nentin’ireo iraka manerana ny faritan’i Israely, miaraka amin’izao fampitandremana hoe: — Ho toy izao anie ny hanjo ny ombin’izay tsy manaraka an’i Saoly sy i Samoela hiady! Azon-korohoro ny amin’izay mety hataon’ny TOMPO ireo Israelita ka niainga hiady toy ny olona iray ihany.

⁸Nampanaovin’i Saoly matso tao Bezeka[45] izy ireo, dia noisainy ka nahatratra andiany telonjato ny avy amin’ireo foko tavaratra ary andiany telopolo ny avy amin’ny fokon’i Joda.

⁹Ireo iraka avy any Jabesy Gilehàda kosa dia nasaina nilaza tamin’ny mponina any aminy hoe: «Rahampitso rehefa antoandrobenanahary iny, dia ho voavonjy ianareo» Dia lasa ny iraka nanambara izany vaovao izany tamin’ny mponin’i Jabesy, izay faly aoka izany

¹⁰sady niteny tamin’ny Hamônita hoe: — Rahampitso dia hitolo-batana aminareo izahay ka ataovy aminay izay tianareo hatao.

¹¹Ny ampitso dia nozarain’i Saoly ho antoko telo ny tafiny izay niditra tao amin’ny tobin’ny fahavalo talohan’ny madiva haraina ary namely ny Hamônita hatramin’ny mitataovovonana. Ny sisa tsy maty dia niparitaka tsy afa niara-droa akory.

¹²Ary hoy ny vahoaka israelita tamin’i Samoela: — Aiza moa ireo olona nilaza fa tsy tokony hanjaka aminay i Saoly[46]? Atolory anay ireny fa hataonay maty tokoa!

¹³Fa hoy kosa i Saoly hoe: — Tsy tokony hisy olona hovonoina ho faty amin’ny andro toy izao, satria androany no nanomezan’ny TOMPO fandresena ho an’i Israely.

¹⁴Dia hoy i Samoela tamin’ny vahoaka israelita: — Andeha isika hankany Gilgàla[47] hanamafy orina ny maha mpanjaka an’i Saoly.

¹⁵Dia lasa nankany Gilgàla ny vahoaka rehetra. Ary tany, tao amin’ny Toeramasina, no nanambarana ampahibemaso indray teo anatrehan’ny TOMPO, ny maha mpanjaka an’i Saoly; tany koa no nanaovany sorom-pihavanana amin’ny TOMPO. Ary dia nifaly aoka izany i Saoly sy ny mponina rehetra tao Israely.