Read DIEM PROTESTANTA 1 Samoela 24 Bible Online

1 Samoela 24 - DIEM PROTESTANTA bible

1 Samoela 24

¹Avy teo i Davida dia niakatra tany amin’ny toerana be harambato, tany Haîna-Gedỳ[126], ary nipetraka tao.

²Rehefa tafaverina avy niady tamin’ny Filistinina i Saoly, dia reny fa efa any an-taniefitr’i Haîna-Gedỳ i Davida.

³Ary i Saoly naka telo arivo lahy izay notsongaina tamin’i Israely manontolo, ka lasa nitady an’i Davida sy ny olony izay teo anoloan’ny Vatolampin’ny Osidia[127].

⁴Raha tonga teo amin’ny valan’ondry nanamorona ny lalana i Saoly, dia sendra zohy[128], ka dia niditra tao mba hivoaka kely. Nefa i Davida sy ny olony dia efa tao anaty zohy tao.

⁵Dia hoy ny olon’i Davida taminy: — Izao no andro voalazan’ny TOMPO taminao hoe: «Indro hatolotro eo an-tananao ny fahavalonao, ka ataovy aminy izay fantatrao fa mety.» Dia nitsangana i Davida ka nitsaitsaika nanapaka moramora ny moron-tongotr’akanjon’i Saoly.

⁶Nefa taorian’izany dia nidobodoboka mafy ny fon’i Davida noho ny nanapahany ny morotongotr’akanjon’i Saoly.

⁷Koa hoy izy tamin’ny olony: — Ho sanatriaviko ary hisakanan’ny TOMPO ahy anie ny haninji-tanana amin’ny mpanjakako, satria Izy TOMPO ihany no efa nifidy azy ho mpanjaka.

⁸Izany teny izany no nanakanan’i Davida ny olony ka tsy namelany azy ireo hamely an’i Saoly. Dia nandao ny zohy i Saoly ary nanohy ny diany.

⁹Taorian’izany dia nitsangana ihany koa i Davida, nivoaka ny zohy sady niantso mafy an’i Saoly hoe: — Ry mpanjaka tompoko ô! Nitodika nijery i Saoly, dia niankohoka ho mari-panajana azy i Davida.

¹⁰Ary hoy i Davida tamin’i Saoly: — Nahoana ianao, ry mpanjaka, no dia mihaino izay vavan’olona milaza fa mitady hanisy ratsy anao aho?

¹¹Kanefa ny masonao mihitsy no mahita androany, fa ny TOMPO efa nanolotra anao ho eo am-pelatanako tao an-johy. Nasain’ny olona hovonoin-ko faty ianao, nefa niantra anao aho, fa hoy aho hoe: Tsy haninji-tanana amin’ny mpanjakako aho, satria ny TOMPO no efa nifidy anao ho mpanjaka.

¹²Jereo koa, ry mpanjakako ô! Eny, jereo fa ity an-tanako ity ny morontongotr’akanjonao. Koa raha nanapaka ny akanjonao fotsiny aho fa tsy namono nahafaty anao, dia aoka ho fantatrao fa tsy olon-dratsy na mpikomy aho, ary tsy mba nanota taminao! Ianao no manao haza lambo ahy sady mifofo ny aiko.

¹³Ny TOMPO anie no hitsara ahy sy ianao, ka hamaly anao noho ny ratsy nataonao tamiko! Fa izaho kosa tsy haninji-tanana aminao.

¹⁴Araka ny lazain’ny ohabolan’ntaolo, dia «ny olon-dratsy no ipoiran’ny faharatsiam-panahy», fa izaho kosa tsy haninji-tanana aminao.

¹⁵Amin’iza moa no iadianao, ry mpanjakan’i Israely? Izaho izay amboa maty sy parasy kely ity ve no enjehinao?

¹⁶Aoka ny TOMPO no ho mpitsara ka dia hitsara ahy sy ianao! Aoka handinika ny amiko Izy ka hiaro ahy ary hanafaka ahy amin’ny fanenjehanao!

¹⁷Rehefa vita izany tenin’i Davida tamin’i Saoly izany, dia nanontany azy i Saoly hoe: — Feonao tokoa ve izany, ry Davida zanako ô! Ary dia nigogogogo nitomany i Saoly.

¹⁸Dia hoy indray izy tamin’i Davida: — Marina ny anao, anaka, fa izaho no tena diso, satria ianao nanao soa tamiko fa izaho kosa nanao izay ratsy taminao.

¹⁹Nasehonao tamiko androany ny hatsaram-ponao, fa tsy novonoinao ho faty aho na dia efa natolotry ny TOMPO teo an-tananao aza aho.

²⁰Raha misy olona mahatratra ny fahavalony, moa avelany handeha soa aman-tsara ve izy? Sanatria! Koa hamaly fitia anao anie ny Tompo noho izay nataonao tamiko androany.

²¹Ankehitriny, fantatro fa ianao no ho mpanjaka ary hitoetra eo an-tananao ny fanjakan’i Israely.

²²Koa mianiàna amiko amin’ny TOMPO ianao ankehitriny, fa tsy handringana ny taranako mandimby ahy ianao ary tsy hamono ny anarako tsy ho isan’ny taranaky ny raiko.

²³Dia nianiana izany tamin’i Saoly i Davida. Ary i Saoly nody tany aminy, fa i Davida sy ny olony kosa niverina niakatra tany amin’ny fiereny.