Read DIEM PROTESTANTA 1 Samoela 5 Bible Online

1 Samoela 5 - DIEM PROTESTANTA bible

1 Samoela 5

¹Azon’ny Filistinina àry ny Vatamasin’Andriamanitra ka nentiny nankany Asdôda avy tao Ebena-Hezera[15].

²Dia nalainy ny Vatamasina ka nampidiriny tao amin’ny tempolin’i Dagôna andriamaniny ary napetrany teo anilan’ny sarivongan’i Dagôna.

³Ny ampitso, rehefa nifoha ny mponin’i Asdôda, dia nahita ny sarivongan’i Dagôna nidaboka nihohoka tamin’ny tany teo anoloan’ny Vatamasin’ny TOMPO; natsangan’izy ireo izy ka napetrany indray tamin’ny toerany.

⁴Ny ampitso maraina manaraka dia hitan’ny olona fa mbola nidaboka tamin’ny tany teo anoloan’ny Vatamasin’ny TOMPO indray ilay sarivongana; tapaka teo an-tokonam-baravarana ny lohany sy ny tanany roa, fa ny vatabeny ihany no tsy nanohinana.

⁵— Izany no tsy anitsahan’ny mpisoron’i Dagôna sy izay rehetra miditra ao amin’ny tempoliny, ao Asdôda, ny tokonam-baravaran’i Dagôna mandraka androany.

⁶Tsy zakan’ny mponin’i Asdôda ny famaizana nafitsoky ny herin’ny TOMPO, fa sady nampitondra faisana azy izany no nahavoan-kitso azy mbamin’ireo mponina manodidina.

⁷Rehefa nahita ny nahazo azy ny mponin’i Asdôda, dia nanambara hoe: — Aoka tsy hitoetra eto amintsika ny Vatamasin’ilay Andriamanitr’i Israely, fa ny nafitsoky ny heriny efa nampitondra ny mafy antsika sy an’i Dagôna andriamanitsika!

⁸Dia nampiantso ireo andriana dimy filohan’ny Filistinina izy ireo mba hivory any aminy ka nanontany azy hoe: — Hataonay ahoana ny Vatamasin’ilay Andriamanitr’i Israely? Dia hoy ireo filoha taminy: — Aoka hafindra hankany Gata[16] izany! Dia nafindra nankany Gata ilay Vatamasina;

⁹nefa vantany vao tonga tany izany, dia namely ny mponina tao an-tanàna ny herin’ny TOMPO ka nahatonga hotakotaka goavana. Nasian’ny Tompo izy rehetra ka voan’ny kitso avokoa, nanomboka tamin’ny kely indrindra ka hatramin’ny lehibe indrindra.

¹⁰Dia nalefany nankany Hekrôna ny Vatamasin’Andriamanitra; nefa nony tonga tany izany, dia niantsoantso mafy ny mponin’i Hekrôna hoe[17]: — Nafindra atỳ aminay mba hahafaty anay mianakavy ny Vatamasin’ilay Andriamanitr’i Israely.

¹¹Mba nampiantsoan’izy ireo koa ireo andriana filohan’ny Filistinina ka nilazany hoe: — Avereno any amin’izay toerana nisy azy any ny Vatamasin’ilay Andriamanitr’i Israely sao dia hahafaty anay rehetra. Fa hotakotaka mahatsiravina no tao an-tanàna satria mafy dia mafy koa no nafitsoky ny herin’ny Tompo tao;

¹²ka izay tsy maty dia voan’ny kitso, ary niakatra ny lanitra ny kiakia-pahoriany.