Read DIEM PROTESTANTA 1 Samoela 7 Bible Online

1 Samoela 7 - DIEM PROTESTANTA bible

1 Samoela 7

¹Tonga naka ny Vatamasin’ny TOMPO ny mponin’i Kiriata-Jeharîma ka nitondra azy ho ao an-tranon’i Abinadàba teo amin’ny havoana iray[22]. Dia natokan’izy ireo ho mpiambina ny Vatamasin’ny TOMPO i Elihezera zanakalahin’i Abinadàba.

²Hatramin’ny nitoeran’ny Vatamasin’ny TOMPO tany Kiriata-Jeharîma, dia andro maro no nifandimby, efa roapolo taona izao. Nalahelo te hiverina amin’ny TOMPO ny Israelita rehetra

³ka nilazan’i Samoela hoe: — Raha amin’ny fonareo manontolo tokoa no hiverenanareo amin’ny TOMPO, dia atsaharo ny fanompoanareo andriamani-kafa sy fanompoanareo ny sampy Hastôreta; aoka hiraiki-po amin’ny TOMPO ianareo, ary aza manompo afa-tsy Izy irery ihany, fa hovonjeny tsy ho voagejan’ny Filistinina ianareo.

⁴Dia narian’ny Israelita ireo sampin’ny andriamani-dahy Bahala sy ny andriamani-bavy Hastôreta, ka ny TOMPO no hany notompoiny.

⁵Avy eo dia hoy i Samoela hoe: — Aoka ho vory any Mitsepà[23] ny vahoaka Israely tsivakivolo, fa izaho hivavaka amin’ny TOMPO ho azy.

⁶Dia tafangona tao Mitsepà ny Israelita. Nanovo rano izy ireo, dia nararany tamin’ny tany teo anatrehan’ny TOMPO izany. Nifady hanina koa izy tamin’izany andro izany sady niaiky heloka hoe: «Efa nanota tamin’ny TOMPO izahay.» Tao Mitsepà no nahatonga an’i Samoela ho filohan’ny vahoaka Israely.

⁷Rehefa fantatry ny Filistinina fa nivory tany Mitsepà ny Israelita, dia tapa-kevitra ireo andriana dimy filohan’ny Filistinina fa hanafika azy. Nony ren’ny Israelita izany, dia natahotra ny Filistinina izy,

⁸ka nanao tamin’i Samoela hoe: — Aza arianao izahay, fa mivavaha amin’ny TOMPO Andriamanitsika ho anay, mba hamonjeny anay tsy ho voagejan’ny Filistinina.

⁹Naka zanak’ondry mbola minono i Samoela ka nanolotra izany ho sorona dorana manontolo ho an’ny TOMPO; dia nitalaho tamin’ny TOMPO ho an’ny vahoaka Israely izy, ary ny TOMPO namaly ny vavaka nataony.

¹⁰Fa raha mbola nanatitra ilay sorona i Samoela, dia nandroso hanafika an’i Israely kosa ny Filistinina. Tamin’izay indrindra anefa ny TOMPO no nampirefotra kotro-baratra tamin’ny miaramila filistinina sy nampifanaritaka azy, ka resin’ny Israelita izy ireo.

¹¹Niala tao Mitsepà ny tafik’i Israely ka nanenjika ny Filistinina hatrany ambanin’ny Bety-Kàra[24] mandra-pandresiny azy tanteraka.

¹²Naka vato i Samoela ka natsangany teo anelanelan’i Mitsepà sy i Sèna izany ary nomeny anarana hoe Ebena-Hezera na «Vatom-pamonjena», fa hoy izy hoe: «Efa namonjy antsika hatretỳ ny TOMPO[25].»

¹³Menatra ny fahareseny loatra ny Filistinina, ka tsy sahy nitsofoka ny faritanin’i Israely intsony, satria ny TOMPO naneho ny heriny tamin’izy ireo nandritra ny andro rehetra niainan’i Samoela.

¹⁴Ary ireo tanàna izay nalain’ny Filistinina tamin’ny Israelita, teo anelanelan’i Hekrôna sy Gata[26], dia tafaverina soa aman-tsara tamin’ny Israelita; koa afaka teo an-tanan’ny Filistinina izany faritra izany. Ary dia nisy koa ny fandriampahalemana teo amin’ny Israelita sy ny Amôrita.

¹⁵I Samoela no filohan’ny vahoaka Israely mandra-pahafatiny.

¹⁶Isan-taona izy dia nandeha nitety an’i Betela sy i Gilgala[27] ary i Mitsepà ka nitsara tamin’ireo tanàna telo ireo.

¹⁷Rehefa izany, dia niverina nody tany Ramà[28] izay nisy azy izy; nitsarany ny Israelita koa tao sady nanorenany alitara anankiray ho an’ny TOMPO.